ꠍꠤꠟꠐꠤ ꠞꠣꠘꠗꠣꠛꠣꠠꠣ ꠝꠥꠟꠔ ꠍꠤꠟꠐꠤꠘ꠆ꠔꠞ ꠈꠣꠘꠤꠞ ꠞꠥꠍꠝꠞꠦ ꠔꠥꠟꠤꠀ ꠗꠞꠦ, ꠎꠣꠞ ꠝꠣꠏꠦ ꠝꠡꠟꠣꠖꠣꠞ ꠝꠥꠞꠉꠤꠞ ꠐꠤꠇ꠆ꠇꠣ ꠝꠡꠟꠣ ꠔꠘꠦ ꠡꠥꠞꠥ ꠈꠞꠤ ꠐꠦꠋꠉꠣ ꠎꠣꠔꠞ ꠢꠣꠔꠈꠞꠣ, ꠘꠥꠘꠞ ꠛꠠꠣ ꠔꠘꠦ ꠡꠥꠞꠥ ꠈꠞꠤ ꠝꠤꠐꠣꠎꠣꠔꠞ ꠔꠥꠡꠣ ꠡꠤꠘ꠆ꠘꠤ ꠀꠞ ꠢꠥꠐꠇꠤ ꠡꠤꠞꠣ ꠞꠁꠍꠦ ⁕ ꠍꠤꠟꠐꠤ ꠞꠣꠘꠗꠣꠡꠂꠟꠤꠔ ꠢꠣꠔꠈꠞꠣ ꠄꠉꠥ ꠡꠣꠗꠣꠞꠘ ꠚꠖ ꠎꠦꠉꠥ ꠝꠣꠍ ꠀꠞ ꠝꠣꠋꠡꠞ ꠟꠉꠦ ꠘꠣꠘꠣꠘ ꠈꠣꠘꠤ ꠚꠣꠈꠣꠘꠤꠔ ꠛꠦꠛꠀꠞ ꠅꠄ ⁕ ꠜꠤꠐꠣꠝꠤꠘ ꠍꠤ ꠀꠞ ꠄꠘ꠆ꠐꠤꠅꠇ꠆ꠍꠤꠒꠦꠘ꠆ꠐ ꠡꠝ꠆ꠞꠤꠖ꠆ꠗ ꠢꠣꠔꠈꠞꠣ ꠍꠣꠟꠘ, ꠜꠣꠔ ꠖꠤ ꠈꠣꠁꠔꠦ ꠡꠛꠍꠦ ꠛꠣꠟꠣ ꠟꠣꠉꠦ ⁕ ꠍꠤꠟꠐꠤꠘ ꠝꠥꠟꠔ ꠜꠣꠔ ꠀꠞ ꠝꠣꠍ ꠈꠣꠁꠀ ꠕꠣꠈꠟꠦꠅ ꠔꠣꠞꠣꠞ ꠞꠘ꠆ꠗꠘꠡꠂꠟꠤ ꠘꠘ-ꠍꠤꠟꠐꠤꠘ꠆ꠔꠞ ꠔꠘꠦ ꠛꠃꠔ ꠀꠟꠣꠖꠣ ⁕ ꠍꠤꠟꠐꠤ ꠞꠣꠘ꠆ꠗꠣꠔ ꠎꠦꠟꠣꠘ ꠔꠦꠟ ꠍꠣꠠꠣ ꠍꠣꠟꠘ ꠞꠁꠍꠦ, ꠅꠟꠣꠘ ꠙ꠆ꠞꠌꠥꠞ ꠐꠦꠋꠉꠣ ꠡꠣꠖꠞ ꠍꠣꠟꠘꠧ ꠞꠁꠍꠦ ⁕ ꠛꠞꠣꠇ ꠚꠣꠠ ꠕꠣꠇꠤ ꠡꠥꠞꠝꠣ ꠚꠣꠠꠞ ꠘꠣꠘꠣꠘ ꠞꠥꠍꠝꠞ ꠝꠣꠘꠥꠡ ꠀꠞ ꠍꠤꠟꠐꠤ ꠙ꠆ꠞꠛꠣꠡꠤ ꠅꠈꠟꠦ ꠎꠥꠉꠎꠥꠉ ꠗꠞꠤ ꠙ꠆ꠞꠌꠟꠤꠔ ꠍꠤꠟꠐꠤ ꠈꠣꠘꠤ ꠀꠞ ꠝꠎꠣꠞꠦ ꠙ꠆ꠞꠜꠣꠛꠤꠔ ꠈꠞꠍꠦ ⁕ ꠄꠞꠝꠣꠏꠦ ꠈꠣꠡꠤꠀ, ꠇꠥꠇꠤ ꠀꠞ ꠜꠤꠘꠎꠣꠔꠤ ꠝꠣꠘ꠆ꠡꠞ ꠞꠘ꠆ꠗꠘꠡꠂꠟꠤ ꠟꠇ꠆ꠇꠘꠤꠅ ⁕ ꠁ ꠅꠘ꠆ꠌꠟꠧ ꠚꠣꠅꠀ ꠢꠣꠉꠚꠣꠔꠣ ꠀꠞ ꠎꠘ꠆ꠔꠥ ꠎꠣꠘꠥꠀꠞꠞ ꠃꠚꠞ ꠘꠤꠞ꠆ꠜꠞ ꠈꠞꠤꠀ ꠍꠤꠟꠐꠤ ꠞꠘ꠆ꠗꠘꠡꠂꠟꠤ ꠡꠝ꠆ꠞꠤꠖ꠆ꠖ ꠅꠁꠍꠦ ⁕ ꠝꠥꠟꠔ ꠖꠦꠡꠤꠅ ꠔꠥꠠꠣ ꠛꠂꠌꠤꠔ꠆ꠞ ꠡꠁꠔꠦ, ꠍꠤꠟꠐꠤꠘ꠆ꠔꠞ ꠈꠣꠁꠖ꠆ꠖ ꠡꠋꠁꠍꠇ꠆ꠞꠤꠔꠤ ꠚꠞꠤꠛꠦꠡꠤꠔ ꠅꠄ ꠎꠦꠘꠧ ꠇꠤꠍꠥ ꠛꠣꠞꠈꠣꠘꠞ ꠀꠍꠞ ꠅ ꠞꠁꠍꠦ ⁕ ꠡꠣꠢ ꠎꠣꠟꠣꠟꠞ ৩৬০ꠎꠘ ꠡꠚꠞ ꠡꠋꠉꠤ ꠁ ꠄꠟꠣꠇꠣꠔ ꠈꠣꠟꠤ ꠔꠣꠘꠔꠣꠘꠞ ꠛꠤꠌꠤꠔ꠆ꠞ ꠡꠋꠁꠍꠇ꠆ꠞꠤꠔꠤ ꠟꠂꠀ ꠀꠁꠍ꠆ꠟꠣ ꠘꠣ, ꠟꠉꠦ ꠔꠣꠞꠣꠞ ꠘꠤꠎꠡ꠆ꠡ ꠞꠣꠘ꠆ꠖꠣꠞ ꠡꠔꠘ꠆ꠔ꠆ꠞ ꠗꠞꠘꠅ ꠟꠂꠀ ꠀꠁꠍ꠆ꠟꠣ ⁕ ꠎꠣꠞꠝꠣꠏꠦ ꠝꠥꠞꠉꠤ, ꠉꠞꠥꠞ ꠉꠥꠍ꠆ꠔ ꠀꠞ ꠛꠈꠞꠤ ꠖꠤꠀ ꠚꠣꠇ ꠈꠞꠣ ꠝꠥꠊꠟ, ꠝꠂꠖ꠆ꠖ-ꠙ꠆ꠞꠣꠌ꠆ꠌ ꠀꠞ ꠃꠔ꠆ꠔꠞ ꠜꠣꠞꠔꠤꠅ ꠡꠂꠟꠤꠞ ꠛꠃꠔ ꠉꠥꠍ꠆ꠔꠞ ꠈꠣꠘꠤ ꠀꠍꠦ ⁕ ꠝꠥꠊꠟꠣꠁ ꠚꠞꠐꠣ, ꠚꠥꠟꠣꠅ, ꠇꠥꠞꠝꠣ, ꠇꠣꠟꠤꠀ, ꠞꠥꠡ꠆ꠐ, ꠛꠤꠞꠣꠘꠤ ꠀꠞ ꠇꠥꠚꠔꠣ ꠍꠣꠟꠘ ꠢꠤꠡꠣꠛꠦ, ꠀꠞ ꠎꠞꠖꠣ, ꠚꠤꠞꠘꠤ ꠀꠞ ꠙꠣꠄꠡ ꠝꠤꠐꠣ ꠢꠤꠡꠣꠛꠦ ꠢꠣꠝꠣꠁꠍꠦ ⁕
