Wp/syl/ꠀꠈꠣꠟꠥꠇꠤ ꠀꠅꠠ
ꠀꠈꠣꠟꠥꠇꠤ ꠀꠅꠞ /axaluki aɔɾ/ ꠛꠣꠋꠟꠣꠖꠦꠡꠞ ꠡꠛꠔꠘꠦ ꠛꠠ ꠀꠅꠞ ⁕ ꠁꠇꠐꠣ ꠄꠡꠤꠀꠞ ꠅꠁꠘ꠆ꠘꠔꠝ ꠄꠈꠐꠣ ꠝꠤꠓꠣꠚꠣꠘꠤꠞ ꠉꠣꠠꠣ ⁕ ꠄꠞ ꠀꠅꠔꠘ ১৮ ꠨১১৫ ꠢꠦꠇ꠆ꠐꠞ ꠨ ꠔꠣꠞ ꠝꠣꠏꠦ ꠈꠣꠟꠤ ꠛꠤꠟꠞ ꠀꠅꠔꠘ ৪ ꠨৪০০ ꠢꠦꠇ꠆ꠐꠞ ⁕ ꠁꠇꠐꠣ ꠝꠥꠟꠁꠛꠣꠎꠣꠞ ꠎꠦꠟꠣꠞ ꠛꠠꠟꠦꠈꠣ (৪০%) ꠨ ꠇꠥꠟꠣꠃꠠꠣ (৩০%) ꠨ ꠀꠞ ꠍꠤꠟꠐ ꠎꠦꠟꠣꠞ ꠚꠦꠍꠥꠉꠁꠘ꠆ꠎ (১৫%) ꠨ ꠉꠥꠟꠣꠚꠉꠁꠘ꠆ꠎ (১০%) ꠅ ꠛꠤꠀꠘꠤꠛꠣꠎꠣꠞ (৫%) ꠎꠥꠞꠤꠀ ꠀꠍꠦ ⁕ ꠜꠥꠔꠣꠔ꠆ꠔꠤꠇꠜꠣꠛꠦ ꠁꠇꠐꠣꠞ ꠃꠔꠞꠦꠖꠤ ꠜꠣꠞꠔꠞ ꠝꠦꠊꠣꠟꠄ ꠚꠣꠢꠣꠠ ꠅ ꠙꠥꠛꠦꠖꠤ ꠔ꠆ꠞꠤꠙꠥꠞꠣ ꠚꠣꠢꠣꠠꠞ ꠚꠣꠞꠅ ⁕ ꠜꠥꠔꠣꠔ꠆ꠔꠤꠇ ꠛꠂꠡꠤꠡ꠆ꠐꠞ ꠟꠣꠉꠤ ꠃꠎꠣꠘ ꠛꠃꠔ ꠚꠣꠢꠣꠠ ꠔꠣꠈꠣꠄ ꠀꠈꠣꠟꠥꠇꠤ ꠀꠅꠞꠅ ꠙ꠆ꠞꠣꠄ ꠙꠞ꠆ꠔꠦꠈ ꠛꠍꠞ ꠀꠈꠔꠣ ꠚꠣꠘꠤ ꠅꠁꠎꠣꠄ ⁕ ꠁ ꠀꠅꠞ ৮০-৯০ꠐꠣ ꠢꠥꠞꠥ ꠨ ꠛꠠ ꠀꠞ ꠝꠣꠏꠣꠞꠤ ꠛꠤꠟ ꠀꠍꠦ ⁕ ꠡꠤꠔ ꠁꠔꠣ ꠛꠤꠟ ꠅꠈꠟ ꠛꠤꠖꠦꠡꠤ ꠚꠣꠇꠤꠘ ꠀꠁꠀ ꠜꠞꠤ ꠎꠣꠄ ⁕
| ꠍꠛꠤ |  |
|---|---|
| ꠎꠦ ꠎꠤꠘꠤꠡꠞ | wetland |
| ꠘꠣꠝ | ꠀꠈꠣꠟꠥꠇꠤ ꠀꠅꠠ |
| ꠖꠦꠡ | Bangladesh |
| ꠎꠦꠉꠣꠞ ꠔꠁꠔ꠆ꠔ | 24°42′0″N 92°5′0″E |
| P1435 | Ramsar site |
| ꠙꠣꠔꠣꠞ ꠛꠦꠘꠣꠞ |  |
| ꠇꠝꠘ꠆ꠔꠣꠔ ꠍꠛꠤꠘ | Hakaluki Haor |
| P4254 | হাকালুকি_হাওর |
| ꠚꠤꠞꠤꠛꠦꠁꠍ ꠀꠁꠒꠤ | /m/03d6fnf |
ꠀꠈꠣꠟꠥꠇꠤꠞ ꠔꠥꠞꠣ ꠔꠂꠔ꠆ꠔ
editꠛꠣꠞꠤꠡꠣ ꠀꠞ ꠡꠤꠔ ꠨ ꠖꠄꠅ ꠝꠃꠡꠥꠝ ꠍꠤꠟꠐ ꠛꠦꠠꠣꠘꠤꠞ ꠟꠣꠉꠤ ꠃꠚꠎꠥꠉꠤ ⁕ ꠙꠣꠇꠞꠤꠔꠤꠇ ꠡꠥꠘ꠆ꠖꠞꠦ ꠜꠞꠣ ꠁ ꠀꠅꠞ ꠛꠍꠞꠞ ꠄꠈꠦꠈ ꠡꠝꠄ ꠄꠈꠦꠈ ꠟꠣꠈꠣꠘ ꠡꠥꠘ꠆ꠖꠞ ꠖꠦꠈꠣꠄ ⁕ ꠖꠦꠡꠞ ꠢꠇ꠆ꠇꠟ ꠔꠘꠦ ꠛꠠ ꠁ ꠀꠅꠞ ꠄꠉꠥ ꠝꠤꠑꠣ ꠚꠣꠘꠤꠞ ꠅ ꠎꠣꠉꠣ ⁕ ꠙꠥꠛꠦꠖꠤ ꠙꠣꠕꠣꠞꠤꠀ ꠅ ꠝꠣꠗꠛ ꠚꠣꠢꠣꠠ ꠀꠞ ꠙꠍꠝꠦꠖꠤ ꠜꠣꠐꠦꠞꠣ ꠚꠣꠢꠣꠠꠦ ꠛꠦꠞꠤꠀ ꠞꠣꠈꠣ ꠀꠈꠣꠟꠥꠇꠤ ꠀꠅꠞ ꠝꠥꠟꠤꠛꠣꠎꠣꠞ ꠀꠞ ꠍꠤꠟꠐ ꠎꠦꠟꠣꠞ ꠚꠣꠍꠐꠣ ꠃꠚꠎꠦꠟꠣꠔ ꠚꠠꠍꠦ ⁕ ꠍꠥꠐ-ꠛꠠ ২৪০ꠐꠣ ꠛꠤꠟ ꠀꠞ ১০ꠐꠣ ꠉꠣꠋꠉ ꠅꠈꠟ ꠟꠂꠀ ꠀꠈꠣꠟꠥꠇꠤ ꠀꠅꠞ ꠛꠣꠞꠤꠡꠣꠔ ꠙ꠆ꠞꠣꠄ ১৮ ꠀꠎꠣꠞ ꠄꠟꠣꠇꠣꠄ ꠙꠞꠤꠘꠔ ꠅꠁꠎꠣꠄ ⁕ ꠁ ꠀꠅꠞ ꠛꠣꠋꠟꠣꠖꠦꠡꠞ ꠝꠥꠐ ꠚꠣꠘꠤꠔꠎꠘꠝꠣ ꠉꠣꠍꠉꠣꠍꠣꠟꠤꠞ ꠅꠞ꠆ꠗꠦꠈꠞ ꠛꠦꠡꠤ ꠀꠞ ꠡꠋꠇꠐꠅ ꠚꠞꠣ ꠉꠣꠍꠉꠣꠍꠣꠟꠤꠞ ꠀꠞ ꠎꠣꠘ꠆ꠖꠣꠞ ꠅꠈꠟ ꠝꠤꠟꠦ ⁕ ꠚꠣꠍꠉꠥ ꠃꠚꠎꠤꠟꠣ ꠀꠞ ১১ꠐꠣ ꠁꠘꠤꠅꠘ ꠎꠥꠠꠤ ꠀꠈꠣꠟꠥꠇꠤ ꠀꠅꠞ ꠍꠤꠟꠐ ꠀꠞ ꠝꠥꠟꠤꠛꠣꠎꠣꠞ ꠎꠤꠟꠣꠔ ꠚꠞꠍꠦ ⁕ ꠀꠅꠞꠞ ৪০% ꠛꠣꠐ ꠛꠠꠟꠦꠈꠣ ꠨ ৩০% ꠇꠥꠟꠣꠃꠠꠣ ꠨ ১৫% ꠚꠦꠍꠥꠉꠁꠘ ꠨ ১০% ꠉꠥꠟꠣꠚꠉꠁꠘ ꠀꠞ ৫% ꠛꠤꠀꠘꠤꠛꠣꠎꠣꠞ ꠃꠚꠎꠤꠟꠣꠔ ꠚꠞꠍꠦ ⁕ ꠀꠅꠞ ২০ ꠀꠎꠣꠞ ৪০০ ꠢꠦꠇ꠆ꠐꠞ ꠚꠣꠡꠞ ⁕ ২৪০ꠉꠥ ꠛꠤꠟ ꠖꠤ ꠔꠣꠁꠀꠞ ꠀꠈꠣꠟꠥꠇꠤ ꠀꠅꠞꠞ ꠛꠤꠟ ꠅꠈꠟ ꠞꠁꠍꠦ ꠘꠣꠘꠣꠘ ꠎꠣꠔꠤ ꠝꠣꠍ ⁕ ꠛꠣꠞꠤꠡꠣꠔ ꠁ ꠀꠅꠞꠞ ꠞꠥꠚ ꠚꠥꠞꠣ ꠚꠣꠟꠐꠤ ꠎꠣꠄ ⁕ ꠍꠣꠁꠞꠛꠣꠄ ꠈꠣꠟꠤ ꠚꠣꠘꠤ ꠀꠞ ꠚꠣꠘꠤꠞ ꠈꠦꠟꠣ ⁕ ꠡꠤꠔꠞ ꠡꠝꠄ ꠀꠅꠞꠞ ꠡꠦꠡꠝꠣꠕꠣ ꠚꠞ꠆ꠎꠘ꠆ꠔ ꠖꠦꠈꠔꠦ ꠅꠟꠣꠘ ꠡꠥꠘ꠆ꠖꠞ ꠟꠣꠉꠦ ⁕ ꠍꠣꠁꠞꠛꠣꠄ ꠃꠑꠣ ꠈꠍꠥꠀ ꠊꠣꠡꠞ ꠀꠖꠤꠞ ꠟꠣꠈꠣꠘ ꠃꠍꠣꠝꠣꠐꠤꠘ꠆ꠔꠞ ꠍꠛꠤ ꠎꠦꠔꠥꠇ ꠛꠤꠟꠞ ꠚꠣꠘꠤꠔ ꠚꠠꠦ ꠨ ꠢꠤꠛꠟꠣ ꠄꠈ ꠡꠥꠘ꠆ꠖꠞ ꠟꠣꠉꠣ ꠟꠣꠉꠦ ⁕ ꠡꠤꠔꠞ ꠖꠤꠘ ꠑꠣꠘꠒꠣꠞ ꠈꠣꠈꠤꠘ ꠉꠥꠁꠐ ꠛꠣꠘ꠆ꠗꠤ ꠀꠁꠔ ꠕꠣꠈꠦ ꠛꠤꠟ ꠅꠈꠟꠅ ⁕ ꠛꠤꠖꠦꠡꠤ ꠚꠣꠈꠤꠘ꠆ꠔꠞ ꠀꠅꠔꠤꠄ ꠀꠅꠞ ꠎꠦꠘ ꠛꠘꠤꠎꠣꠄ ꠡꠚ꠆ꠘꠞ ꠖꠦꠡ ⁕ ꠀꠞ ꠁ ꠡꠝꠄ ꠁꠔꠣ ꠚꠣꠈꠤꠘ ꠖꠦꠈꠣꠞ ꠖꠣꠄ ꠝꠣꠘꠥꠡ ꠀꠁꠀ ꠈꠣꠘ꠆ꠖꠣꠁꠘꠔꠣ ꠃꠛꠣꠁꠘ ꠀꠅꠞꠞ ꠚꠣꠞ ⁕ ꠛꠣꠞꠤꠡꠣꠔ ꠅ ꠔꠥꠠꠣ ꠛꠤꠖꠦꠡꠤ ꠚꠣꠈꠤꠘ ꠖꠦꠈꠣ ꠎꠣꠄ ⁕ ꠀꠅꠞꠞ ꠡꠣꠖꠥ ꠀꠞ ꠝꠤꠑꠣꠚꠣꠘꠤꠞ ꠘꠣꠘꠣꠘ ꠎꠣꠔꠤ ꠝꠣꠍꠞ ꠝꠣꠏꠦ ꠞꠁꠍꠦ ꠨ ꠀꠁꠠ ꠨ ꠍꠤꠔꠟ ꠨ ꠛꠣꠃꠡ ꠨ ꠚꠣꠛꠤꠀ ꠨ ꠝꠣꠉꠥꠞ ꠨ ꠢꠤꠋꠉꠤ ꠨ ꠇꠁ ꠡꠁꠔꠦ ꠀꠞꠅ ꠘꠣꠘꠣꠘ ꠎꠣꠔꠤ ꠖꠦꠡꠤ ꠚꠣꠔꠅꠀ ꠝꠣꠍꠣꠁꠘ ⁕
ꠘꠣꠝꠞꠣꠈꠣ
editꠛꠃꠔꠦ ꠝꠘꠈꠞꠂꠘ "ꠡꠣꠉꠞ" ꠡꠛ꠆ꠖ ꠔꠘꠦ "ꠀꠅꠞ" ꠡꠛ꠆ꠖ ꠀꠁꠍꠦ ⁕ ꠔꠄ "ꠀꠈꠣꠟꠥꠇꠤ" ꠘꠣꠝ ꠟꠁꠀ ꠛꠃꠔ ꠉꠚꠉꠤꠔ꠆ꠔꠤ ꠞꠁꠍꠦ: ꠈꠀꠝꠣꠔꠦ ꠨ ꠛꠃꠔ ꠛꠍꠞ ꠀꠉꠦ ꠔ꠆ꠞꠤꠙꠥꠞꠣꠞ ꠝꠢꠣꠞꠣꠎꠣ ꠅꠝꠞ ꠝꠣꠘꠤꠇ꠆ꠇꠞ ꠡꠦꠘꠣꠛꠣꠁꠘꠤꠞ ꠒꠞꠦ ꠛꠠꠟꠦꠈꠣꠞ ꠇꠥꠇꠤ ꠖꠟꠘꠦꠔꠣ ꠢꠣꠋꠉꠞ ꠍꠤꠋ ꠀꠞꠣꠎꠋꠉꠟꠦ ꠜꠞꠣ ꠀꠞ ꠚꠦꠈꠚꠦꠈꠣ ꠄꠇ ꠛꠤꠡꠣꠟ ꠄꠟꠣꠇꠣꠔ ꠄꠝꠘ ꠟꠣꠈꠣꠘ ꠟꠥꠇꠣꠁꠘ ꠎꠦ ꠨ ꠡꠝꠄꠍꠇ꠆ꠇꠞꠦ ꠁ ꠄꠟꠣꠇꠣꠞ ꠘꠣꠝ ꠅꠁꠎꠣꠄ "ꠢꠣꠋꠉꠞ ꠟꠥꠇꠤ" ꠨ ꠛꠣꠖꠦ ꠁꠇꠐꠣ "ꠀꠈꠣꠟꠥꠇꠤ"-ꠔ ꠀꠁꠀ ꠈꠣꠞꠣꠄ ⁕ ꠀꠞꠈ ꠉꠚꠅ ꠀꠍꠦ ꠙꠦꠞꠣꠄ ꠖꠥꠁ ꠀꠎꠣꠞ ꠛꠍꠞ ꠀꠉꠦ ꠡꠣꠋꠊꠣꠔꠤꠇ ꠄꠈ ꠛꠁꠍꠣꠟꠅ "ꠀꠇꠣ" ꠘꠣꠝꠦ ꠄꠈ ꠞꠣꠎꠣ ꠀꠞ ꠔꠣꠘ ꠞꠣꠎꠔ꠆ꠔ ꠝꠣꠐꠤꠞ ꠘꠤꠍꠦ ꠚꠥꠞꠣ ꠔꠟ ꠎꠣꠄ ⁕ ꠡꠝꠄꠍꠇ꠆ꠇꠞꠦ ꠁ ꠔꠟꠅꠀ ꠘꠤꠘ ꠎꠦꠉꠣꠞ ꠘꠣꠝ ꠅꠄ "ꠀꠈꠣꠟꠥꠇꠤ" ꠛꠣ ꠢꠣꠇꠣꠟꠥꠇꠤ ⁕ ꠀꠞꠅ ꠍꠟ ꠀꠍꠦ ꠎꠦ ꠨ ꠄꠈ ꠡꠝꠄ ꠛꠠꠟꠦꠈꠣ ꠕꠣꠘꠣꠞ ꠚꠌ꠆ꠌꠤꠝ ꠈꠣꠘꠅ "ꠢꠦꠋꠇꠦꠟ" ꠘꠣꠝꠦ ꠄꠈ ꠃꠚꠎꠣꠔꠤ ꠛꠣꠡ ꠈꠞꠔ ⁕ ꠚꠞꠦ ꠁ "ꠢꠦꠋꠇꠦꠟꠥꠇꠤ" ꠢꠣꠇꠣꠟꠥꠇꠤ ꠘꠣꠝ ꠅꠄ ⁕ ꠁꠔꠣ ꠅ ꠈꠀ ꠅꠄ ꠎꠦ ꠨ ꠀꠈꠣꠟꠥꠇꠤ ꠀꠅꠞꠞ ꠈꠣꠘ꠆ꠖꠣꠔ ꠄꠈꠡꠝꠄ ꠊꠞꠉꠣꠁꠐ ꠈꠞꠔ ꠇꠥꠇꠤ ꠨ ꠘꠣꠉꠣ ꠃꠚꠎꠣꠔꠤꠘ ⁕ ꠔꠣꠞꠣꠞ ꠘꠤꠎꠡ꠆ꠡ ꠃꠚꠎꠣꠔꠤ ꠝꠣꠔꠦ ꠁ ꠀꠅꠞꠞ ꠘꠣꠝꠈꠞꠘ ꠈꠞꠣ ꠅꠄ "ꠀꠈꠣꠟꠥꠇꠤ" ꠨ ꠎꠣꠞ ꠝꠣꠘꠦ 'ꠟꠥꠇꠣꠁꠟ ꠡꠝ꠆ꠙꠖ' ⁕
ꠐꠤꠇꠣꠁꠞꠣꠈꠣ
editꠀꠈꠣꠟꠥꠇꠤ ꠀꠅꠞꠞꠦ ꠡꠋꠇꠐꠚꠥꠞ꠆ꠘ ꠄꠟꠣꠇꠣ ꠛꠤꠛꠦꠍꠘꠣ ꠈꠞꠣ ꠅꠄ ⁕ ꠁꠉꠥ ꠚꠣꠘꠤꠞꠉꠣꠞꠣ ꠐꠤꠇꠣꠘꠤꠔ ꠀꠞ ꠀꠘ꠆ꠔꠞ꠆ꠎꠣꠔꠤꠇ ꠉꠥꠞꠥꠔ꠆ꠔ ꠅ ꠐꠦꠇꠡꠁ ꠛꠦꠛꠀꠞꠞ ꠟꠣꠉꠤ ꠞꠣꠝꠡꠣꠞ ꠄꠟꠣꠇꠣ ꠢꠤꠡꠣꠛꠦ ꠐꠤꠇꠣꠘꠤꠔ ꠀꠍꠦ ⁕
ꠉꠣꠍ ꠀꠞ ꠢꠦꠝꠣꠘ
edit
ꠀꠈꠣꠟꠥꠇꠤ ꠀꠅꠞꠞ ꠚꠣꠘꠤꠞꠉꠣꠞꠣꠁꠘꠔ ꠛꠃꠔ ꠎꠣꠔꠤ ꠉꠣꠍꠚꠣꠟꠣ ꠎꠘ꠆ꠝꠦ ⁕ ꠄꠈ ꠡꠝꠄꠇꠥꠞ ꠘꠎꠞꠈꠣꠞꠣ ꠨ ꠜꠣꠃꠀꠁꠟ ꠛꠠ ꠛꠠ ꠉꠣꠍꠚꠣꠟꠣ (swamp forest) ꠄꠘꠦ ꠀꠞ ꠘꠣꠁ ⁕ ꠍꠣꠔꠟꠣ ꠛꠤꠟ-ꠅ ꠈꠣꠟꠤ ꠍꠥꠐꠝꠥꠐ ꠄꠈ ꠛꠘ ꠀꠍꠦ (২০০০ ꠈ꠆ꠞꠤꠡ꠆ꠐꠣꠛ꠆ꠖ) ⁕ ꠀꠈꠣꠟꠥꠇꠤ ꠀꠅꠞ ৫২৬ ꠎꠣꠔꠤ ꠉꠣꠍꠚꠣꠟꠣ ꠨ ৪১৭ ꠎꠣꠔꠤ ꠚꠣꠈꠤ ꠨ ꠄꠞ ꠝꠣꠏꠦ ১১২ ꠎꠣꠔꠤ ꠛꠤꠖꠦꠡꠤ ꠚꠣꠈꠤ ꠀꠞ ৩০৫ ꠎꠣꠔꠤꠞ ꠖꠦꠡꠤ ꠚꠣꠈꠤꠘ ⁕ ꠄꠍꠣꠠꠣ ১৪১ ꠎꠣꠔꠤ ꠅꠁꠘ꠆ꠘꠣꠁꠘ꠆ꠘ ꠛꠘꠥꠀꠢꠦꠝꠣꠘ ꠨ ১০৭ ꠎꠣꠔꠤ ꠝꠣꠍ ꠨ ꠒꠣꠞꠝꠣꠏꠦ ৩২ ꠎꠣꠔꠤ ꠛꠃꠔ ꠟꠣꠈꠣꠘ ꠚꠣꠔꠅꠀꠞ ꠚꠕꠦ ⁕ ꠄꠍꠣꠠꠣꠅ ꠞꠁꠍꠦ ꠘꠣꠘꠣꠘ ꠎꠣꠔꠤ ꠚꠥꠇ-ꠐꠥꠇ ꠨ ꠚꠣꠘꠤꠞ ꠀꠞ ꠢꠥꠇꠘꠣꠞ ꠔꠤꠔꠇꠤꠘꠣ ꠎꠣꠘ꠆ꠖꠣꠞ ⁕ ꠁꠇ-ꠐꠥꠞꠤꠎꠝꠞ ꠟꠣꠉꠤ ꠎꠦ ꠡꠝ꠆ꠜꠣꠛꠘꠣꠝꠄ ꠀꠈꠣꠟꠥꠇꠤ ꠀꠅꠞ ꠡꠥꠁꠖ꠆ꠖꠣ ꠢꠣꠔꠉꠥ ꠡꠋꠇꠐꠚꠥꠞ꠆ꠘ ꠄꠟꠣꠇꠣ ⁕ ১৫০ ꠎꠣꠔꠤ ꠝꠤꠑꠣ ꠚꠣꠘꠤꠞ ꠝꠣꠍ ꠨ ১২০ ꠎꠣꠔꠤ ꠚꠣꠘꠤꠎꠘ꠆ꠝꠣ ꠉꠣꠍꠚꠣꠟꠣ ꠨ ꠙꠦꠞꠣꠄ ꠚꠣꠔꠅꠀ ২০ ꠎꠣꠔꠤ ꠙꠦꠐꠟꠉꠣꠟꠤ ⁕ ꠁꠘꠅ ꠚꠞꠔꠦꠈ ꠛꠍꠞ ꠡꠤꠔꠞꠖꠤꠘ ꠙꠦꠞꠣꠄ ২০০ ꠛꠤꠞꠟ ꠎꠣꠔꠞ ꠛꠤꠖꠦꠡꠤ ꠚꠣꠈꠤꠘ ꠀꠄ ⁕ ꠀꠈꠣꠟꠥꠇꠤ ꠀꠅꠞ ꠐꠦꠇꠡꠁ ꠃꠘ꠆ꠘꠅꠘ ꠨ ꠘꠣꠘꠣꠘꠎꠣꠔꠤ ꠎꠣꠘ꠆ꠣꠞ ꠐꠤꠇꠣꠘꠤ ꠨ ꠁꠇꠐꠥꠞꠤꠎꠝ ꠡꠤꠟ꠆ꠙꠔ ꠢꠣꠝꠣꠘꠤꠞ ꠄꠈ ꠘꠄꠀ ꠖꠥꠀꠞ ⁕
২৩৮ꠐꠣ ꠛꠤꠟ
editꠢꠣꠞꠤ ꠛꠞꠍ ꠛꠤꠟ ꠅꠈꠟ ꠚꠣꠘꠤ ꠕꠣꠈꠦ ⁕ ꠝꠦꠁꠘ ꠛꠤꠟ ꠅꠈꠟ:
ꠍꠣꠌꠣꠔꠟꠣ ꠛꠤꠟ ꠍꠃꠇꠤꠀ ꠛꠤꠟ ꠒꠥꠟꠣ ꠛꠤꠟ ꠙꠤꠋꠟꠣꠞꠇꠥꠘꠣ ꠛꠤꠟ ꠚꠥꠐꠤ ꠛꠤꠟ ꠔꠥꠞꠣꠟ ꠛꠤꠟ ꠔꠦꠇꠥꠘꠤ ꠛꠤꠟ ꠚꠣꠅꠟ ꠛꠤꠟ ꠎꠥꠀꠟꠣ ꠛꠤꠟ ꠈꠣꠁꠀꠞꠇꠥꠘꠣ ꠛꠤꠟ ꠛꠣꠟꠤꠎꠥꠠꠤ ꠛꠤꠟ ꠇꠥꠇꠥꠞꠒꠥꠛꠤ ꠛꠤꠟ ꠈꠣꠐꠥꠀ ꠛꠤꠟ ꠛꠤꠞꠣꠁ ꠛꠤꠟ ꠞꠣꠢꠤꠀ ꠛꠤꠟ ꠍꠤꠘꠣꠃꠞꠣ ꠛꠤꠟ ꠖꠥꠗꠣꠟ ꠛꠤꠟ ꠝꠣꠀꠎꠥꠞꠤ ꠛꠤꠟ ꠛꠣꠞꠎꠣꠟꠣ ꠛꠤꠟ ꠚꠣꠞꠎꠣꠟꠣꠛꠤꠟ ꠝꠥꠍꠘꠣ ꠛꠤꠟ ꠟꠣꠝ꠆ꠛꠣ ꠛꠤꠟ ꠖꠤꠀ ꠛꠤꠟ
ꠛꠣꠕꠣꠘ ꠡꠤꠡꠐꠝ
editꠀꠈꠣꠟꠥꠇꠤ ꠀꠅꠞꠞ ꠝꠦꠟꠣꠁꠟ ꠛꠘꠗ ꠢꠥꠇꠘꠣ ꠝꠃꠡꠥꠝ ꠘꠣꠘꠣꠘ ꠎꠣꠉꠣ ꠔꠘꠦ ꠀꠅꠀ ꠉꠞꠥ-ꠛꠁꠡ ꠨ ꠛꠈꠞꠤ ꠨ ꠝꠦꠠꠣ ꠅꠔꠣꠁꠘꠔꠦ ꠊꠥꠠꠤ ꠛꠦꠠꠣꠄ ⁕ ꠀꠅꠞꠞ ꠈꠣꠘꠖꠣꠈꠣꠍꠣꠞ ꠄꠟꠣꠇꠣꠞ ꠝꠣꠘꠡꠦ ꠨ ꠚꠡꠟ ꠔꠥꠟꠣ ꠅꠁꠉꠦꠟꠦ ꠛꠍꠞꠞ ꠢꠥꠇꠘꠣ ꠝꠃꠡꠥꠝꠞ ꠘꠤꠞ꠆ꠖꠤꠡ꠆ꠐ ꠇꠄꠇ ꠝꠣꠡ ꠔꠣꠞꠣꠞ ꠉꠞꠚꠣꠟꠣ ꠙꠡꠥꠁꠘꠞꠦ ꠚꠣꠑꠣꠁ ꠖꠦꠁꠘ ꠀꠅꠞ ꠕꠣꠈꠣ ꠄꠈ ꠡꠦꠘꠤꠞ ꠝꠣꠘꠥꠡꠞ ꠉꠦꠍꠦ ꠨ ꠎꠦꠞꠣ ꠄꠉꠥꠁꠘꠔꠞ ꠖꠦꠈꠜꠣꠟ ꠈꠞꠦ ⁕ ꠁ ꠈꠣꠝꠞ ꠖꠣꠄ ꠄꠞꠣ ꠙꠡꠥꠁꠘꠔꠞ ꠖꠥꠗ ꠚꠣꠄ ⁕ ꠝꠦꠀꠖ ꠡꠦꠡꠦ ꠀꠡꠟ ꠝꠣꠟꠤꠇꠦ ꠔꠣꠘ ꠉꠞꠥ-ꠛꠣꠍꠥꠞ ꠚꠤꠞꠔ ꠘꠦꠁꠘꠉꠤ ⁕ ꠁ ꠚꠣꠞꠣ ꠡꠤꠡꠐꠝꠞꠦ ꠀꠅꠞ ꠄꠟꠣꠇꠣꠔ "ꠛꠣꠕꠣꠘ" ꠈꠀ ꠅꠄ ⁕ ꠛꠣꠕꠣꠘꠞ ꠝꠣꠟꠤꠇ ꠅꠈꠟ ꠁꠔꠣ ꠙꠡꠥꠞ ꠖꠥꠗ ꠛꠦꠍꠤ ꠛꠃꠔ ꠚꠄꠡꠣ ꠛꠣꠘꠣꠁꠀ ꠕꠣꠈꠂꠘ ⁕ ꠄꠞꠖꠣꠄ ꠀꠈꠣꠟꠥꠇꠤ ꠀꠅꠞ ꠄꠟꠣꠇꠣ ꠔꠣꠘꠤꠅꠜꠣꠛꠦ ꠖꠥꠗ ꠀꠞ ꠖꠂ-ꠅꠞ ꠟꠣꠉꠤ ꠘꠣꠝꠈꠞꠣ ⁕
ꠀꠛꠀꠅꠀ ꠛꠖꠟꠞ ꠀꠍꠞ
edit
ꠛꠣꠋꠟꠣꠖꠦꠡꠞ ꠝꠣꠍ ꠡꠝ꠆ꠙꠖꠞ ꠄꠈ ꠛꠠ ꠅꠋꠡ ꠞꠁꠍꠦ ꠀꠅꠞ ꠅꠘ꠆ꠌꠟ ⁕ ꠎꠣꠞꠝꠣꠏꠦ ꠀꠈꠣꠟꠥꠇꠤ ꠀꠅꠞ ꠄꠟꠣꠇꠣꠔ ꠛꠦꠡꠤꠜꠣꠉ ꠛꠤꠟ ꠜꠞꠣ ꠅꠁꠉꠦꠍꠦ ⁕ ꠖꠥꠁꠐꠣ ꠎꠞꠤꠚ ꠔꠘꠦ ꠎꠣꠘꠣ ꠉꠦꠍꠦ (ꠙꠞꠤꠙ꠆ꠞꠦꠇ꠆ꠇꠤꠔ ২০০৯): ২৮১ꠐꠣ ꠛꠤꠟꠞ ꠝꠣꠏꠦ ꠚꠥꠞꠣ ꠀꠞ ꠔꠥꠠꠣ ꠜꠞꠣ ꠅꠁꠉꠦꠍꠦ ২৩৩ꠐꠣ ꠛꠤꠟ ⁕ ꠀꠛꠀꠅꠀ ꠛꠖꠟꠤꠞ ꠈꠣꠞꠘꠦ ꠝꠦꠊ ꠈꠝꠤ ꠎꠣꠅꠄ ꠈꠝꠤ ꠎꠣꠁꠞ ꠀꠅꠞ ꠅꠘ꠆ꠌꠟꠞ ꠛꠤꠟ ꠅꠈꠟꠞ ꠚꠣꠘꠤꠞ ꠚꠞꠤꠝꠣꠘ ⁕ ꠄꠞꠖꠣꠄ ꠎꠦ ꠛꠤꠟ ꠅꠈꠟ ꠅꠈꠘꠅ ꠐꠤꠇꠤ ꠀꠍꠦ ꠨ ꠁꠔꠣꠔ ꠚꠣꠘꠤꠞ ꠚꠞꠤꠝꠣꠘ ꠄꠝꠘ ꠈꠝꠣ ꠈꠝꠍꠦ ꠎꠦ ꠢꠥꠝꠇꠤꠞ ꠝꠥꠇꠅ ꠚꠞꠤꠉꠦꠍ ꠛꠃꠎ꠆ꠎꠣꠔꠤ ꠝꠣꠍꠞ ꠡꠁꠋꠇꠣ ⁕ ꠄꠍꠣꠠꠣ ꠡꠝꠄꠝꠔ ꠝꠦꠈ ꠅꠄ ꠘꠣ ꠨ ꠛꠣ ꠎꠛꠟꠣ ꠅꠄ ꠨ ꠢꠤꠛꠣꠟꠣ ꠄꠈꠟꠉꠦ ꠛꠦꠡ ꠅꠁꠎꠣꠄ ⁕ ꠎꠣꠞꠖꠣꠄ ꠀꠅꠞ ꠚꠣꠘꠤꠄ ꠜꠞꠤ ꠉꠦꠟꠦꠅ ꠁꠔꠣ ꠐꠤꠇꠦ ꠘꠣ ꠨ ꠎꠣꠟ꠆ꠟꠣꠉꠤ ꠝꠣꠍꠅ ꠀꠄ ꠘꠣ ⁕ ꠄꠞꠖꠣꠄ ꠝꠣꠍꠞ ꠛꠣꠁꠌ꠆ꠌꠣ ꠖꠦꠅꠀꠅ ꠀꠍꠞ ꠚꠠꠦꠞ ⁕ ꠀꠈꠟꠤꠀ ꠅꠈꠟꠞ ꠝꠔꠦ ꠨ ꠡꠝꠄꠝꠔ ꠚꠣꠘꠤ ꠘꠣ ꠅꠁꠟꠦ ꠝꠣꠍ ꠒꠤꠝ ꠚꠣꠞꠔ ꠚꠣꠞꠦ ꠘꠣ ⁕
ꠝꠦꠊ ꠅꠁꠟꠦ ꠚꠣꠘꠤꠞ ꠚꠣꠚ ꠈꠝꠦ ꠨ ꠁꠛꠣꠟꠣ ꠝꠣꠍ ꠒꠤꠝ ꠚꠣꠞꠦ ⁕ ꠛꠣꠘ꠆ꠖꠣ ꠚꠣꠘꠤ ꠚꠣꠚꠞꠣ ꠛꠦꠡꠤ ꠅꠄ ꠨ ꠄꠟ꠆ꠟꠣꠉꠤ ꠡꠝꠄꠝꠔ ꠝꠦꠊ ꠈꠥꠛ ꠛꠦꠡꠤ ꠖꠞꠈꠣꠞ ⁕ ꠀꠈꠣꠟꠥꠇꠤ ꠀꠅꠞ ꠡꠣꠗꠣꠞꠘꠔ ꠖꠥꠁ ꠎꠣꠔꠤ ꠉꠣꠍ ꠅꠄ: ꠎꠠꠣꠟꠣ (rooted) ꠀꠞ ꠜꠣꠡꠣꠁꠟ ⁕ ꠀꠅꠞ ꠚꠣꠘꠤ ꠈꠝ ꠅꠁꠟꠦ ꠎꠠꠣꠟꠣ ꠉꠣꠍꠞ ꠚꠞꠤꠝꠣꠘ ꠛꠣꠠꠤ ꠎꠣꠄ ⁕ ꠅꠟꠣꠘ ꠄꠈꠎꠣꠔꠤ ꠉꠣꠍ ꠛꠦꠡꠤ ꠅꠁꠟꠦ ꠀꠞꠎꠣꠔꠤ ꠉꠣꠍ ꠈꠔꠤꠔ ꠚꠠꠦ ⁕ ꠀꠞꠛꠣꠞ ꠄꠈꠎꠣꠔꠤ ꠉꠣꠍ ꠔꠘꠦ ꠙꠡꠥ-ꠚꠣꠈꠤ-ꠝꠣꠍꠦ ꠚꠞ꠆ꠎꠣꠚ꠆ꠔ ꠢꠈꠟ ꠎꠣꠔꠤ ꠈꠣꠘꠤ ꠚꠣꠄ ꠘꠣ ⁕ ꠀꠅꠞ ꠅꠘ꠆ꠌꠟ ꠀꠉꠦ ꠎꠦꠘꠅ ꠀꠠꠣ ꠎꠋꠉꠟ ꠀꠍ꠆ꠟ ꠨ ꠅꠘꠦ (২০০৯) ꠁꠔꠣꠔ ꠄꠈꠦꠞꠦ ꠃꠖꠟꠣ ꠀꠅꠞ ⁕ ꠕꠣꠘꠤꠅ ꠅꠈꠟꠞ ꠉꠦꠍ ꠕꠣꠇꠤ ꠎꠣꠘꠣ ꠎꠣꠄ ꠛꠖꠟꠤ ꠉꠦꠍꠦ ꠍꠤꠘꠚꠞꠤꠍꠤꠔ ꠀꠅꠞ ꠄꠟꠣꠇꠣꠞ ꠞꠥꠙ ⁕ ꠅꠘꠦ ꠀꠞ ꠡꠝꠎꠝꠔ ꠝꠦꠊ ꠅꠄ ꠘꠣ ꠨ ꠎꠦꠛꠟꠣ ꠅꠄ ꠨ ꠄꠈꠛꠣꠞꠦ ꠈꠦꠍꠣꠈꠦꠍꠤ ꠝꠦꠊ ꠅꠄ ⁕ ꠎꠣꠞꠖꠣꠄ ꠀꠅꠞ ꠚꠣꠘꠤꠄ ꠜꠞꠤ ꠉꠦꠟꠦꠅ ꠁꠔꠣ ꠐꠤꠇꠦ ꠘꠣ ꠨ ꠎꠦꠔꠣ ꠘꠣꠘꠣꠘꠎꠣꠔꠤ ꠚꠣꠘꠤꠞ ꠉꠣꠍ ꠀꠞ ꠎꠣꠘ꠆ꠖꠣꠞꠞꠦ ꠢꠥꠝꠇꠤꠔ ꠚꠣꠟꠣꠁꠍꠦ ⁕ ꠄꠟ꠆ꠟꠣꠉꠤ ꠀꠈꠣꠟꠥꠇꠤꠞ ꠍꠤꠘꠣꠎꠣꠘꠣ ꠢꠤꠎꠟ ꠨ ꠈꠞꠍ ꠨ ꠎꠣꠞꠁꠟ ꠨ ꠛꠞꠥꠘ ꠡꠥꠖ꠆ꠖꠣ ꠝꠦꠊꠞ ꠃꠚꠞꠦ ꠜꠞꠈꠞꠣ ꠚꠣꠘꠤꠞ ꠉꠣꠍꠣꠁꠘ꠆ꠔꠞ ꠅꠛꠍ꠆ꠕꠣ ꠛꠤꠚꠘ꠆ꠘ ⁕ ꠀꠞ ꠚꠣꠘꠤꠞ ꠅꠜꠣꠛꠦ ꠚꠣꠘꠤꠛꠣꠁꠔꠅ ꠚꠎꠘꠘꠞ ꠅꠜꠣꠛꠦ ꠛꠃꠔ ꠉꠣꠍꠞ ꠎꠘꠝ ꠅꠁꠔꠦ ꠡꠝꠁꠡ꠆ꠡꠣ; ꠎꠦꠟꠣꠘ: ꠇꠤꠍꠥ ꠉꠣꠍꠞ ꠚꠟ ꠉꠣꠍ ꠕꠣꠇꠔꠦꠅ ꠁꠔꠣꠞ ꠎꠠ ꠛꠣꠞꠘꠤ ꠡꠥꠞꠥ ꠅꠄ ꠨ ꠄꠞꠖꠣꠄ ꠁꠔꠣ ꠒꠦꠐꠣ ꠍꠤꠠꠤꠀ ꠘꠤꠍꠦ ꠚꠠꠔꠦꠅ ꠍꠦꠞꠣ ꠎꠘ꠆ꠝꠣꠘꠥ ꠡꠥꠞꠥ ꠈꠞꠦ ⁕ ꠘꠤꠍꠦ ꠚꠣꠘꠤ ꠕꠣꠈꠟꠦ ꠚꠟ ꠅꠈꠟ ꠜꠣꠡꠣꠁꠀ ꠅꠁꠘ꠆ꠘꠈꠣꠘ ꠟꠁꠀ ꠉꠦꠟꠦ ꠍꠣꠁꠞꠛꠣꠄ ꠍꠤꠔ꠆ꠞꠤꠀ ꠉꠣꠍꠣꠁꠘ ꠎꠘ꠆ꠝꠣꠁꠔ ꠚꠣꠞꠔ ⁕ ꠇꠤꠘ꠆ꠔꠥꠇ ꠚꠃꠎꠘꠤꠅ ꠚꠣꠘꠤ ꠘꠣ ꠅꠀꠄ ꠄꠈ ꠎꠦꠉꠣꠔ ꠡꠛ ꠚꠟ ꠚꠠꠤꠀ ꠔꠦꠝꠘ ꠇꠥꠘꠥ ꠃꠚꠇꠣꠞ ꠅꠄ ꠘꠣ ⁕
ꠎꠦꠔꠣ ꠖꠦꠈꠛꠣ
editꠀꠈꠣꠟꠥꠇꠤ ꠀꠅꠞ ꠄꠈꠦꠈ ꠝꠃꠡꠥꠝ ꠄꠈꠦꠈ ꠟꠣꠈꠣꠘ ꠞꠥꠚ ꠟꠄ ⁕ ꠛꠣꠞꠤꠡꠣꠔ ꠁꠉꠥ ꠖꠞꠤꠀꠞ ꠟꠣꠈꠣꠘ ꠅꠁꠎꠣꠄ ⁕ ꠀꠛꠣꠞ ꠡꠤꠔꠅ ꠁꠉꠥ ꠀꠞꠈ ꠟꠣꠈꠣꠘ ꠅꠁꠎꠣꠄ ⁕ ꠖꠞꠤꠀꠞ ꠟꠣꠈꠣꠘ ꠛꠠ ꠛꠠ ꠓꠦꠃ ꠨ ꠍꠣꠁꠞꠛꠣꠄ ꠚꠣꠘꠤ ꠀꠞ ꠚꠣꠘꠤ ⁕ ꠛꠃꠔ ꠖꠥꠞ ꠖꠥꠞꠣꠁꠘ꠆ꠔ ꠉꠣꠅ ⁕ ꠎꠦꠍꠣ ꠉꠣꠅꠔ ꠉꠤꠀ ꠛꠤꠀꠟꠦ ꠊꠥꠞꠤ ꠀꠅꠀ ꠎꠣꠄ ⁕ ꠀꠅꠞꠞ ꠈꠣꠘꠖꠣꠞ ꠘꠣꠝꠤꠀꠟꠣ ꠄꠈ ꠉꠣꠅ ꠁꠍꠟꠣꠝꠙꠥꠞ ⁕ ꠁꠘ ꠎꠣꠁꠔꠦ ꠚꠦꠍꠥꠉꠁꠘ꠆ꠎ ꠔꠘꠦ ꠙ꠆ꠞꠣꠄ ꠖꠥꠁ ꠊꠘ꠆ꠐꠣ ꠟꠣꠉꠛ ⁕
ꠈꠣꠘꠖꠣꠈꠣꠍꠣꠞ ꠖꠦꠈꠣꠞꠝꠔ ꠎꠦꠉꠣꠁꠘ
editꠝꠣꠗꠛꠇꠥꠘ꠆ꠒ ꠏꠘ꠆ꠘꠣ ꠨ ꠉꠉꠘꠐꠤꠟ꠆ꠟꠣ ꠀꠞ ꠈꠣꠘꠖꠣꠞ ꠎꠋꠟꠣ ꠨ ꠢꠣꠁꠟ ꠀꠅꠞ ꠨ ꠍꠣ ꠅ ꠞꠣꠛꠣꠞ ꠛꠣꠉꠣꠘ ꠀꠞ ꠍꠝꠤꠇ ꠅꠈꠟꠞ ꠇꠣꠟꠌꠣꠞ ꠅ ꠎꠤꠛꠘꠗꠣꠞꠣ ꠨ ꠟꠣꠃꠎꠣꠍꠠꠣ ꠅ ꠡꠣꠔꠍꠠꠤ ꠎꠣꠔꠤꠅ ꠃꠖ꠆ꠖꠣꠘ ꠀꠞ ꠞꠦꠝꠣ-ꠇꠣꠟꠦꠋꠉꠣ ꠛꠘ꠆ꠘꠙ꠆ꠞꠣꠘꠤ ꠅꠜꠀꠞꠘ꠆ꠘ ꠨ ꠈꠣꠡꠤꠀ ꠅ ꠝꠘꠤꠙꠥꠞꠤ ꠇꠣꠟꠌꠣꠞ ꠅ ꠎꠤꠛꠘꠗꠣꠞꠣ ꠨ ꠚꠣꠘꠚꠥꠘ꠆ꠎꠤ ꠨ ꠐꠤꠟ꠆ꠟꠣꠁꠘ ꠅ ꠀꠡꠚꠣꠡꠞ ꠖꠤꠡꠡ ꠨ ꠀꠠꠣꠎꠋꠉꠟ ꠅ ꠛꠘꠥꠀ ꠙ꠆ꠞꠣꠘꠤꠘ ⁕
ꠀꠞꠅ ꠖꠦꠈꠂꠘ
edit
ꠀꠞ꠆ꠔꠣꠔ
edit
ꠕꠥꠇꠣꠘꠤ
edit| ꠀ | ꠁ | ꠃ | ꠄ | ꠅ | ꠇ | ꠈ | ꠉ | ꠊ | ꠌ | ꠍ | ꠎ | ꠏ | ꠐ | ꠑ | ꠒ |
| ꠔ | ꠕ | ꠖ | ꠗ | ꠘ | ꠙ | ꠚ | ꠛ | ꠜ | ꠝ | ꠞ | ꠟ | ꠡ | ꠢ | ꠠ | ꠓ |
|
|
|
|
|
|
|
|
|
|
|
