Wp/sjd/Пе̄дар ланнҍ

Пе̄дар ланнҍ (рӯшас Санкт-Петербург, э̄ввтла Петроград (ыг. 1914—1924) я маӈӈа Ленинград (ыг. 1924—1991) лӣ ныммьп шурьмусс ланнҍ Рӯшше̄ммьнесьт. Со̄нн ля̄шш Ла̄дтҍлӯхт рынтэсьт Нева ёг ня̄льмэсьт Рӯшше̄ммьне таввь-вуэррьйлэсьт. 2024 ыгесьт ланӭсьт я̄лл маль 5,6 мильён о̄ллмэдтӭ; со̄н э̄ля ко̄ммтвудт лӣ 1439 км².

Пе̄дар ланҍ тыгквэннҍ сай

Пе̄дар ланҍ ге̄ррп

Пе̄дар ланнҍ лӣ 16. (27.) вӯссьма̄н 1703 ыгесьт цоа̄рэнҍ Пе̄дрэнҍ I тӯййшуввма я нэ̄ммдуввма лӣ пассь Пе̄дар цысста. Ходтҍ со̄нн э ля̄йй пассь Пе̄дар цысста нэ̄ммдуввма, ноа а̄йкэнҍ шэ̄нтэ е̄намп Пе̄дар I нэ̄мэнҍ корнэдтэ. Ыгенҍ 1714—1728 я 1732—1918 Пе̄дар ланнҍ ля̄йй Рӯшш ланҍ вуэййвланнӭнҍ.

Выйемна̄ль

Пе̄дар ланнҍ лӣ Рӯшше̄ммьне ныммьп шурьмусс транспортнэ чӯллм. Со̄нэсьт ле̄в рӯввьт я автэмбилль чӯһкас, ме̄рр я ёгк выйемна̄ль, метрополитэнн я е̄рапоррт.

Пе̄дар ланҍ е̄рапоррт — Пулкова (рушас Пулково) — ля̄шш ланҍ соа̄ййв ре̄вьнэсьт Московскэ раёнэсьт 15 километранҍ ланҍ кэ̄сск райесьт. Пулкова е̄рапоррт ля̄йй 1932 ыгесьт а̄ввьда.

Пе̄дар ланнҍ рӯввьт чуэкас чӯллм лӣ ныммьп шурьмусс Рӯшше̄ммьнесьт маӈӈа московскэсьт я авьтмусс шэ̄ннтэм а̄йк мӣлльтэ — Рӯшше̄ммьне рӯввьт чӯһксэ исторья оа̄лкэ тэста 19. а̄гесьт. Пе̄дар ланӭсьт ле̄в кудт рӯввьт чуэкас вокзал: Балтийскэ, Витебскэ, Ладожскэ, Московскэ я Финляндскэ. Кэскэсьт Москва я Пе̄дар ланҍ вэ̄ххтъесь по̄яс «Сапсан» манн.

Пе̄дар ланҍ метрополитэнн ро̄бхуж 1932 ыгь райесьт. 2019 ыгь оалкхэжэсьт ланӭсьт ля̄йй 72 ста̄нцъя 5 ця̄һксэ альн, ко̄нн э̄ххтса кӯһкьвудт ля̄йй 124,7 км.

Пе̄дар ланҍ трамвайй са̄ййм лӣ шурьмусс Рӯшше̄ммьнесьт я ня̄льянт шурьмусс э̄ллмантэсьт. Со̄нн ро̄бхуж 1902 ыгь райесьт. 2000. ыге кэск райесьт Пе̄дар ланҍ трамвайй са̄ййм ля̄йй шурьмусс э̄ллмантэсьт трамвайй са̄йймэнҍ, мэ̄нн эвтэсьт ля̄йй Гинэсс рекордэ кыррья ва̄ллтма. Адтҍ Пе̄дар ланӭсьт ро̄бхушшэв 42 уж, сӣнэнҍ 2 ле̄в а̄ййка ка̄һтма. Са̄йм кӯһкьвудт лӣ 231 км, пугк ужэ кӯһкьвудт лӣ 500 км.

Ланҍ па̄ҋк

Пе̄дар ланҍ фла̄гк

Пе̄дар ланҍ раён

Пе̄дар ланӭсьт лӣ 18 раённэ:

1. Адмиралтейскэ
2. Василеостровскэ
3. Выборгскэ
4. Калининскэ
5. Кировскэ
6. Колпинскэ
7. Красногвардейскэ
8. Красносельскэ
9. Кронштадтскэ
10. Курортнэ
11. Московскэ
12. Невскэ
13. Петроградскэ
14. Петродворцовэ
15. Приморскэ
16. Пушкинскэ
17. Фрунзенскэ
18. Центральнэ

Ныдтҍшэ ланҍ раёнэ рӣвьнэнҍ лӣ 9 ланнӭ (Зеленогорск, Рӯппьсесь Сыййт (рӯшас Красное Село), Кронштадт, Ломоносов, По̄ввэл ланнҍ (рӯшас Павловск), Петергоф, Пушкин, Сестрорецк) я 21 сыййт.