ᥐᥛᥰ ᥘᥭᥳ ᥑᥤᥒᥰ ᥞᥣᥰ ᥖᥐᥴ ᥛᥣᥰ ᥙᥦᥰ ᥘᥥᥴ ᥚᥥᥴ ᥙᥢ ᥟᥢ ᥝᥣ ᥚᥧᥰ ᥓᥫᥒᥰ ᥛᥫᥒᥰ ᥞᥝᥰ ᥛᥫ ᥞᥪᥒᥴ ᥕᥣᥝᥰ ᥐᥛᥱ ᥜᥣᥱ ᥘᥢᥳ ᥘᥩᥰ,ᥞᥬᥲ ᥛᥢᥰ ᥙᥨᥝᥰ ᥐᥣᥱ ᥛᥫᥢᥴ ᥙᥫᥒ ᥕᥫᥒ ᥘᥒᥱ ᥖᥥᥢᥰ ᥔᥩᥒᥱ ᥗᥩᥒᥱ ᥖᥭᥲ ᥜᥭᥰ ᥔᥩᥖᥱ ᥐᥭᥲ ᥞᥫ ᥞᥧᥒ ᥘᥦᥒᥰ ᥐᥣᥱ ᥐᥧ ᥞᥧᥰ ᥐᥢ ᥘᥦᥰ.ᥗᥩᥛᥱ ᥘᥤ ᥘᥤ ᥘᥣ ᥝᥣ ᥖᥤ ᥔᥣᥝᥴ ᥛᥣᥝᥱ ᥙᥣᥢ ᥗᥣᥝᥱ ᥘᥥᥐ ᥘᥧᥛᥱ ᥗᥝᥲ ᥔᥣᥛᥴ ᥙᥣᥢ ᥜᥧᥒᥴ ᥛᥧᥱ ᥗᥒᥰ ᥘᥣᥭᥴ ᥑᥦᥢᥰ ᥞᥬᥲ ᥔᥩᥒᥴ ᥞᥧᥴ ᥖᥧᥒᥰ ᥐᥛᥰ ᥑᥣᥛᥰ ᥑᥣᥛᥰ ᥘᥣᥭᥴ ᥗᥢᥴ ᥘᥩᥒ ᥖᥣᥒᥰ ᥞᥥᥖᥱ ᥑᥢᥴ ᥚᥣᥭᥴ ᥛᥣᥖ ᥛᥢᥲ ᥘᥤ ᥕᥝᥳ.ᥔᥦᥒᥴ ᥙᥥᥝᥱ ᥐᥣᥒ ᥞᥫᥭᥰ ᥟᥢ ᥝᥣ ᥑᥧᥢᥴ ᥔᥣᥛᥴ ᥖᥒᥰ ᥘᥣᥒᥰ ᥞᥐᥳ ᥞᥩᥛᥴ ᥑᥣᥒᥰ ᥟᥨᥝᥲ ᥙᥥᥛᥱ ᥘᥢᥳ ᥘᥩᥰ,ᥕᥒᥰ ᥟᥢ ᥖᥫᥰ ᥖᥣᥒᥱ ᥔᥬᥴ ᥓᥣᥒᥱ ᥓᥤᥒᥱ ᥓᥦᥖ ᥛᥩᥐᥱ ᥛᥦᥖ ᥞᥩᥛᥴ ᥖᥨᥐᥱ ᥑᥝᥲ ᥐᥧ ᥖᥤ ᥕᥒ ᥟᥤᥛᥱ ᥐᥨᥢᥰ ᥕᥨᥝᥰ ᥖᥥᥳ ᥘᥩᥰ.ᥞᥩᥛᥴ ᥛᥩᥐᥱ ᥑᥨᥝᥲ ᥑᥣᥛᥰ ᥘᥤ ᥞᥫᥭᥰ ᥙᥝᥱ ᥘᥭᥳ ᥞᥬᥲ ᥛᥢᥰ ᥛᥫᥢᥴ ᥙᥫᥒ ᥕᥫᥒ ᥘᥒᥱ ᥚᥥᥒᥰ ᥛᥩᥐᥱ ᥑᥨᥝᥲ ᥓᥒᥱ ᥐᥤ ᥞᥩᥛᥴ ᥑᥦᥢᥱ ᥓᥩᥛᥰ ᥘᥨᥛᥰ,ᥞᥬᥲ ᥛᥢᥰ ᥞᥩᥛᥴ ᥐᥩᥒᥴ ᥞᥩᥛᥴ ᥐᥨᥝᥰ ᥕᥨᥝᥰ ᥕᥨᥒᥴ ᥐᥨᥒ ᥖᥨᥝ ᥞᥨᥝᥴ ᥓᥬ ᥐᥨᥢᥰ ᥞᥝᥰ ᥜᥬᥱ ᥙᥦᥒᥰ ᥓᥨᥛᥰ ᥐᥧ ᥚᥧᥱ ᥐᥢ ᥘᥦᥰ.