ꠚꠣꠘꠤ ꠛꠣ ꠎꠟ (ꠀꠞ ꠘꠣꠝ: ꠛꠣꠞꠤ, ꠀꠛ) ꠅꠁꠟꠧ ꠄꠉꠥ ꠅꠎꠂꠛ, ꠚꠘ, ꠡꠣꠖꠢꠤꠘ, ꠉꠘ꠆ꠗꠢꠤꠘ ꠀꠞ ꠙꠦꠞꠣꠄ ꠛꠞ꠆ꠘꠢꠤꠘ ꠄꠈꠐꠣ ꠞꠣꠡꠣꠄꠘꠤꠇ ꠚꠖꠣꠞ꠆ꠕ, ꠎꠦꠈꠐꠣ ꠙꠤꠕꠤꠛꠤꠞ ꠛꠣꠞꠤꠝꠘ꠆ꠒꠟꠞ ꠀꠞ ꠎꠦ ꠇꠥꠘꠥ ꠎꠤꠛ-ꠇꠥꠡ ꠛꠣ ꠃꠖ꠆ꠜꠤꠖ-ꠇꠥꠡꠞ ꠄꠉꠥ ꠝꠥꠟ ꠃꠚꠣꠖꠣꠘ ⁕
ꠎꠟ ꠛꠣ ꠚꠣꠘꠤꠞ ꠞꠣꠡꠣꠄꠘꠤꠇ ꠡꠋꠇꠦꠔ ꠅꠁꠟꠧ H2O ⁕ ꠁꠃꠙꠦꠇ (IUPAC) ꠘꠤꠅꠝ ꠀꠘꠝꠣꠘ ꠚꠣꠘꠤꠞ ꠞꠣꠡꠣꠄꠘꠤꠇ ꠘꠣꠝ ꠒꠣꠁ-ꠢꠣꠁꠒ꠆ꠞꠥꠎꠦꠘ ꠝꠘꠧ-ꠅꠇ꠆ꠍꠣꠁꠒ ⁕ ꠝꠣꠘꠦ ꠎꠟ ꠛꠣ ꠚꠣꠘꠤꠞ ꠄꠈꠦꠈꠐꠣ ꠅꠘꠥ ꠄꠈꠦꠈꠐꠣ ꠅꠇ꠆ꠍꠤꠎꠦꠘ ꠙꠞꠝꠣꠘꠥ ꠀꠞ ꠖꠥꠁꠐꠣ ꠢꠣꠁꠒ꠆ꠞꠧꠎꠦꠘ ꠙꠞꠝꠣꠘꠥꠞ ꠡꠝꠎꠥꠎꠤ ꠛꠘ꠆ꠗꠘꠦ ꠉꠑꠤꠔ ⁕ ꠁ H2O ꠎꠃꠉꠧꠉꠥꠞ ꠄꠈꠣꠘ ꠝꠥꠟ ꠛꠂꠡꠤꠡ꠆ꠐ ꠅꠁꠟ - ꠅꠚꠦꠇ꠆ꠇꠣꠇ꠆ꠞꠤꠔ ꠔꠥꠠꠣ ꠔꠣꠚꠝꠣꠔ꠆ꠞꠣꠞ ꠝꠣꠏꠦ ꠄꠞ ꠔꠤꠘꠈꠣꠘ ꠛꠤꠜꠤꠘ꠆ꠘ ꠖꠡꠣ— ꠒꠣꠐ꠆ꠐꠣ, ꠎꠟꠥꠀ ꠀꠞ ꠚꠣꠚꠠꠣ ꠜꠣꠛ ꠖꠦꠈꠣ ꠎꠣꠄ ⁕ ꠢꠣꠁꠒ꠆ꠞꠧꠎꠦꠘ ꠙꠞꠝꠣꠘꠥ 104.45° ꠇꠥꠘꠦ ꠅꠇ꠆ꠍꠤꠎꠦꠘ ꠙꠞꠝꠣꠘꠥꠞ ꠟꠉꠦ ꠡꠋꠎꠥꠇ꠆ꠔ ꠕꠣꠈꠦ ⁕ ꠛꠣꠁꠃꠝꠘ꠆ꠒꠟꠤꠅ ꠌꠣꠙꠦ ০°–১০০° ꠍꠦꠟꠍꠤꠀꠍ ꠔꠣꠚꠝꠣꠔ꠆ꠞꠣꠞ ꠝꠣꠏꠦ H2O ꠔꠞꠟ ꠛꠣ ꠎꠂꠟꠡꠣ ꠖꠡꠣꠔ ꠕꠣꠈꠦ— ꠅꠃ ꠔꠞꠟ H2O-ꠞꠦ ꠃ ꠀꠝꠞꠣ ꠚꠣꠘꠤ ꠈꠁ ⁕ ০° ꠍꠦꠟꠍꠤꠀꠍ ꠔꠣꠚꠝꠣꠔ꠆ꠞꠣꠔ ꠎꠟ ꠛꠣ ꠚꠣꠘꠤ ꠎꠝꠤꠀ ꠒꠣꠐ꠆ꠐꠣ ꠛꠞꠚꠦ ꠚꠞꠤꠘꠔ ꠅꠄ ꠀꠞ ১০০° ꠍꠦꠟꠍꠤꠀꠍꠧ ꠚꠣꠘꠤ ꠚꠣꠚꠠꠣ ꠅꠛꠍ꠆ꠕꠣꠄ ꠚꠣꠘꠤꠞꠚꠣꠚꠦ ꠚꠞꠤꠘꠔ ꠅꠄ ⁕ ꠄꠞꠖꠣꠄ ০° ꠍꠦꠟꠍꠤꠀꠍꠞꠦ ꠈꠀ ꠅꠄ ꠚꠣꠘꠤꠞ ꠉꠟꠘꠣꠋꠇ ꠀꠞ ১০০° ꠍꠦꠟꠍꠤꠀꠍꠞꠦ ꠈꠀ ꠅꠀ ꠚꠣꠘꠤꠞ ꠚꠥꠐꠘꠣꠋꠇ ⁕