| Радио-телевизия Войводини | |
|---|---|
| Тип | радио, телевизия, онлайн |
| Жем | Сербия |
| Доступносц | реґионална |
| Снованє | 29. новембер 1949. рок |
| ТВ станїци | РТВ 1, РТВ 2 |
| Радийски станїци | РНС 1, РНС 2, РНС 3, Орадио |
| Шедзиско | Каменїцка драга 45, Нови Сад |
| Власнїк | Влада Републики Сербиї |
| Одвичательна особа | Ґоран Караджич (ґенерални директор) |
| Датум порушованя | радио: 29, новембер 1949.
телевизия: 26. новембер 1975. |
| Бувше мено | Радио-телевизия Нови Сад |
| Формат Слики | HDTV 1080i |
| Веб сайт | www.rtv.rs |
Радио-телевизия Войводини (РТВ; мадь. Vajdasági Rádió és Televízió, горв. Radio-televizija Vojvodine, слц.Rádio-televízia Vojvodiny, рсн. Радио-телевизия Войводини, рум. Radio-televiziunea Vojvodinei, ромс. Radio-televizija Vojvodinaći) реґийни явни медийни сервис гражданох Войводини. Шедзиско ше находзи у Новим Садзе.
История
Радио-Нови Сад основани по одлуки Главного вивершного одбору Народней скупштини Войводини 1949. року. Одлуку провадзело и ришенє хторе прецизовало же ше роби о „державним привредним подприємству од покраїнскей значносци”. Програма шветочно почала на Дзень Републики 29. Новембра 1949. року и тот дзень ше слави як дзень РТВ-а. Програма радия од початку конципована на пейц язикох: сербскогорватским, мадярским, словацким, румунским и руским.
Радио тиж мал улогу пропаґандного центру, зоз хторого ше одвитовало на обвиньованя сушедних державох Информбироа процив Югославиї, владаюцей КПЮ и предсидателя Републики и Партиї, Йосипа Броза Тита. Тота информативна програма була наменєна нє лєм припаднїком националних меншинох (народносцох) алє и слухачом жемох сталїнистичного блоку. Же то була главна улога радия, видзи ше и зоз того же 01. септембра 1955. року утаргнута програма на сербскогорватским и руским язику (затримана лєм єдна музична емисия), а помоцнєна пропаґанда процив клятвох и дезинформацийох на мадярским, словацким и румунским язику, а дакеди и на ческим язику. Радио-Нови Сад здобул окремни угляд у восточней Европи, прето же давал учасц модерней музики, нєзависней од идеолоґиї, цо нє бул случай у других державох Информбироа. Приєм програми бул на цалей териториї Войводини, през дзень и у сушедних державох, а вноци, пре чисти фреквенциї и вельо ширше. Сербскогорватска и руска програма, после злєпшованя одношеньох зоз СССР-ом и векшу часц Восточного блоку, ознова уведзена.
Совит роботней заєднїци Радио – Нового Саду 1971. року принєсол одлуку о снованю самостойней роботней єдинки – Телевизиї Нови Сад. Скупштина АП Войводини 1972. року принєсла одлуку о прерастаню радия до Радио – телевизиї Нови Сад (скрацено РТНС).
Телевизийна програма ше почина емитовац од 26. новембра 1975. року зоз нового вибудованого будинку на Мишелуку. Першого дня емитована окремна емисия о новосадскей телевизиї, а ютредзень, 27. новембра, патраче на ширшим подручю Войводини мали нагоду патриц перши информативно – политични дньовнїки на сербскогорватским и мадярским язику. Телевизия на початку емитовала програму на пейцох язикох: сербскогорватским, мадярским, словацким, румунским и руским язику, а познєйше и на ромским и українским.
Зоз Републичним законом 1991. року ше меня статус електронских медийох з цильом централизациї и пребераня власносци. Зоз радиодифузних центрох на подручу Републики Сербиї, а то Радио телевизия Беоґрад, Нови Сад и Приштина, 01. януара 1992. року формоване Явне подприємство Радио – телевизия Сербиї (РТС) хторе пребера шицки средства предплати и технїчни капацитети. За часц подприємства, „оперативну єдинку” за пририхтованє и продукцию радийскей и телевизийней програми, затримана назва РТНС, алє нова нукашня реґулатива подполно знєважела здобути права. Од 2006. року РТС ше роздзелює на два явни радио – телевизийни сервиси: Радио – телевизию Сербиї зоз шедзиском у Беоґрадзе и Радио – телевизию Войводини зоз шедзиском у Новим Садзе. РТВ урядово почала зоз роботу 26. юния 2006. року.
Под час НАТО бомбардованя 1999. року будинок Телевизиї Нови Сад на Мишелуку подполно руйновани, а заняти роботнїки благочасово евакуовани. Зоз бомбардованьом руйновани и векшина давачох радио габох алє будинок радия нє очкодовани. Будинок телевизиї на Мишелуку нє обновени так же ше телевизийна програма пририхтовала и емитовала зоз будинку НИС-а (Нафтна индустрия Сербиї) у центру Нового Саду. Будованє нового будинку на Мишелуку закончене 2019. року и у нїм такой зоз роботу почали робиц радио и администрация, а телевизия познєйше, у януару 2021. року[1].
Язики
Радио – телевизия Войводини емитує програму на осем язикох: сербским, мадярским, горватским, словацким, руским, румунским, ромским, а од 2011. року и на нємецким.
Дзепоєдни ТВ емисиї ше емитую зоз знаковним язиком. Окрем того ше емитую и програми у продукциї Deutsche Welle на анґлийским язику зоз титлом на сербским язику.
Радио
РТВ у власносци ма шлїдуюуци радио-станїци:
• РНС 1, на сербским язику
• РНС 2, на мадярским язику
• РНС 3, на горватским, словацким, руским, румунским и ромским язику
• Орадио, на сербским язику
Телевизия
Активни станїци:
• РТВ 1, на сербским язику
• РТВ 2, на сербским язику и язикох националних меншинох
Станїци хтори вецей нє активни:
1999. до 2006.
Пред трансформацию до Радио-телевизиї Войводини, РТНС, у рамику РТС-а, мала два станїци:
• ТВ Нови Сад 1
• ТВ Нови Сад 2
По 1999.
Пред НАТО бомбардованьом, РТНС мала два канали:
• ТВ Нови Сад
• ТВ Нови Сад плус
Визуелни идентитет
Кажда фарба на лоґоу означує окремни канал. Белава означує РТВ 1, желєна РТВ 2, жовта РНС 3, помаранчецова РНС 2, червена РНС 1, а лилова фарба означує веб-сайт.
Литература
- Др Душан Попов, Телевизија Нови Сад, Енциклопедија Новог Сада, књига 28, Нови Сад, 2007.
- Др Душан Попов, Радио-Нови Сад, Енциклопедија Новог Сада, књига 22, Нови Сад, 2003.
- Мр Сања Бошковић и Маријана Римић, Продукциони код ПЗ, Медиа Арт, Нови Сад, 2010.
Вонкашнї вязи
- [1] Урядови вебсайт