Wp/sjd/Мӣһкь

Мӣһкь лӣ кэ̄ллм коаннҍтэмка̄ввьн вӯййк тӣренҍ чо̄һкэм я те̄ҏҏпэм гуэйкэ.

Мӣке на̄ль

Мӣкесьт ле̄в кугкесь те̄ррь я нэ̄дт; тоа̄ййв со̄нэсьт ныдтҍшэ лӣ га̄рда — мӣкь кусськ кӣдэтҍ пыннем гуэйкэ. Мӣкь те̄ррь лӣ а̄рркъенне 40–120 см кугкесьвудэсьт я кӯһтэ ӣҏьтэнҍ та̄һкта. Мӣкенҍ ле̄в е̄ннэ югкеналшэм ноа̄лле югке поа̄ленҍ я э̄ллманнт поа̄ҋкэнҍ; ле̄в шӯрр мӣкь кӯтӭнҍ кӣдэнҍ оаннӭм гуэйкэ я удця мӣкь, ко̄йт эфтэнҍ кӣдэнҍ оаннӭ вуайй.

А̄рркъенне мӣкетҍ лыгкэтҍ ста̄лесьт, а̄йкэсь мӣкь лыһкешь пронcэсьт. Авьтмусс э̄ллм мӣкь лӣйенҍ кинжалэнҍ шэ̄ннтма я ыдтӭнҍ проннc агесьт 1700 вай 1600 ве̄рьт ыг. мӣн э̄ра райса.

Этимологья

“Мӣһкь” са̄нӭсьт лӣ германскэ шэ̄ннтмушш.

Са̄мь кӣлэтҍ мӣкь нэ̄мм пӯдӭ ла̄дтҍ са̄нӭсьт miekki, кӯ шэ̄нтэ моа̄нтарла̄дтҍ *meekka са̄нӭсьт, а тунн кӣлле ля̄йй е̄рркъя скандинавскэ са̄нҍ mækir вай моа̄н.-германскэ са̄нҍ *mēkijaz ва̄ллтма. Элля оа̄нтшэм, ко̄ххт тэдт са̄ннҍ ля̄йй тамьпе шэ̄ннтма вай манҍтэ кӣлэсьт со̄нн ля̄йй тоагэ пуадтма.

Ка̄ввь

1 – вуэййв вай я̄блэһк, 2 – нэ̄дт, 3 – га̄рда,
4 – (те̄рь) вуэнҍтэсь, 5 – вэ̄рркоабпь, 6 – те̄рь ре̄ввьн,
7 – вуэррьт, 8 – нюннҍ, 9 – (то̄бп) ня̄лльм, 10 – то̄бп нюннҍ
A – вӣгк па̄ҋҋк, B – вӣгхэм па̄ҋҋк
I – эфесс, II – те̄ррь, III – то̄һп

Мӣке тӣре вуэйев югкеналшэм ка̄вь лӣйе. Схе̄ма чинчпе̄льт вӯзяһт а̄рркъесь европейскэ кэ̄сскагкьесь мӣһкь.

Ра̄ттҍкмушш кэскэсьт мӣке я кӣнжалэ условнэ лӣ, ама пугк тоа̄йва мӣһкь роа̄тткъювв кукя тӣренҍ (40 см-анҍ, е̄ресь пыйнэмуж мӣлльтэ — 60 см-анҍ).

Тя̄ннт вуайй 700 г-энҍ (гла̄диус) 4 кг райя (цвайхэндэр, фла̄мберг) лӣйе, надта тоа̄вьнэнҍ — 6,5 кг райя. А̄рркъесь эфтэнҍ кӣдэнҍ оаннӭм гуэйкэ мӣкь тя̄ннт маль пай 0,9–2 кг ля̄йй.

А̄йкесь рӯввьт тӣренҍ лӣйенҍ ёррьпесь нюнҍ тэнн па̄ль рӯввьттӯй паййнэмуж ре̄вьн гуэйкэ, ама сыйй лӣйенҍ тоавас вӯсьт рашшьенне пынньюввма рӣке. Бронь шӣгкнэмужэнҍ те̄рь лыһкешь пай ке̄нҍця, кэ̄ррса я чо̄гк нюнӭгуэйм бронь чо̄һкэм гуэйкэ.

Надта е̄дтэм те̄рь ле̄в коа̄мьт я се̄ӈьк, тоа̄ййв сӣнэнҍ лӣ вэ̄рркоабпь те̄рь ке̄пьнэм гуэйкэ со̄н кэ̄ррвуд уһцнэмуж а̄рвэнҍ. Чо̄һкмужэ гуэйкэ лыһкма тӣренҍ ле̄в ка̄зя, ра̄тткма кэ̄сск вӯрьтэнҍ кэ̄ррвуд шурьнэм гуэйкэ я чо̄гк кӣженҍ.

На̄ль

Куллъей мӣке на̄ль ле̄в:

• Спа̄та — вӯййк я кугкесь мӣһкь 75 см-энҍ 1 м райя куһкьвудэсьт, оннӭшь Рӣмм Имперьясьт 1.-сьт 8. райя мӣн э̄ра эгенҍ.
• Гла̄диус — е̄рркъя рӣмм оанҍхэсь соалтэх мӣһкь 60 см райя куһкьвудэсьт, оннӭшь 3. мӣн э̄ра райса агесьт 3. мӣн э̄ра агь райя.
• Вӣкиӈӈк агь мӣһкь вай каролинг мӣһкь — сама о̄ннъюввэй мӣһкь А̄йкас Кэ̄сскагесьт (8.–11. агь) Вуэррьял я Таввял Европасьт.
• Рыһцарь мӣһкь — шурьмусс Кэ̄сскагь мӣһкь, 90–120 см кугкьвудэсьт, оннӭшь 11. агесьт 16 агь ке̄жь райя.

Мӣкь кӯтӭнҍ кӣдэнҍ оаннӭм гуэйкэ:

• Цвайхэндэр (ерм. Zweihänder «кӯһт кӣд мӣһкь») — шӯрр мӣһкь, оннӭшь 16. агесьт.
• Фла̄мберг (ерм. Flamberge ← Flamme «то̄ллню̄ххчемь») — шӯрр мӣһкь то̄ллню̄ххчемь-налшэм тӣренҍ, оннӭшь Европасьт (надта Швейцариясьт я Германиясьт) 15.–17. эгенҍ.
• Клэ̄ймор (гэ̄л. claidheamh-mòr «шӯрр мӣһкь») — шотландскэ мӣһкь, оннӭшь 15.-17. эгенҍ.