alukala edit
結婚 edit
sialukalaisaka hla’aluaia, rianʉmʉmʉa umarua cacihliusumanʉ hlahlusa cacihliusumanʉ ahlaina, ku ucaanihlahlusa nua ahlainanaka maimamacu mʉmʉa usuapihlingi hlamamaisaia maima macu mʉmʉa, kuhlaisai alamuruhlahlusa nua alamuruahlaina macitʉtʉricu pitʉkʉ alukalaia, uakiki rimicua hlamamaisa hlahlusana cacihliapuamiaisa pauahlahlaina, kiariari macipauahlahlaina ku uangahlʉ maramacucu, marumaru maci mulalimahlʉ hla tumahluaʉnʉmʉhlʉ, inicikimaramacucu marumaci kuaruiraʉ pitʉtʉahliahlukuana ararataʉisamisau.
macituahlʉalukalaia maialalangicua hlahlusana, cumuhluku picupapaci ucani tahlakʉ, hla kumakita hlahlusana alʉisa ahlaina, maci piahlalua ahlainaia, apialalangʉ tuku’u kakamalʉ ahla hlarangirangi, maci hlahlusa ahlaluaisa ahlainanaia, apialalangʉ ripasʉ hla hlitakʉ, maci miungu cua arisaia ahlavʉcisa mapaci imarʉ hlicuhluku marikua salia ahlana alukaalacu, tamuucua hla’a luana pualangʉlangʉ arukavacangaisa alukavavalʉa ucanipihlingina, kuhlaisai kutumahlaʉka alu kavilau, kiariari ucanii maci kupaumamainia, hla pirupuka ahlaina masavaʉ kutararianʉia, alukavilau maniki hlialukavilaucuia, tuahlʉmana alukala usumanʉ, hlahlusa nua ahlaina hla’alua maci malimahlicuka caihlisaia kucu uriusumanʉ.
ucanimuriparana talʉmʉlʉmʉ maci’ia hlahlusaisaia tuahlumana aluaʉisakacucu’u hlatumuacua hliukakuaisa hlamamana maramasu taku’i’iarʉ, mairahlu uriamia miaisa hlahlusa hla’aluaia, matuluhlua caihlisa hla macihlimatingusingusipicu, vavuhluia iniciki tuahlʉ muriusu manʉ, ahlainaia laihlautulu ahla laihlaupitua caihlisa inicikituahlʉmarun cucu’u hla macukahliparamasua hlamama kiariari palukalaia uka’aka alukavilau.