Wp/sel/Пиле̄д

< Wp‎ | sel
Wp > sel > Пиле̄д

Пиле̄д, Пиле̄ды, Пиледэ̄ (шё̄ш.), Пил эд, Пи́гыл эд (чум.), Пӣй Е̄ды, Пӣй Кый Е̄ды, Пӣккой Е̄ды (сӱ̄с.) — на э̄д Ӄалпат чвӭ̄чыӷыт Топӄый ӄа́дырӷыт, 1992-2017 по̄дэлаӷыт Пиле̄дый ӄу́лат э̄дэль чвӭ̄ч та́ӄӄылзат. На вес кыба ́э̄дэль чвӭ̄ч Топӄый ӄа́дырӷыт э̄за.

Пиле̄ды Ӄолдэн та̄д ӧтопӄыт амда, Пряк кын ак топӄӭт.

Пиле̄дэӷыт

Ого́т (1989-2006 по̄дэлаӷыт) шё̄шӄуй шэ̄ о̄ӷылҗэшпи̇ ма̄тӄыт Пиледэ̄ӷыт о̄ӷолалҗышпат.

105 ӄулат (2016). Омби̇́ (2020 по̄тӄыт) ако 15 ӄу́ла Пиледэ̄ӷыт варка́т. О́ккыр ла́ӄу э̄я. Та́ыт ай ара́т каэ́ска Казранэ́дэӷындо Копыло́вканд Пиледэ̄ӷыт удре́шпа. Биле́тат мер тэт тон салква́ э̄я.

Ого́тыль варкынди̇́ ӄу́лат че̄нҗыла Пиледэ̄т тя̄тEdit

  • Ильина Галина Николаевна, Ӄалпат, 22.03.2020

«Манна̄ни̇ надыртэ - Пиледэ̄»
Кужат мат кыба э̄зак, мат Пиледэ̄ӷыт варкызак. Пиледэ̄ э̄за варӷ э̄д: о̄ӷолҗэшпи̇ ма̄т, клуб, интернат, тэбылӄула ӄвӭлчызат, кыбандла э̄зат. Мат оккырни̇ тарбак, кандук ми санҗырзаут, олгот пармыт няжырзаут, пактырзаут, ӄвӭлчызаут. Таыт чобырп вадэшпызат, каптэ, тев, манд, ӄалҗыр, неж. Элавем мижут ишпызаут мадё̄нд сурульдигу, о̄ӷылҗызат тя̄ччыгу тӱлсэӷындо, кыба сурулап квадэшпыгу. Мӣ надырзаут кве̄ссэдигу алаголап. Ӱ̄ди̇мыӷыт тӱ̄лап тя̄дызаут. Ӄула лӭрзат, межалбызат. Вес ӄуланан ма̄тӄыт оккырни̇ те̄ӷмы и ӄвӭл э̄за: тодла, петтяла, ӄазала, нодыла ай шё̄шӄуй кай э̄за.
Котик э̄зат шё̄шӄуй чардье̄ла ай котик ӄыба̄мыла. Вес ляӷала э̄зат ай а̄ндалби̇ э̄зат. Арамби ӄула шарватпызат ай кыбалӭ̄рикалап лӭ̄рзат шёшӄуй таре̄дык. Кыба̄мылат ӭҗла куналҗимбат, по̄тла кӯннымбат. Фотокарточкала ай шёшӄуй ӭҗла калымбат.
Мат ни̇к кыгак, штоп ӄула мина̄ни̇ э̄дэнд маннымбат ай сайла табланан те̄лышпат.

  • Яковлева Татьяна Николаевна, Казранэ́д, 24.03.2020

Ми – онҗ ӄу́ла Пиледэ̄ӷындо э̄яут.
Кессе́к кве̄динди̇ чвӭ̄чыӷыт мина̄ни̇ чардье̄т э̄д Пиледэ̄ а̄мда, манна̄ни̇ онҗ ӄу́лат э̄д. Ӧдэ̄шпле манна̄ни̇ а́выт те̄ӷмып, мат э̄дып на̄дырымбам. Аве́м Ижу́чкина Таисья Дмитриевна (Кириллова ара́т таре̄) э̄дэӷыт те̄лымба. Ӄолд ай ӄуналҗибыди̇ Пряк э̄я, на кыге́ ча̄гыркус, ай мӣ наття̄т ча̄җыккус ню̄җып падя̄лгу… Пряк ай Ӄолд манна̄ни̇ онҗ ӄу́лап ӄвӭ̄лзэ авыра́лҗышпызат.
Манна̄ни̇ ара́гала ай пая́гала кундо́к Пиледэ̄ӷыт те̄лымбат. Табла́ ко́тик э̄зат: шё̄шӄула Езенгины, Ижучкины, Тобольҗины, Кирилловы. Манна̄ни̇ аве́м Таисия ӯдис, кужа́т мӧ̄д э̄за. Манна̄ни̇ адя́м Костя мӧ̄дыччынди̇ ӄуп э̄за, табни̇ орден мемба́т. Аве́м ай авына́з Ми́трий аттармо̄ӷыт ӄвӭ̄лп ӄваткуза́т Нярӷ ӄа́ӷлытӄо. Пая́га Ню́ра онҗ ӄвӭ̄лчыкус, лӭ̄рлап лӭ̄рле кыба́ндзэ ча̄җыкус. Табла́ на̄дырзат ӄо́зырчыгу, чайм ӱдыгӯ, шарва́тпугу.
Тапте̄л мӣ о̄ӷылҗымбаут, то̄ кванба́ут, ӯдяут – лечи́мби̇, о̄ӷылҗыккунди̇, ме̄рышпи̇ ӄу́ла. Танымба́ут, ляӷа́лат таре̄ э̄яут...