Wp/rsk/Препилка

Препилка
Наукова класификация
Домен: Царство: Тип: Класа: Ряд: Фамилия: Род: Файта:	Eukaryota Animalia Chordata Aves Calliformes Phasianidae Coturnix C. coturnix
Биномне мено
Coturnix coturnix

Опис

Звичайна препилка (лат. Coturnix coturnix) – файта птици зоз фамилиї фазанох, з численима подфайтами. Найменша є зоз шору квочкох. Розширена є у Европи, Африки и Заходней Азиї. Найчастейши обиталища єй житни поля и ровнїни з пажицами.

Препилка – мала птица длугока 17 цм и чежка 95–150 ґ. Розпон кридлох єй 32–35 цм. Пирє єй жовкастей (окер) фарби, верх глави, хрибет, пирє над хвостом и верхнє пирє хвоста ма крижом цми и шветли кафово смуги и пеги, за очми ма червенкасту смугу. Самец ма цмочервенкасти „лїцаˮ, джубок червенкасти, подбрадок и гарло чарни. Самичка ше розликує од самца: ма блядожовкасти подбрадок и гарло, а на долнєй часци цела и на бокох ма чарно-кафово пеги. Животни вик препилки преценює ше на 10 роки. Вона птица селїдбенїца, а при селєню часто страда. Жими препровадзує у Африки. Природни нєприятелє єй жвири и птици хватачки. Препилку чежко обачиц, бо вецей ходзи як цо лєта и скрива ше у желєнїдлу. Препилка ше карми зоз нашенями, пупчами и инсектами хтори лапа по жеми. Кед дозрею жита, препилки ше баржей кармя и швидко тию же би, од конца авґуста, мали моци одлєциц до цеплих крайох.

Самец препилки

Розмножованє

Сезона парованя препилкох у маю. Теди, накадзи трава подрошнє, самци починаю путьпурутькац и бориц ше медзи собу за самици. Самци нє церпя других самцох у присуству самицох док ше парую. Вони гласнєйше путьпурутькаю од самицох: зоз путьпурутьканьом означую свою територию. Путьпурутьканє препилкох чуц на коло пол километра. Шейсц до осем тижнї по парованю самица до гнїзда направеного зоз трави знєше од 6 до 20 блядожовти або брудножовти вайца зоз чарнима пегами и шедзи на нїх 16 до 18 днї. Гнїздо ше находзи под гущаву, охранєне од хватачох. Самица вишедує млади без участвованя самца. Препилчата ше тримаю коло мацери коло три тижнї, а вец поставаю самостойни и починаю лєтац. Самички ше нїжно стараю за младих, а дакеди прилапя и цудзи препилчата хтори остали без мацери.

Загроженосц

Ловарски здруженя и здруженя за защиту птицох у нас у стаємним зраженю: Ловаре твердза же препилки нє загрожени, а орнитолоґи – же ше їх число зменшує пре хаснованє хемикалийох у польопривреди, пре зменшованє простору за гнїздзенє и пре нєконтроловане ловенє.

Препилково месо у даєдних крайох вельки деликатес. Препилково вайца подобного смаку як и курово, лєм маю менєй холестеролу од курових. У даєдних крайох ше препилково вайца предаваю и у дутянох.

Людзе досц часто тримаю препилки як любимцох, бо ше вони лєгко ховаю у завартим. Самци у клїткох гласно путьпурутькаю (з путьпурутьканьом приволую самици).

Японска препилка

Окремна файта препилки то японска препилка (лат. Coturnix coturnix japonica). Вона жиє у Япону и у Сибиру. Пирє єй жовтокафовей фарби, а под оком ма билу точку. Хова ше припитомена, як домашня птица. Єй вайца и месо богати з високовреднима состойками за чловеков орґанизем, змоцнюю имунитет и пошвидшую виздравйованє хорих.

Вонкашнї вязи

Препилково вайца

Препелица, Википедия на сербским язику

Prepelica, Википедия на горватским язику