Wp/tdd/ᥛᥫᥒᥰ ᥛᥣᥱ ᥘᥥᥰ ᥔᥦᥰ

< Wp‎ | tdd
Wp > tdd > ᥛᥫᥒᥰ ᥛᥣᥱ ᥘᥥᥰ ᥔᥦᥰ

ᥛᥫᥒᥰ ᥛᥣᥱ ᥘᥥᥰ ᥡᥦᥰ ᥘᥭᥳ ᥛᥤᥰ ᥝᥭᥳ ᥖᥤ ᥐᥧᥢ ᥚᥣᥭᥱ ᥟᥩᥐᥱ ᥖᥣᥒᥰ ᥓᥣᥢᥰ ᥟᥥᥰ ᥔᥦᥰ ᥕᥝᥳ. ᥛᥢᥰ ᥙᥥᥢ ᥛᥫᥒᥰ ᥚᥖ ᥖᥣᥱ ᥘᥦᥱ ᥘᥦᥲ ᥛᥤᥰ ᥝᥭᥳ 13 ᥓᥪᥒ ᥛᥫᥒᥰ ᥖᥒᥰ ᥘᥣᥲ ᥘᥤᥢ 3 ᥟᥢ ᥚᥩᥒᥰ ᥘᥨᥒᥴ ᥓᥪᥒ ᥛᥫᥒᥰ ᥟᥧᥙ ᥙᥫᥒ ᥕᥝᥳ. ᥛᥫᥒᥰ ᥛᥣᥱ ᥘᥥᥰ ᥔᥦᥰ ᥘᥭᥳ ᥛᥤᥰ ᥕᥧᥱ ᥝᥭᥳ ᥖᥤ ᥐᥧᥢ 2 ᥟᥢ. ᥟᥢ ᥘᥪᥒ ᥙᥥᥢ ᥙᥢᥱ ᥢᥤᥱ ᥔᥧᥱ ᥘᥣᥱ ᥛᥣᥱ ᥘᥥᥰ ᥡᥦᥰ ᥘᥦᥲ ᥗᥦᥒᥲ ᥟᥢ ᥘᥪᥒ ᥙᥥᥢ ᥛᥣᥱ ᥘᥦᥰ ᥡᥣᥰ ᥚᥣᥭᥱ ᥖᥒᥰ ᥟᥩᥐᥱ ᥟᥢ ᥛᥤᥰ ᥝᥭᥳ ᥖᥤ ᥐᥧᥢ ᥙᥩᥱ ᥢᥤˇᥕᥨᥝᥱ ᥕᥝᥳ. ᥙᥢᥱ ᥢᥤᥱ ᥔᥧᥱ ᥘᥣᥱ ᥛᥣᥱ ᥘᥦᥰ ᥡᥣᥰ ᥘᥭᥳ ᥘᥦᥢ ᥘᥤᥢ ᥛᥢᥰ ᥓᥙ ᥐᥢ ᥖᥣᥒᥰ ᥛᥫᥒᥰ ᥗᥭᥰ, ᥛᥫᥒᥰ ᥔᥤᥢᥱ ᥐᥣᥱ ᥙᥨᥝᥰ, ᥛᥫᥒᥰ ᥙᥤᥱ ᥕᥦᥖᥱ ᥘᥢᥱ ᥖᥒᥰ ᥛᥫᥒᥰ ᥟᥤᥢᥱ ᥖᥨᥝᥱ ᥢᥤᥰ ᥡᥣᥰ ᥕᥝᥳ. ᥛᥣᥱ ᥘᥦᥰ ᥡᥣᥰ ᥚᥣᥭᥱ ᥟᥩᥐᥱ ᥔᥛᥳ ᥓᥙ ᥐᥢ ᥖᥣᥒᥰ ᥙᥣᥱ ᥘᥧᥱ ᥢᥣᥭᥰ, ᥟᥤᥢᥱ ᥖᥨᥝᥱ ᥢᥤᥰ ᥡᥣᥰ, ᥚᥤᥱ ᥘᥦᥖ ᥙᥥᥢᥰ ᥖᥒᥰ ᥙᥤᥱ ᥕᥦᥖᥱ ᥘᥢᥱ ᥕᥝᥳ. ᥛᥫᥒᥰ ᥘᥨᥒᥱ ᥛᥣᥱ ᥘᥥᥰ ᥡᥣᥰ ᥙᥥᥢ ᥐᥩᥱ ᥘᥣᥱ ᥘᥛᥱ ᥙᥧᥱ ᥕᥝᥳ. ᥞᥨᥝ ᥐᥨᥢᥰ ᥟᥢ ᥕᥧᥱ ᥔᥝᥰ ᥖᥤ ᥛᥣᥱ ᥘᥥᥰ ᥡᥣᥰ ᥛᥤᥰ 32 ᥛᥤᥱ ᥘᥤᥱ ᥕᥦᥛᥱ ᥕᥝᥳ. ᥘᥬᥰ ᥐᥛᥱ ᥚᥣᥱ ᥘᥭᥳ, ᥑᥝᥴ ᥙᥥᥢ ᥘᥣᥛᥱ ᥙᥣᥖ 45 ᥟᥢ ᥛᥤᥰ ᥞᥨᥝᥴ ᥐᥧᥢᥰ ᥘᥛᥴ ᥔᥤᥴ ᥙᥪᥢ ᥕᥝᥳ.

ᥛᥣᥱ ᥘᥥᥰ ᥡᥣᥰ ᥐᥩᥲ ᥛᥫ ᥟᥩᥢ ᥖᥣᥒᥰ ᥕᥣᥛᥰ ᥛᥤᥰ ᥛᥫᥒᥰ ᥞᥩᥴ ᥑᥛᥰ ᥑᥝᥴ ᥕᥧᥱ. ᥛᥫ ᥙᥤ 1800s ᥘᥢᥳ, ᥑᥝᥴ ᥐᥩᥲ ᥘᥭᥲ ᥖᥨᥐ ᥖᥬᥳ ᥛᥪᥰ ᥙᥣᥱ ᥘᥤᥖ ᥖᥤᥖ ᥟᥤᥢᥱ ᥙᥣᥱ ᥕᥣᥱ ᥑᥝᥴ ᥕᥝᥳ. ᥛᥪ ᥙᥤ 1946 ᥘᥢᥳ, ᥛᥫᥒᥰ ᥙᥢᥱ ᥢᥤᥱ ᥔᥧᥱ ᥘᥣᥱ ᥛᥣᥱ ᥘᥥᥰ ᥡᥣᥰ ᥘᥭᥳ ᥑᥪᥢᥰ ᥛᥥᥰ ᥙᥥᥢ ᥛᥣᥱ ᥘᥣᥱ ᥕᥢᥱ ᥕᥧᥱ ᥢᥤᥱ ᥕᥢᥱ ᥕᥝᥳ. ᥐᥨᥭᥰ ᥐᥣ ᥗᥪᥒᥴ ᥛᥣᥰ ᥙᥤ 1948 ᥔᥛᥳ, ᥑᥪᥢᥰ ᥛᥥᥰ ᥞᥬᥲ ᥙᥥᥢ ᥚᥖ ᥖᥣᥱ ᥘᥦᥱ ᥛᥣᥱ ᥘᥣᥱ ᥕᥣᥱ ᥕᥝᥳ. ᥑᥝᥴ ᥑᥪᥢᥰ ᥘᥭᥲ ᥘᥩᥒ ᥘᥩᥖ ᥘᥦᥝᥰ ᥛᥫ 31/08/1957 ᥕᥝᥳ. ᥛᥫᥒᥰ ᥘᥩᥖ ᥘᥦᥝᥰ ᥔᥝᥰ ᥑᥩᥴ ᥛᥣᥱ ᥘᥥᥰ ᥡᥣᥰ ᥘᥭᥳ ᥑᥪᥢᥰ ᥛᥥᥰ ᥞᥨᥛ ᥙᥩᥒᥰ ᥐᥢ ᥖᥒᥰ ᥙᥩᥱ ᥢᥤᥱ ᥕᥨᥝᥱ ᥚᥣᥭᥱ ᥞᥩᥒᥱ, ᥔᥣᥱ ᥘᥣᥱ ᥝᥖ ᥖᥒᥰ ᥔᥤᥢᥱ ᥐᥣᥱ ᥙᥨᥝᥰ ᥟᥢ ᥕᥧᥱ ᥖᥬᥳ ᥙᥣᥱ ᥘᥤᥖ ᥖᥤᥖ ᥟᥤᥢᥱ ᥙᥣᥱ ᥕᥣᥱ ᥛᥫ ᥝᥢᥰ ᥗᥤᥳ  16/09/1963 ᥔᥥᥴ ᥓᥒᥱ ᥙᥥᥢ ᥛᥣᥰ ᥛᥫᥒᥞ ᥛᥣᥱ ᥘᥥᥰ ᥡᥣᥰ ᥕᥝᥳ. ᥗᥪᥒᥴ ᥛᥣᥰ ᥘᥫᥢ ᥟᥩᥰ ᥐᥦᥖ, 1965 ᥘᥢᥳ, ᥐᥩᥙ ᥙᥫ ᥘᥩᥒ ᥟᥛᥱ ᥚᥩᥛᥳ ᥓᥬ ᥐᥢ ᥘᥬᥰ ᥐᥣᥒ ᥐᥨᥢᥰ ᥘᥨᥒ ᥓᥪᥒ ᥔᥤᥢᥱ ᥐᥣᥱ ᥙᥩᥰ ᥘᥦᥲ ᥛᥫᥒᥰ ᥘᥨᥒᥴ ᥛᥣᥱ ᥘᥥᥰ ᥡᥣᥰ ᥘᥢᥳ ᥔᥥ, ᥓᥩᥛ ᥓᥪᥒ ᥛᥫᥒᥰ ᥔᥤᥢᥱ ᥐᥣᥱ ᥙᥨᥝᥰ ᥓᥒᥱ ᥘᥭᥲ ᥗᥩᥢᥴ ᥓᥪᥒ ᥔᥤᥢᥱ ᥐᥣᥱ ᥙᥨᥝᥰ ᥟᥩᥐᥱ ᥘᥬᥰ ᥛᥫᥒᥰ ᥛᥣᥱ ᥘᥥᥰ ᥡᥣᥰ ᥕᥝᥳ. ᥖᥥᥱ ᥝᥢᥰ ᥘᥢᥳ ᥛᥣᥰ, ᥔᥤᥢᥱ ᥐᥣᥱ ᥙᥨᥝᥰ ᥐᥩᥲ ᥓᥒᥱ ᥘᥭᥲ ᥙᥥᥢ ᥛᥫᥒᥰ ᥘᥩᥖ ᥘᥦᥝᥰ ᥔᥝᥰ ᥑᥩᥴ ᥛᥣᥰ ᥕᥝᥳ.

ᥘᥬᥰ ᥛᥫᥒᥰ ᥛᥣᥱ ᥘᥥᥰ ᥡᥣᥰ ᥘᥭᥳ, ᥐᥨᥢᥰ ᥑᥫᥰ ᥐᥧ ᥓᥣᥝᥰ ᥓᥣᥝᥰ ᥕᥧᥱ ᥓᥩᥛᥰ ᥐᥢ  ᥘᥦᥲ ᥘᥩᥒ ᥜᥤᥒᥲ ᥗᥧᥒᥰ, ᥘᥩᥒ ᥕᥤᥢᥱ ᥙᥥᥲ ᥐᥩᥲ ᥛᥤᥰ ᥐᥧ ᥓᥫᥳ ᥐᥧ ᥛᥥᥝᥰ ᥕᥝᥳ. ᥞᥨᥝᥴ ᥐᥨᥢᥰ ᥑᥫᥒ ᥘᥪᥒ ᥘᥭᥳ ᥙᥥᥢ ᥐᥨᥢᥰ ᥑᥫᥰ ᥛᥣᥱ ᥘᥥᥰ ᥕᥝᥳ. ᥐᥨᥢᥰ ᥑᥫᥰ ᥘᥥᥱ, ᥟᥤᥢᥰ ᥖᥤᥰ ᥕᥣᥰ ᥐᥩᥲ ᥛᥤᥰ ᥟᥤᥖ ᥟᥩᥖ ᥕᥧᥱ. ᥚᥣᥱ ᥔᥣᥱ ᥑᥣᥛᥰ ᥖᥤ ᥛᥫᥒᥰ ᥛᥣᥱ ᥘᥥᥰ ᥡᥣᥰ ᥙᥥᥢ ᥚᥣᥱ ᥔᥣᥱ ᥛᥣᥱ ᥘᥦᥰ ᥟᥢ ᥙᥥᥢ ᥚᥣᥱ ᥔᥣᥱ ᥐᥨᥢᥰ ᥑᥫᥰ ᥛᥣᥱ ᥘᥥᥰ ᥕᥝᥳ. ᥛᥣᥒ ᥖᥤ ᥐᥩᥲ ᥖᥪᥐ ᥓᥬᥳ ᥖᥪᥰ ᥚᥣᥱ ᥔᥣᥱ ᥟᥤᥢᥰ ᥐᥣᥳ ᥘᥥᥖ ᥕᥧᥱ ᥘᥒᥱ ᥐᥝᥱ. ᥚᥣᥱ ᥔᥣᥱ ᥘᥙ ᥕᥛ ᥔᥛᥳ ᥙᥥᥢ ᥟᥤᥖ ᥔᥣᥱ ᥘᥢᥱ ᥐᥦᥱ ᥖᥣᥳ ᥚᥧ ᥟᥧᥙ ᥙᥫᥒᥴ ᥑᥝᥴ ᥙᥢ ᥑᥩᥒᥳ ᥞᥬᥲ ᥘᥙ ᥕᥛᥴ ᥚᥣᥱ ᥔᥣᥱ ᥖᥣᥒᥱ ᥟᥢ ᥕᥧᥱ.