ᥑᥣᥛᥰ ᥐᥙᥴ ᥗᥧᥒᥴ ᥟᥣ ᥛᥥᥝᥰ ᥖᥭᥰ ―― ᥑᥣᥛᥰ ᥙᥦᥒᥰ ᥐᥧᥛ ᥖᥣᥢᥝ
ᥑᥣᥛᥰ ᥐᥙᥴ ᥗᥧᥒᥴ ᥟᥣ ᥛᥥᥝᥰ ᥖᥭᥰ ᥞᥝᥰ ᥙᥨᥝᥰ ᥛᥤᥰ ᥛᥣᥰ ᥓᥨᥝ ᥞᥪᥒᥴ ᥕᥣᥝᥰ ᥐᥛᥱ ᥚᥣᥱ, ᥐᥩᥭᥰ ᥝᥣ, ᥕᥣᥛᥰ ᥓᥒᥱ ᥘᥭᥳ , ᥛᥣᥢᥲ ᥛᥫᥒᥰ ᥑᥣᥐ ᥛᥥᥱ ᥞᥪᥒᥰ ᥗᥣᥰ ᥛᥣᥰ ᥐᥧ ᥙᥣᥲ ᥐᥧ ᥜᥣᥭᥱ ᥞᥥᥴ, ᥐᥨᥢᥰ ᥞᥝᥰ ᥐᥩᥭᥰ ᥛᥣᥒᥳ ᥑᥣᥴ ᥔᥨᥝᥴ ᥑᥣᥴ ᥒᥫᥢᥰ ᥐᥨᥝᥱ ᥛᥫ ᥐᥨᥝᥱ ᥝᥢᥰ, ᥘᥩᥒ ᥕᥥᥛᥲ ᥘᥤᥐ ᥔᥣᥢᥰ ᥘᥣᥭᥰ ᥞᥛᥳ ᥕᥩᥛᥰ ᥐᥣᥱ, ᥐᥨᥢᥰ ᥔᥣᥢᥰ ᥘᥤᥐ ᥔᥣᥢᥰ ᥘᥣᥭᥰ ᥟᥣ ᥛᥥᥝᥰ ᥖᥭᥰ ᥑᥦᥢᥰ ᥟᥥᥱ ᥐᥣᥱ。ᥐᥩᥙ ᥘᥭᥲ ᥔᥩᥢᥳ ᥚᥥᥴ ᥘᥤᥐ ᥑᥫᥐ ᥘᥣᥭᥰ ᥐᥣ ᥟᥣ ᥛᥥᥝᥰ ᥖᥭᥰ ᥞᥝᥰ, ᥞᥝᥰ ᥛᥣᥰ ᥞᥨᥝᥰ ᥚᥖᥴ ᥑᥣᥛᥰ ᥐᥙᥴ ᥗᥧᥐᥴ ᥓᥣᥭᥰ ᥛᥩᥐᥱ ᥑᥛᥰ ᥓᥨᥝᥱ ᥔᥣᥢᥰ ᥘᥢᥳ ᥞᥬᥲ ᥙᥤ ᥘᥩᥒᥳ ᥖᥒᥰ ᥘᥣᥭᥴ ᥗᥩᥛᥱ ᥑᥫᥰ ᥘᥫᥒ, ᥞᥬᥲ ᥘᥤᥐ ᥑᥫᥐ ᥘᥣᥭᥰ ᥐᥣ ᥟᥣ ᥛᥥᥝᥰ ᥖᥭᥰ ᥞᥝᥰ ᥘᥭᥲ ᥔᥪᥙ ᥔᥩᥢᥳ ᥐᥣᥱ ᥐᥢᥲ ᥘᥣᥲ ᥕᥬᥰ ᥕᥬᥰ。
《ᥑᥣᥛᥰ ᥙᥦᥒᥰ ᥐᥧᥛ ᥖᥣᥢᥝ》
ᥑᥣᥭᥰ ᥛᥩᥐᥱ ᥑᥛᥰ ᥓᥨᥝᥱ ᥔᥣᥢᥰ
ᥓᥣᥭᥰ ᥙᥫᥢ ᥔᥬᥴ ᥓᥒᥱ ᥛᥣᥰ ᥙᥦᥒᥰ
ᥘᥩᥒᥳ ᥛᥬᥰ ᥐᥧ ᥝᥢᥰ ᥘᥦᥒᥰ ᥔᥩᥢᥱ ᥓᥨᥝᥲ
ᥑᥨᥝᥲ ᥑᥣᥛᥰ ᥘᥩᥒᥳ ᥝᥣ ᥐᥦᥢᥱ ᥔᥐᥴ ᥘᥦᥒᥰ
ᥓᥣᥭᥰ ᥛᥬᥰ ᥓᥬ ᥙᥦᥒᥰ ᥘᥩᥒᥳ ᥟᥛᥱ ᥕᥩᥢᥱ
ᥔᥩᥢᥱ ᥓᥨᥝᥲ ᥙᥤ ᥐᥝ ᥖᥝᥲ ᥛᥣᥰ ᥗᥩᥒᥴ
ᥗᥢᥱ ᥞᥬᥲ ᥔᥩᥒᥴ ᥞᥣᥒ ᥘᥤ ᥚᥩᥒᥴ ᥘᥨᥢᥰ
ᥓᥣᥭᥰ ᥛᥬᥰ ᥕᥧᥱ ᥛᥫᥒᥰ ᥐᥨᥢᥰ ᥓᥒᥱ ᥙᥥᥝᥱ
ᥓᥥᥝᥱ ᥝᥣ ᥓᥣᥭᥰ ᥕᥣᥢᥴ ᥙᥥᥳ ᥛᥣᥰ ᥞᥪᥒᥴ
ᥘᥩᥒᥳ ᥓᥬ ᥗᥪᥒᥴ ᥓᥣᥭᥰ ᥖᥣ ᥙᥧᥰ ᥕᥩᥭᥳ
ᥘᥩᥭᥳ ᥓᥬ ᥐᥨᥝᥳ ᥘᥩᥒᥳ ᥙᥧᥰ ᥘᥪᥛᥰ ᥓᥣᥭᥰ
ᥙᥤ ᥓᥣᥭᥰ ᥝᥢᥰ ᥒᥣᥭᥰ ᥐᥦᥒᥱ ᥓᥬ ᥗᥪᥒᥴ
ᥞᥪᥒᥴ ᥑᥬ ᥓᥬ ᥞᥣᥰ ᥕᥒ ᥘᥪᥛᥰ ᥘᥭᥲ
ᥘᥩᥒᥳ ᥛᥬᥰ ᥓᥬ ᥐᥩᥭᥰ ᥑᥭᥲ ᥙᥦᥒᥰ ᥓᥣᥭᥰ
ᥒᥣᥭᥰ ᥛᥫᥢᥴ ᥘᥫᥢ ᥔᥬᥴ ᥖᥣᥒᥱ ᥘᥣᥝ ᥘᥦᥒᥰ
ᥐᥝ ᥓᥣᥭᥰ ᥔᥩᥢᥱ ᥖᥣᥒᥰ ᥙᥦᥒᥰ ᥐᥧ ᥛᥫ
ᥑᥫ ᥙᥥᥢ ᥟᥩᥢ ᥖᥣᥒᥰ ᥕᥒ ᥞᥩᥢᥱ ᥘᥪᥛᥰ
ᥑᥣᥛᥰ ᥓᥣᥭᥰ ᥘᥩᥒᥳ ᥖᥩᥒᥰ ᥐᥪᥛᥰ ᥔᥬᥱ ᥓᥬ
ᥛᥬ ᥑᥥᥝᥴ ᥙᥥᥝᥴ ᥗᥣᥰ ᥔᥩᥒᥴ ᥞᥣᥰ ᥞᥐ
ᥖᥣᥒᥰ ᥙᥦᥒᥰ ᥑᥩᥖᥱ ᥖᥐ ᥕᥒ ᥟᥩᥢᥱ ᥑᥪᥢᥰ