Aґафия Гафка Рамач (*17. юний 1931. - †12. октобер 2017.), ґлумица-аматер, длугорочна активна учашнїца у театралним живоце Руского Керестура, окреме у Аматерским руским театру/Руским народним театру (АРТ/РНТ) „Дядя”.
| Aґафия Рамач | |
|---|---|
| Народзена | 17. юния 1931. |
| Умарла | 12. октобра 2017. (86) |
| Державянство | югославянске, сербске |
| Язик творох | руски |
| Школа | основна школа Руски Керестур |
| Период твореня | 1965. - 1989. |
| Жанри | аматерски театер, шпиванє,
орґанизация у култура |
| Похована | у Руским Керестуре |
Биоґрафия edit
Аґафия Рамач (дзивоцке презвиско Рац, Кренїцкого), народзена 17. юния 1931. року у Руским Керестуре. Оцец Янко и мац Ирина родз. Джуня. Аґафия мала ище два шестри, Марию и Мелану. Аґафия ище у младосци, медзи двома шветовима войнами, як шпивачка у тедишнїх хорох, була уключена до културного живота у Керестуре. Шпивац предлужела и у керестурским КПД „Ґабор Костельник“ по Другей шветовей войни, а шейдзешатих рокох прешлого вику була активни член и тедишньго масовного и успишного Мишаного хору Дому култури Руски Керестур.
Аґафия Рац ше 1954. року одала за Йоакима Рамача. У малженстве мали сина Златимира и дзивку Зденку.
Аґафия Рамачова, Гафка, як ю волали и познали и аматере и Керестурци, охабела замерковани шлїд у театралним живоце Руского Керестура – як ґлумица, позарядово добра орґанизаторка и руководителька представох, та и як суфлерка. Була єдна зоз сновательох АРТ „Дядя” (з його двома сценами у Руским Керестуре и Новим Садзе), и на Сновательней схадзки Театра 1971. року була вибрана до першого Управного одбору АРТ „Дядя”, а член Управного одбору АРТ була ище у єдним мандату, од 1975. року. Од 1973. року Аґафия Рамач була и предсидателька Совиту сцени Руски Керестур, познєйше на вецей заводи була член спомнутого совиту сцени, як и других орґанох у АРТ, познєйше РНТ „Дядя“.
Як ґлумица, Гафка участвовала у дзешец театралних представох Керестурскей сцени АРТ „Дядя“, та и у його официйно першей представи „Фараонє” Олексия Коломийца, у режиї Дюри Папгаргая, а як ше познєйше указало, ґлумела праве у тих найвекших, найуспишнєйших и найнаградзованших проєктох тедишнього театра, як цо то „Ожалосцена фамилия”, „Остатня станїца”, „Ревизор”, „Опера за три ґроши”, „Подозрива особа”, „Спитованє и свадзба”… За свойо анґажованє, од АРТ/РНТ достала вецей награди и припознаня.
Аґафия Гафка Рамач умарла 12. октобра 2017. року, а похована є, 13. октобра спомнутого року на теметове у Руским Керестуре.
Ґлумела у тих театралних фалатох: edit
| Рок | Театрални фалат | Улога |
|---|---|---|
| 1970. | Олексий Коломиєц : ФАРАОНЄ | Олена |
| 1972. | Иван Франко: УКРАДЗЕНЕ ЩЕСЦЕ | Настя |
| 1973. | Бранислав Нушич: ОЖАЛОСЦЕНА ФАМИЛИЯ | Вида |
| 1976. | Ерих Мариа Ремарк: ОСТАТНЯ СТАНЇЦА | Кернерова |
| 1977. | Микола Васильович Ґоґоль: РЕВИЗОР | Подофицирка |
| 1978. | Стеван Сремац: ПОП ЧИРА И ПОП СПИРА | Ґабриєла |
| 1979. | Бертолд Брехт: ОПЕРА ЗА ТРИ ҐРОШИ | Бети |
| 1981. | Ежен Лабиш – Марк Мишел: ФЛОРЕНТИНСКИ КАЛАП | Баронка де Шампань |
| 1984. | Дюлио Скарничи – Ренцо Тарабузи: КАВИЯР И ҐЕРШЛА | Дона Илона |
| 1989. | Антон Павлович Чехов: ПИТАНКИ (СПИТОВАНЄ И СВАДЗБА) | Свадзебна |
Литература edit
Дюра Латяк: Аґафия Гафка Рамач,ґлумица-аматер, длугорочна активна учашнїца у театралним живоце Руского Керестура - 50 роки Драмского меморияла Петра Ризнича Дядї, Завод за културу войводянских Руснацох, НВУ Руске слово и Дом култури Руски Керестур, Нови Сад, 2018, бок 179.
Вонкашнї вязи edit
Златни часи руского драмского аматеризма - Аґафия Рамач и Ана Рац, ТВ Нови Сад