Wp/sjd/Луя̄ввьр

Луя̄ввьр (рӯшас Ловозеро) лӣ сыййт Мӯрман е̄ммьнесьт я Луя̄ввьр е̄ммьне (рӯшас Ловозерский район) административнэ кэ̄сскпа̄ҋҋк. Со̄нн ля̄шш Варрьм ёг рынтэнҍ алльт Лӯявьрэсьт. Луя̄ввьр сыййт лӣ ныммьп сыййт раёнэсьт маӈӈа Рӣввьт сыйтэсьт е̄ллье числа мӣлльтэ: со̄нэсьт я̄лл 2110 о̄ллмэдтӭ (2021 ыг.) — са̄мь, ыжэм я рӯшш.

Тэдта элля воа̄лмаш лысст. То̄нн вуаяк кӣллт са̄мь Википедьяе ве̄кьхэ со̄н тӣвтхэмэнҍ.

Луя̄ввьр лӣ Рӯшше̄ммьнесьт шурьмусс са̄мь сыййт я шурьмусс рӯшш соа̄ме культура кэ̄сск. Тэсьт мэ̄ннэв югкеналшэм са̄мь пра̄зьнэгкь я фестиваль.

Исторья

Са̄мэ авьтмусс соа̄г Луя̄ввьр сыйт (рӯшас Ловозерский погост) баяс ля̄йй 1574 ыгесьт ыдта.^[1]

1862 ыгесьт сыйтэсьт ля̄йй Ӣммель Пуадтмуж (рӯшш-на̄лла Богоявленскэ) цэ̄ркав а̄ввьда, а коаммыййма̄нэсьт 1873 ыгесьт со̄нн ля̄йй пассьлуввма.^[1]

1877 Печора ёг рынҍтэнҍ авьтмусс ыжэм я яран пӣррас Луя̄ввра пӯдтӭнҍ.^[1]

Инфраструктура

Луя̄вьрэсьт ле̄в пӯдзэпынней ко̄лледжь, шко̄ла, лыһцэмпэ̄ҏҏт, поликлиника, ко̄ллм па̄ррнэ са̄д, цэ̄ркав, кӯһт кыррьйпэҏт я «Тундра» колхосс. Ныдтҍшэ Луя̄вьрэсьт ле̄в Культура пэ̄ҏҏт, Куэлнэгк соа̄ме исторья музейй я Луя̄ввьр НКЦ (национальнэ-культурнэ кэ̄сскпэ̄ҏҏт), масьт югкеналшэм культурнэ мероприятьятҍ выгнэтҍ.^[2]

Луя̄вьрэсьт лӣ 16 е̄ттксэдтӭ:

Ва̄ррь (рӯшас Лесная) е̄т.
Вокуев е̄т.
Вуайй (Ручьевая) е̄т.
Данилов е̄т.
Кра̄снэ А̄рмия (Красноармейская) е̄т.
О̄дт (Новая) ет.
Пионерскэ е̄т.
Полярнэ е̄т.
Пуэшенҍ (Полевая) е̄т.
Советскэ е̄т.
Спортивнэ е̄т.
Тӯййшэм (Строительная) е̄т.
Туммплэсь (Дальняя) е̄т.
Умптек (Хибинская) е̄т.
Шко̄льнэ е̄т.
Юрьев е̄т.

Выйемна̄ль

Альтмусс рӯввьт чуэкас станция лӣ Пудзэва̄ррь 80 километрасьт вуаррьяс Луя̄ввьр сыйт райесьт.

Луя̄вьр райя вуайй автобусэнҍ Пӯдзэва̄ресьт я Мӯрман ланӭсьт ко̄сстэ. Пӯдзэварь я Луя̄вьр сыйт кэскэсьт пэ̄йель Рӣввьт сыйт манн ушш такси №231. Мӯрман ланҍ я Луя̄ввьр сыйт кэскэсьт манн ушш такси №234; ва̄рр Мӯрмнэсьт ва̄ллт 3 ча̄сс.^[3] Автостанция Луя̄вьрэсьт элля, пугк автобус вӯллькэв я е̄ссклэннтэв сыйт кэскэсьт Пионерска е̄ттксасьт.^[4]

Луя̄вьрэсьт вуайй такси ня̄ввэ. Ныдтҍшэ сыйтэсьт лӣ ӣжесь е̄рапоррт.