Wp/sjd/Тырьбэрь

Тырьбэрь (рӯшас Териберка) - са̄тк Баренц ме̄рр рынтэсьт.

Тырьбэр ёгк

Лӯз шылле Тырьбэрь поаднэсьт

Са̄нндрэ Антонова мушштсалл Тырьбэрь

Ке̄сcь каникула (Сӯйнкоссэм я поаррьк ма̄н)

Мыйй Воа̄ськенҍ ке̄ссь каникула па̄ль, пыемь ёадтӭ Тырьбэрра, моа̄ст. Авьтмуссе мыйй пыемь коа̄ввсэ коа̄рдэгк сыййта, уййнэ ро̄дэтҍ. Ленинградэсьт по̄йсэнҍ ёдӭмь Оленегорск станция райя. Станциясьт коа̄внэмь машина, ёадтӭй Луяввра. Со̄нн во̄альтэ мӣнэтҍ, го ля̄йй сайй со̄нэсьт. Танна автобус вя̄л ев ёдтла. Сыйй э̄ллькэнҍ ёдтлэ е̄ннгэдтӭ маӈӈьда, ыгегуйм маӈӈьда.

Машина ля̄йй колхознэ. Со̄нн пыдтӭ мӣнэтҍ Луяввра. Ва̄сськ тэнн сыйт ля̄йй уййна вя̄л туарр ыге. Мунн со̄н уййнэ авьтма вуэр, чофта мӣлльтэ, о̄ллмэ тӣрвхэдтэв, мунн муэййнэннҍтэ. Мудта кула са̄ррнэв: "Тӣррв, сватҍя!" Мунн тэнн сыйтэсьт никуэссь эмм лййма э нӣкенн эмм тӣдҍ.

Мыйй ый ыййдэмь Луявьресьт. Ва̄сськ ыйедҍ оа̄ххксэсь, а мунн Октябрина вуэррьпелесьт, Эвван Тамарасьт. Ке мун тоагэ выгэ, эмм мушт. Ӣнцэ райя вӯдӭмь. Ӣнцэ ёадтъемь Коа̄ррдэгке мотор мӯрр вэ̄ннсэнҍ, ку эфт вуэр не̄дтлесьт сыййта выгк почта, газетатҍ, вӯлкхэзэтҍ мӣнэтҍ, вӯрьтэ рынтэсьт о̄ммп сыййт. Вэнс э̄ллтэнҍ рыннта, вуэсста, коа̄шштадт, пугк сыййт пӯдӭ.

Мыйй Воа̄ськенҍ кӯххт пе̄йв ӣлемь коа̄рдэгэсьт. Мӯнн ӣлле вуэннтре де̄дҍсан я По̄ввэль Ма̄рьесьт, со̄н а̄ххкь. Сӣнэгуэйм ӣле Эвнат, чӯдҍыгкса ка̄ллса рӯшас со̄н коадчетҍ Игнат. Ва̄сськ ӣле де̄дҍсэсь, ажесь вильесьт.

Мыйе Коа̄ррдэг о̄ллмэ цӣӆӆькэнҍ: "Пэ̄йнэгке Це̄ссэм па̄кь э̄л, выльшэгке Тырьбэрь са̄тк гоаррэ, уйнсебпе Тырьбэрь воа̄ретҍ." Мыйй я тэсьт шэ вйджьлемь Це̄ссем па̄кь э̄л.

Ебп уййнма Тырьбэрь воа̄ретҍ. Ента ӣнцэ ёадтъемь тэнншэ вэ̄ннсэнҍ Луяввра я эвтэс Тырьбэрь гоаррэ машина альн. Оленегорскэсьт по̄йсенҍ Мурмнэ. Мурмнэсьт парходэнҍ Тырьбэрра. Тырьбэресьт ва̄нҍцнэлле ке̄ссь ча̄р мӣлльтэ рай ка̄л-я̄вьр Пе̄ҏҏькя̄ввра, ке̄ссь е̄ллемь сайя. Тэсьт мунн ӣлле поаррьк ма̄н кӯххтлоагант пе̄йв райя.

Пӯдӭ а̄ййк ёадтӭ Ленинград ланна, о̄ххпнуввмуж луэпптӭм гуэйкэ. Ныдтҍ э ка̄никула па̄лль мэнст, гу э̄ххт пе̄ййв.