گریشا میکاییلیزادە (1308 لە دشەمە - 1378 لە سنە) ڤیۆلۆنژەن تاجیکستانی بۊ ک لە شار سنە لە خوەرھەڵات کوردستان ژیاد و لە رادیون و تلەڤیزیۆن پارێزگەێ کوردستان کار کردیاد.
ژیان edit
گریشا میکاییلیزادە لە ساڵ 1308 کووچی ھەتاوی لە شار دشەمە لە وڵات تاجیکستان ھاتە دنیا. بنەماڵەی لە ساڵ 1314 ھەنەی گریشا 6 ساڵە بۊ کووچ کردنە شار کرماشان و دۊاێ چەن ساڵیش چینە ئڕاێ شار سنە و لەورە نیشتەجێ بۊن. گریشا میکاییلیزادە لە شار سنە چیە فێرگە (مەدرەسە) و لە دەورەێ سەرەتایی ڤیۆلۆنێگ سەند و دەس کرد وە فێربۊن ڤیۆلۆن.
میکاییلیزادە وازبۊش کردیە، ک ڕووژێگ لە پسا لە ناوەین دارەیل ڤیۆلۆن ژەنیە ک وەناکاو پیاێگ وە دڵنگ نزامی لە پێشت دارێگ تیەدە نۊای. گریشا ترسیە وەڵێمم پیاگە وە مێرەوانی وە پێ ئۊشێد ک ئەی بەزمە بایەد ئەیجوورە بژەنێد و یارمەتیی دەێد. گریشا وەتیە ک پاش زانسم ئەو پیا حەسەن کامکار بۊە و لە ئەۊ چۊ یەکەمین مامووساێ خوەی ناو بەێد.
گریشا میکاییلیزادە وانەخوەندن خوەی لە شار سنە تواو کردیە و لە ساڵ 1333 لە فێرکردن و ئیوەتکردن (ئامووزشت و پەروەرێشت) سنە وە خزمەت گیریاس و 27 ساڵ چۊ فێرکەر (موعەلم) ھونەر و مووسیقی و سروود لەورە کار کردیە و لە ساڵ 1360یش خانەنشین (بازنشەست) بۊە.
میکاییلیزادە لە سەرەتاێ دامزریاێن رادیون سنە لەورە کار کردیە و وەر لە ئەوەیش لە رادیون ئەرتەش، ک ھەفتەێگ یەی ڕووژ لە شەوەیل شەمە بەرھەم داشتیە، کار ژەنیاری کردیە و ئەندام ئورکێستر رادیون سنە بۊە. لە ساڵ 1350 ک تلەڤیزیۆن ناوەند پارێزگەێ کوردستان کەفتە ڕێ، لە بەش مووسیقاێ ئەی تلەڤیزیۆنیش کار کردیە.
گریشا میکاییلیزادە گوورانیەیل کوردی فرەێگ ڕێک ھاوردیە و لە گوورانیەیل دەنگچڕەیل ھەرەناسیاێ کورد ژەنیاری کردیە. کارەیلی لە ئارشیڤ رادیون و تلەڤیزیۆن سنە مەوجوودە.
گریشا میکاییلیزادە لە ڕووژ 17 فەروەردین ساڵ 1378 لە شار سنە کووچ دۊایی کردیە و ھە لەورە وە خاک سپاریاس.