ꠉꠞꠝ ꠈꠣꠟ ꠅꠁꠟꠧ ꠉꠤ ꠛꠞꠍꠞ ꠢꠈꠟ ꠔꠘꠦ ꠔꠣꠔꠣꠚꠥꠠꠣ ꠝꠃꠡꠥꠝ, ꠎꠦꠉꠥ ꠙ꠆ꠞꠤꠕꠤꠛꠤꠞ ꠃꠔ꠆ꠔꠞ ꠉꠥꠟ-ꠀꠖꠟꠣꠔ ꠡꠣꠗꠣꠞꠘꠔ ꠎꠥꠘ, ꠎꠥꠟꠣꠁ ꠀꠞ ꠀꠉꠡ꠆ꠐ ꠎꠥꠠꠤꠀ ꠕꠣꠈꠦ ⁕ ꠙ꠆ꠞꠤꠕꠤꠛꠤꠞ ꠇꠥꠟꠟꠦꠉꠣꠄ ꠉꠞꠝ ꠈꠣꠟ ꠅꠁꠟꠧ ꠈꠣꠝꠈꠣꠎꠞ ꠡꠝꠄ ⁕ ꠛꠤꠡꠦꠡ ꠈꠞꠤ ꠡꠤꠔꠙ꠆ꠞꠗꠣꠘ ꠖꠦꠡꠉꠥꠁꠘ꠆ꠔꠧ ꠉꠞꠝ ꠝꠃꠡꠥꠝ ꠎꠦ ꠈꠖꠞꠣꠟꠣ, ꠈꠣꠞꠘ ꠢꠤꠔꠣ ꠖꠦꠡ ꠅꠈꠟꠧ ꠡꠤꠔꠈꠣꠟꠧ ꠇꠥꠘꠥ ꠚꠄ-ꠚꠡꠟ ꠚꠟꠦ ꠘꠣ, ꠉꠞꠝꠞ ꠖꠤꠘꠃ ꠡꠛ ꠚꠡꠟꠣꠁꠘ ꠃꠔ꠆ꠚꠣꠖꠘ ꠈꠞꠤ ꠞꠣꠈꠣ ꠟꠣꠉꠦ ⁕
ꠍꠤꠟꠐꠤ ꠚꠣꠘꠎꠤ ꠀꠘꠝꠣꠘ ꠚꠁꠟ ꠖꠥꠁ ꠝꠣꠡ ꠛꠂꠡꠣꠉ ꠀꠞ ꠎꠂꠑ ꠎꠥꠠꠤꠀ ꠉꠞꠝꠞ ꠖꠤꠘ ⁕ ꠁꠡꠝꠇꠥ ꠡꠥꠞ꠆ꠎꠞ ꠔꠣꠔꠣꠚꠥꠠꠣ ꠞꠂꠖꠦ ꠃꠔ꠆ꠔꠚ꠆ꠔ ꠅꠁꠎꠣꠄ ꠎꠝꠤꠘ, ꠚꠣꠘꠤ ꠢꠥꠇꠤꠁ ꠎꠣꠄ, ꠁꠡꠛꠞꠤ ꠉꠣꠋꠉꠣꠁꠘ ꠘꠣꠁꠛ꠆ꠛꠔꠣ ꠀꠞꠣꠄ, ꠚꠣꠘꠤꠢꠤꠘ ꠝꠣꠐꠤꠔ ꠚꠣꠐꠣ ꠗꠞꠤꠟꠣꠄ ⁕ ꠉꠞꠝꠞ ꠖꠤꠘꠞ ꠢꠦꠡꠣꠖꠞꠣ ꠛꠣꠄ ꠡꠥꠞꠥ ꠅꠄ ꠈꠣꠟꠛꠂꠡꠣꠉꠤ ꠔꠥꠚꠣꠘ ⁕ ꠖꠇ꠆ꠇꠤꠘ ꠄꠡꠤꠀꠞ ꠖꠦꠡꠣꠘꠔꠧ ꠁ ꠛꠣꠟꠣ ꠉꠣꠍꠦꠉꠣꠍꠦ ꠘꠣꠘꠣꠘ ꠝꠃꠡꠥꠝꠤ ꠚꠟ ꠖꠦꠈꠣ ꠎꠣꠄ, ꠎꠦꠟꠣꠘ: ꠀꠝ, ꠈꠣꠑꠟ, ꠟꠦꠍꠥ, ꠅꠔꠣꠁꠘ ⁕ ꠍꠤꠟꠐꠤ ꠚꠣꠘꠎꠤ ꠀꠘꠝꠣꠘ ꠄꠞ ꠛꠣꠖꠞ ꠝꠃꠡꠥꠝ ꠅꠁꠟꠧ ꠛꠣꠞꠤꠡꠣ ⁕ ꠢꠦꠛꠟꠣꠇꠥ ꠈꠦꠍꠤꠀ ꠏꠠꠤ ꠀꠞꠝ꠆ꠜ ꠅꠁꠉꠦꠟꠦ ꠉꠞꠝ ꠈꠣꠟꠤꠘ ꠡꠛ ꠛꠦꠔꠣꠁꠀ ꠚꠣꠚꠣꠘꠤ ꠔꠘꠦ ꠝꠣꠘꠡꠦ ꠀꠍꠣꠘ ꠚꠣꠄ ⁕