ᥓᥣᥭᥰ ᥟᥫᥱ ᥙᥝᥰ，ᥙᥥᥢ ᥐᥨᥢᥰ ᥛᥣᥢᥲ ᥞᥨᥝᥴ ᥘᥩᥒᥴ ᥖᥤ ᥓᥣᥒ ᥞᥩᥒ ᥓᥫᥢᥱ ᥔᥦᥢᥱ ᥛᥫᥒᥰ ᥝᥢᥰ，ᥙᥥᥢ ᥐᥨᥢᥰ ᥟᥢ ᥐᥥᥐ ᥞᥩᥒᥳ ᥑᥣᥛᥰ ᥘᥢᥳ ᥐᥨᥝᥳ ᥘᥫᥒ，ᥔᥥᥒᥴ ᥑᥣᥛᥰ ᥛᥢᥰ ᥐᥦᥢᥱ ᥝᥣᥢᥴ ᥞᥧᥴ ᥘᥤ ᥗᥩᥛᥱ。ᥐᥩᥙ ᥛᥢᥰ ᥐᥥᥐ ᥞᥩᥒᥳ ᥑᥣᥛᥰ ᥖᥭᥰ，ᥐᥥᥐ ᥘᥩᥢᥳ ᥘᥤᥐ ᥟᥣ ᥛᥥᥝᥰ ᥖᥭᥰ，ᥙᥫ ᥘᥭᥴ，ᥟᥛᥱ ᥝᥣ ᥛᥢᥰ ᥞᥥᥖᥱ ᥐᥣᥢ ᥔᥒᥴ ，ᥖᥨᥝ ᥑᥭᥲ ᥞᥬᥲ ᥖᥒᥰ ᥘᥩᥒ ᥛᥢᥰ ᥐᥥᥐ ᥘᥢᥳ ᥓᥣᥙ ᥓᥣᥰ ᥓᥨᥝᥲ ᥐᥢ。ᥛᥢᥰ ᥖᥣᥢᥲ ᥝᥣ，ᥟᥛᥱ ᥝᥣ ᥞᥥᥖᥱ ᥐᥣᥢ ᥔᥒᥴ，ᥐᥩᥭᥰ ᥔᥧᥲ ᥘᥭᥲ ᥞᥩᥒᥳ ᥑᥣᥛᥰ ᥖᥭᥰ ᥓᥝᥱ ᥘᥤ ᥞᥝᥳ ，ᥞᥩᥒᥳ ᥑᥣᥛᥰ ᥘᥭᥳ ᥓᥝᥱ ᥙᥥᥢ ᥘᥩᥒ ᥟᥢ ᥐᥣᥒ ᥓᥬ ᥘᥬᥰ ᥑᥨᥝᥰ ᥛᥢᥰ ᥟᥢ ᥐᥥᥐ ᥞᥐ ᥖᥥᥳ ᥖᥥᥳ ᥝᥣ ᥝᥣ ᥘᥢᥳ ᥞᥝᥳ。ᥑᥣᥛᥰ ᥞᥩᥒᥳ ᥘᥭᥳ ᥐᥩᥲ ᥙᥥᥢ ᥛᥣᥱ ᥞᥦᥒᥰ ᥛᥥᥝᥰ ᥘᥫᥒ，ᥕᥣᥛᥰ ᥞᥝᥰ ᥓᥬ ᥔᥧᥐ ᥔᥣᥐ ᥛᥣᥰ ᥘᥢᥳ ᥓᥣᥒ ᥛᥨᥝᥴ ᥐᥥᥲ ᥘᥭᥲ ᥘᥩᥒ ᥑᥤᥴ ᥒᥝᥴ ᥞᥝᥳ ，ᥞᥬᥲ ᥞᥝᥰ ᥛᥤᥰ ᥔᥥᥛᥲ ᥞᥨᥝᥴ ᥛᥣᥭᥴ ᥓᥬ ᥓᥣᥛᥱ ᥑᥪᥢᥲ ᥑᥐ ᥕᥬᥰ ᥕᥬᥰ。