حەسەن حەبیبی (وە فارسی: حسن حبیبی)، (١٢٩٤ لە کرماشان - ؟ لە ؟) چالاک سیاسی کومونیست کورد و یەکێگ لە ئەندامەیل گورووێ پەنجا و سێ کەس بۊیە.
چالاکی سیاسی
editحەسەن حەبیبی لە ساڵ ١٢٩٤ کووچی هەتاوی لە شار کرماشان لە داڵگ پێیا بۊ. ناو باوگی سەیدباقر بۊ. لە سن جوانی چی ئەڕاێ تێران و لەورە دەس کرد وە خوەنین و بۊ وە خوەندەوان مەدرەسە. لەو دەورە وەگەرد تەقی ئرانی و ئەنوەر خامەیی پەیوەندی گرت و هامشوو کردیادە ماڵ ئرانی و لە دانیشتەیل باس و وەتوویش، بەشداری کردیاد. حەسەن حەبیبی چەمکەیل زانستی مارکسیزم لەلاێ ئرانی و خامەیی یاێ گرتیاد و مەجەلەێ دنیا لە مەدرەسە بڵاو کردیاد. لە ماجراێ دەسوەسەرکردن ٥٣ ئەندام گورووێ کومونیستی ک وە پێ وەتیان پەنجا و سێ کەس، حەسەن حەبیبیش دەسوەسەر کریا و کەفتە زندان. تەقی ئرانی لە دادخوازنامەگەی لە حەسەن حەبیبی چۊ یەکێگ لە ئەندامەیل فرقە (گورووێ پەنجا و سێ کەس) ناو تیەرێد. حەسەن حەبیبی لە دادگاێ پەنجا و سێ کەس یەکێگ لە دو کەسێگ بۊ (وەگەرد مەهدی دانشوەر) ک بەخشیا و وە زندان تاوانبار نەکریا، وەلێ ١٨ مانگ لە زندان مەن. لە چارەنۊسی دۊاێ ئازادبۊن لە زندان نەقڵێگ لە دەسڕەس نییە.
لە ئەندامەیل گورووێ پەنجا و سێ کەس، هەر وە تەنیا حەسەن حەبیبی کورد و خەڵق کرماشان بۊ، وەلێ عزەتوللا عەتیقەچیش ک خەڵق شار ئسفەهان لە ناوەند ئێران بۊ ماوەێگ لە کرماشان زنەێ کردیاد و لە ماجراێ ڕووژ کارکەر ساڵ ١٣٢٥ ڕێبەری کارکەرەیل شرکەت نەفت وە مل ئەوە بۊ.
سەرچاوە
edit- سلطانی، محمدعلی، احزاب سیاسی و انجمن‌های سری در کرمانشاه، از فراموشخانه تا خانهٔ سیاه: دوره‌های ۵–۱ انتخابات مجلس شورای ملی و فریادگران بر نظام دیکتاتوری از کرمانشاه؛ تهران: مؤسسهٔ فرهنگی نشر سها، جلد اول، چاپ یکم: ۱۳۷۸؛ ص ٢٧٧-٢٧٦.
- ڕێکخریاگ سۆسیالیستەیل ئێران: ڕای دادگا لەوارەێ پەڕگەێ پەنجا و سێ کەس.