دۊەتەڵەی کرمیت‌فرۆش (وە دانمارکی:Den Lille Pige med Svovlstikkerne) ناو چیرۆک کورتێگ لە نۊسەر و ئەڵبەستوان وەناوبانگ دانمارکی هانس کریستیەن ئاندێرسێنە. ئەی چیروکە ئڕا یەکوم جار تەوەسوت سارۆ خوسرەوی وە کوردی خوارگ تەرجومە بی.
دەق چیروکەگە edit
شەو ساڵ تازەی زایینی بۊ. وەفر لە سەر واری. هەوا فرە سەرد بۊ.
یەی دۊەت بۊچگ ژار و نەدار وە سەر رۊت و پای پەتی، گل خواردیا لە سەر خیاوانەیلْ سەرد شارا. دۊەتەڵە سەرپایە کونەگان داڵگێ لە پای بی، بەڵام ئەڕای فرە گەورە بین و وەختای هەنگاو هەڵگرت لە پای کەنیان. لە سەرمایا هەردگ پای سوورەو بۊن. چەن پاکەتێگ کرمیت خستبویە ناو بەروانکە بۊچکەڵەگەی وەرقەوێیا و وە نیاز بی، بفرۆشێدەیان، بەڵام هیچکەس دەنکێگ کرمیت لە لێ نەسەندوی.
پڕۊکە پڕۊک وەفر واریە ناو قژەدریژەگەیا. لە دەروەچ ماڵەیل، ترۊسکەی رۆژنایی دیار بی و بوو خوەش قاز برژیای هاتیادە لۊتێیا.
دۊەتەڵە لە کوڵەسۊکێگ لە ناوێن دو ماڵا، گرمۆڵە و کۊژ خوەی کرد. نەوێرس بچووتەو ئەڕا ماڵ، وە خاتر ئەوەیکە هیچ لە کرمیتەگانێ نەفرۆشتوی و رخێ لە ئەوە چێ باوگێ بکوشیدێ.
دەسەیل بۊچکەڵەی لە سەرمایا تەزۊن. فکرەوکرد ئەگەر کرمیتێگ ڕۆشن بکەد، دەسەیلێ گەرمەو بوون. کرمیتێگ کڕانە دیوارەگەیا و دایرسانەی. دۊەتەڵە خەیاڵ کریات لە وەر یەی ئاگرواچ ئاسنین دانیشتێیە. گوڕاڵەی ئاگرواچەگە فرە تینێ گەرم و پڕخوەش بی. دۊەتەڵە پاگانێ داکیشا تا گەرمەو بن، بەڵام کرمیتەگە کوشیاوە و ئاگرواچەگە لە وەر چەوێیا هاتە گوما. کرمیت ترەک دەم دا. ئێ جارە خەیاڵ کرد ها لە ناو ئوتاقێگ! چەوێ کەفتە مێزێگ ک سفرەی چەرمگێگ لە بانێ داخریاوی و وە چینیی تەرک، رازیاۊدەو. قاز برژیایێگ وە گەرد هلۆ و سێف‌باخییا نریابۊتە ناو دەوریێگ. لە ناکاوا قازەگە لە دەوریەگە پەڕیەوخوار و دەس کردە گاتە گات و هەڵقون داقون و چێ وەرەو لای دۊەتەڵەی ژار و نەدار. چەقۆ و چنگاڵێگ لە ناو پشت و مازگ قازەگە بی. بەڵام لەو دەما کرمیتەکە کوشیاوە و دۊەتەڵە هەنای هاتەوخوەی نوڕست چە ها لە پەنای دیوارە سەردەگە. دۊەتەڵە کرمیتێگ تر دەم دا. دەسوەجی خەیاڵ کرد، لە بن دار قەشەنگ کریسمس دانیشتێیە. هەر دو دەسێ وەرەو دارەگە بەرزەو کرد، بەڵام کرمیتەگەی کوشیاوە. وریسکە و بڵاچەی دار کریسمس، چییە کەشکەشی ئاسمانا و لە ئەنجاما بینە ئاسارە. یەکێگ لە ئاسارەگان داچۆڕیا و یەی کڕ ڕۆشنْ دریژ و تەسک، خستە رۊ ئاسمانا. دۊەت بۊچگ لە وەر خوەیەو وەت: هەتمەن کەسێگ ها لە دەم مەرگ. دایەپیرەی دایم ئەو چشتە وەتیادە پێ- هەر وەختێگ ئاسارەیگ داچوڕیەت، رۆحێگ هەڵفڕێ و هێزەو گرێ وەرەو لای خودا. دۊەتەڵە، کرمیتێگتر کڕانە دیوارەگەیا و رۆشنی کرد. هەنای کرمیتەگەی وە خاسی گڕ گرت، چەوێ کەفتە دایە خاس و مێهرەبانەگەی. دۊەتەڵە چڕی ئەو دایە پیرەگەی: دایە پیرە... دایە پیرە وەلا بوەرەم مەیلەم وە جێ. من زانم ئەگەر کرمیتەگەم بکوشیەێتەو، تۆیش گوم کەم، هەرلەیوا کە ئاگرواچە گەرمەگە قاز بریانیەگە و دارەگەورە و تەرکەگەی کریسمس گوم کردم. دۊەتەڵە - هەرچێگ کرمیت مابۊد - ئاگریان دا. ئەو تواست کارێگ بکەد ک دایەپیرە وە تەنیا نەیلیتەی جێیەو. دایەپیرە دۊەتەڵە گرتەو باوش و گەرد یەکا باڵەو گرتن و چین وەرەو کەشکەشانی ئاسمان. چین ئەڕا شوونێگ ک دی نە سەرمایان بی و نەیش لە ورسیەتی زگ جەڕ دان. ئەوان چین ئەڕا لای خودا. رۆژ دوایی دۊەتەڵە لە کوڵەسۊک ناوێن ماڵەگە لە سەرمایا رەقێیەو بردۊ و زەردەخەنەیگ لە سەر لێوێ نەخش بەسابۊ. روخساری سوور سوورەو بۊد. چەن دەنک کرمیت لە ناوەی کلکەیل دەسێ سزیاوین. یەکێگ وەت: هەتمەن خوازییە خوەی گەرمەو بکەد. بەڵام هیچ کەسێگ نەزانست ک لەو شەوا دۊەتەڵە وە چەوەیل خوەی چەنێگ چشتەیل رەنگین دییە.