Wp/syl/ꠚꠤꠑꠣ

ꠚꠤꠑꠣ (ꠛꠣꠋꠟꠣ: পিঠা) ꠅꠁꠟ ꠄꠈꠎꠣꠔ ꠈꠣꠘꠤꠞ ꠎꠤꠘꠤꠡ ꠎꠦꠈꠐꠣ ꠛꠣꠘꠣꠘꠤ ꠅꠄ, ꠍꠣꠃꠟꠞ ꠉꠥꠠꠣ, ꠀꠐꠣ, ꠝꠄꠖꠣ ꠀꠞꠅ ꠘꠣꠘꠣꠘꠎꠣꠔ ꠎꠤꠘꠤꠡ ꠖꠤꠀ⁕ ꠎꠣꠉꠣꠞ ꠛꠦꠡꠈꠝꠦ ꠚꠤꠑꠣꠞ ꠎꠣꠔꠧ ꠛꠦꠡꠈꠝ ꠅꠄ⁕ ꠍꠤꠟꠐꠡꠢ ꠛꠣꠋꠟꠣꠖꠦꠡ ꠀꠞ ꠜꠣꠞꠔꠞ ꠅꠘꠦꠈ ꠎꠣꠉꠣꠔ ꠚꠤꠑꠣ ꠚꠣꠅꠀ ꠎꠣꠄ, ꠎꠖꠤꠅ ꠛꠦꠡꠤꠞꠜꠣꠉ ꠍꠤꠟꠐꠤ ꠚꠤꠑꠣ ꠀꠞ ꠛꠣꠇꠤꠎꠣꠉꠣꠞ ꠚꠤꠑꠣꠞ ꠇꠥꠘꠧ ꠝꠤꠟ ꠘꠣꠁ⁕ ꠉꠣꠃꠀꠟꠤꠔ ꠘꠄꠀ ꠗꠣꠘ ꠔꠥꠟꠣꠞ ꠛꠣꠖꠦ ꠚꠤꠑꠣ ꠛꠣꠘꠣꠘꠤꠞ ꠗꠥꠝ ꠚꠠꠦ, ꠡꠤꠔꠞ ꠡꠝꠄ ꠚꠤꠑꠣ ꠛꠣꠘꠣꠘꠤ ꠅꠄ ꠈꠥꠛ ꠛꠦꠡ, ꠀꠞ ꠖꠥꠁ ꠁꠖꠧꠅ ꠁꠖꠞ ꠀꠉꠦ ꠚꠤꠑꠣ ꠛꠣꠘꠣꠘꠤ ꠅꠄ, ꠛꠤꠡꠦꠡ ꠈꠞꠤ ꠇꠥꠞꠛꠣꠘꠤ ꠁꠖꠧ ꠞꠥꠐꠤ ꠚꠤꠑꠣ ꠛꠣꠘꠣꠘꠤ ꠅꠄ⁕ ꠚꠤꠐꠣ ꠢꠞꠢꠣꠝꠦꠡꠣ ꠝꠤꠐꠣ ꠅꠁꠟꠦꠅ ꠏꠣꠟ, ꠐꠦꠋꠉꠣ ꠛꠣ ꠀꠞꠧꠅ ꠎꠦꠍꠣꠎꠣꠔ ꠡꠣꠖꠞ ꠚꠤꠑꠣ ꠅꠄ⁕

ꠛꠣꠘꠣꠘꠤ

ꠚꠤꠑꠣ ꠝꠥꠟꠔ ꠍꠣꠃꠟꠞ ꠉꠥꠠꠤ ꠛꠣ ꠝꠄꠖꠣ ꠖꠤ ꠛꠣꠘꠣꠘꠤ ꠅꠄ, ꠚꠤꠑꠣꠞꠦ ꠎꠦꠍꠣ ꠄꠈ ꠘꠈꠡꠣ ꠖꠦꠅꠀ ꠅꠄ, ꠇꠥꠘꠐꠣꠞ ꠜꠤꠔꠞꠦ ꠝꠤꠑꠣ ꠘꠣꠄ ꠜꠣꠎꠤ ꠒꠥꠇꠣꠘꠤ ꠅꠄ⁕ ꠝꠤꠑꠣ ꠚꠤꠑꠣꠔ ꠝꠥꠟꠔ ꠘꠣꠁꠇꠟ ꠖꠦꠅꠀ ꠅꠄ, ꠀꠞ ꠏꠣꠟ ꠚꠤꠑꠣꠔ ꠀꠟꠥ, ꠈꠛꠤ, ꠍꠣꠘꠣ, ꠝꠣꠋꠡꠞ ꠜꠣꠎꠤ ꠖꠦꠅꠀ ꠅꠄ⁕ ꠚꠤꠑꠣꠞ ꠃꠚꠞꠦ ꠘꠤꠞ꠆ꠜꠞ ꠈꠞꠦ ꠁꠇꠐꠣ ꠔꠦꠟꠧ ꠜꠣꠎꠣ ꠅꠁꠔ ꠘꠣ, ꠢꠥꠇꠘꠣ ꠜꠣꠎꠣ ꠅꠁꠔ, ꠘꠣ ꠡꠤꠖ꠆ꠗꠧ ꠖꠦꠅꠀ ꠅꠁꠔ ꠘꠣ ꠚꠥꠠꠣꠘꠤ ꠅꠁꠔ⁕

ꠚꠤꠑꠣ ꠡꠈꠣꠟꠇꠥꠞ ꠘꠣꠍꠔꠣꠔ ꠈꠣꠅꠀ ꠅꠄ, ꠛꠤꠇꠣꠟꠦ ꠛꠣ ꠢꠣꠘꠎꠣꠛꠣꠟꠣꠞ ꠘꠣꠍꠔꠣꠔ ꠅ ꠈꠣꠅꠀ ꠅꠄ⁕

ꠚꠤꠑꠣꠞ ꠎꠣꠔ

ꠝꠤꠐꠣ ꠚꠤꠑꠣ

• ꠜꠣꠚꠣ ꠚꠤꠑꠣ/ ꠜꠈꠣ ꠚꠤꠑꠣ
• ꠚꠛ
• ꠢꠣꠘ꠆ꠖꠦꠡ
• ꠛꠥꠟꠛꠥꠟꠣ
• ꠙꠣꠐꠤꠡꠣꠙꠐꠣ

ꠡꠣꠖꠣꠡꠤꠖꠣ ꠚꠤꠑꠣ

• ꠞꠥꠐꠤ
• ꠝꠦꠠꠣ ꠚꠤꠑꠣ
• ꠍꠤꠔꠁ ꠚꠤꠑꠣ
• ꠘꠈꠡꠤ ꠚꠤꠑꠣ
• ꠍꠥꠋꠉꠣ ꠚꠥꠠꠣ/ ꠍꠥꠋꠉꠣ ꠚꠤꠑꠣ

ꠏꠣꠟ ꠚꠤꠑꠣ

• ꠘꠥꠘꠉꠠꠣ/ ꠘꠥꠘꠞꠛꠠꠣ/ ꠝꠡꠟꠣꠞ ꠢꠣꠘ꠆ꠖꠦꠡ
• ꠡꠤꠋꠉꠣꠠꠣ