kahiwan inai Zintun ianan zain fitfit a rumfaz, fitfit a rumfaz mathuaw thithu a kupur miazai sa dishlum, numa mathuaw thithu a wawishwish maquliush, malishlum, mapuzi, mathuaw maqitan riqazan. numa tu kahiwan kaidaa sa thau, numa kathu sa apuy pashnara thau a pinalhalhuiza.
maqa thau a taun kahiwan isasahai ribush, numa ribush a pruq ianan tu thau a pinalhalhuiza wa akanin. kahiwan a thau kuntak sa akanin, antu miazai thuini kmaan sa malhalhas a akanin. miaqay fitfit musasahai tu thau a pinalhalhuiza, kmaan tu thau a pinalhalhuiza wa akanin, numanuma izai buna, tipur, sharitunu araran fitfit, mathuw fitfit man’iutu makakalaw kmaan, kal’in fitfit numanuma. tu thau mathuaw mabuqnur, numa mingqarayza fitfit makunantua minakahazish mantabal rabu, pashnara tu thau a pinalhalhuiza wa akanin. numa tu thau a pinalhalhuiza wa akanin shunara, mathuaw thau mabuqnur numa masalpu sa akanin. tu isisua s thau mashtay mathuaw thmanit, mzai, ”ananaikin pinalhalhuiza wa akanin pashuran fitfit.” numa thau suma mun’iutu musai pinalhalhuiza. thaythuy kmari buna, minu s izai buna tu maqaqaran? painan pinashnara fitfit isai pruq. miazai sa matlhakathiza, makanshuz dai mathuaw maqitan kanin. isisuaiza thau tu mathuaw matingqaran dai kmaan malhalhasiza wa akanin, niza tu miazai tu kahiwan dai kmaan matak a akanin.
isisuaiza thau tu madaidaziza fitfit, niza tu kabuqnurin thau. ya itia makunasai ianan s thau a talhuqan marfaz fitfit, antu kulhpazishan panaq, maqa kaidaa sa thau. isisuaiza sa thau tu iananiza sa apuy, niza tu pu’ukan thaythuy.