Wp/rsk/О. Михайло МУДРИ

О. монсиньор Михайло Мудри (*30. децембер 1874.-†13. октобер 1936.) длугорочни парох керестурски, редактор, публициста, перши предсидатель Руского народного просвитного дружтва (РНПД)


Михайло Мудри

Народзени	30. децембра 1874.
Умар	13. октобра 1936. (62 роки)
Державянство	Австро-Угорске кральовство, Югославия
Язик творох	руски
Школа	Ґимназия Винковци, Заґреб
Универзитет	Римокатолїцка теолоґийна семинария, Заґреб
Богослужел	1900-1936
Поховани	15. октобра 1936, Руски Керестур

Биоґрафия edit

Фамелия Мудрого з о. Михайлом Мудрого (у штредку), коло 1902 року, после пошвецаня за паноца

Народзел ше 30. децембра 1874. року у Руским Керестуре. Родичи оцец Янко и мац Мария (народзена Роман) Мудрого. Основну школу закончел у своїм валалє при славному учительови Петрови Кузмякови. Першу класу ґимназиї, закончел вєдно зоз владиком Дионизийом Нярадийом у Винковцох, а познєйши класи у Заґребе (1895) як питомец нашей семинариї. Богословию закончел на Римокатолїцкей теолоґийней семинариї у Заґребу (1895-1900). За сващенїка є, як нєоженєти, пошвецени у Дюрдьове 21. октобра 1900. року. Пошвецел го крижевски владика Юлий Дрогобецки.

Роботна кариєра edit

Ище як неоєрей бул меновани за актуара владическей канцелариї у Крижевцох, а 1902. року постава душпастир у Прґомелю (1901-1910), администровал и Дишник, а доходзел и до Липовлянох.

Млади Михайло Мудри, под час школованя за паноца

Од 12. марца 1912. року вон администратор „in spiritualibus“ у Руским Керестуре, од 10. януара 1918. є „in materialibus et in spiritualibus“, a oд 12. фебруара 1919. року постава керестурски парох. Мудрого барз почитовали у ватиканских кругох. З декретом Святого отца од 1. марца 1924. Михайло Мудри постал тайни „коморник“ Його святосци папи Пия ХІ цо му дало право на титулу монсиньора.

Зоз його заслугу отворени у Керестуре манастир чесних шестрох служебнїцох 1924. року, по чим є у Керестуре и найкрасше запаметани. Уведол и дзепоєдни богослуженя и швета до церкви, хтори ше и нєшка почитую.

На Сновательней схадзки Руского народного просвитного дружтва (РНПД) 2. юлия 1919. року вибрани є за предсидателя^[1] и тоту длужносц окончовал до його шмерци 1936. року. Вон ясно формуловал и винєсол цилї новооснованого Дружтва:дац нашим дзецом кнїжки до рук, же би мали з чого учиц, просвищовац ше и розвивац; дац и одроснутим кнїжки до рук же би нє забули тото цо научели у школи, и же би ше и далєй учели и просвищовали. А цо ше дотика язика, и ту Михайло Мудри бул ясни: шицко тото треба робиц на мацеринским язику, хтори и дзеци и одроснути найлєпше розумя.^[2] Його становиска о язику мали вельки уплїв на будуци напрям културного и националного живота югославянских Русинох. Вон свой народ представял як южно-славянских Русинох або як Руснацох, хтори ше пре ґеополитичну локацию розвили до “окремного конара народу Русь”. Гоч доказовал же Руснаци мали вязи и зоз Русами и зоз Українцами, язики тих двох народох им цудзи та вони треба же би мали “свой власни литературни язик”. Мудри свойо попатрунки применєл у пракси зоз пририхтованьом школского буквара з Михайлом Поливком (Буквар за южно-руски основни школи, 1921) и зоз даваньом порива Ґаброви Костельникови же би написал ґраматику (1923), хтора мала постац литературни стандард Руснацох. Мудри обявел и даскельо звити з путованьох и, за рочни руски календар, серию статьох о шветовей ґеоґрафиї (“Жем и єй жителє”, 1925-35) и популарну историю швета (“История швета у малих образох”, 1924-43). Свойо написи найчастейше обявйовал у „Руских новинох“ и Руским календаре.

Як предсидатель РНПД старал ше же би шицки плановани акциї на хасен руского народу нє остали лєм плановани та укладал вельо труду и способносци же би вони були витворени.^[3] Старал ше о ширеню дїялносци РНПД по шицких местох дзе були нашо парохиї, як и о материялней бази за тоту дїялносц. У перших рокох роботи РНПД постарл ше же би ше з церковней каси у Руским Керестуре видвоєло векшу суму пенєжу за потреби роботи РНПД, обяшнююци крижевскому владиков же "у церковней каси народни пенєж" та го мож похасновац за народни цилї.

Вельо роки ше дописовал зоз др Гавриїлом Костельником , и прилапйовал його поради у вязи зоз програмну дїялносцу РНПД. Свойо написи найчастейше обявйовал у Руских новинох и Руским календаре.

Народни донатор edit

Подаровал вельки суми пенєжу за роботу Руского народного просвитного дружтва, та так перша антолоґия рускей поезиї и прози „Руско-українски алманах” скоро у цалосци виплацена з його власного пенєжу.За купованє Народного дому и на друкарню подаровал 35.000 тедишнї динари, а понеже нє мал своїх нашлїднїкох, церкви и Просвити охабел и цали свой рухоми и нєрухоми маєток.

Умар у Руским Керестуре 13. октобра, а поховани є на керестурским теметове 15. октобра 1936. року.^[4]

Литература edit

1. о. проф. Др Роман Миз: Священїки дакедишнього Осєцкого викарията; видавателє: Парохия св. Петра и Павла, Нови Сад и „Максима“ друкарня и видавательна хижа, Петроварадин, 2016, б. 236-237.

2. Дюра Варґа, “Початки национално-културного руху при Руснацох у Югославиї”, Шветлосц, XXVII, 4 (Нови Сад, 1989), 509-540;

3. Дюра Папгаргаї, “Михайло Мудри – живот и дїло”, у Руски календар 1995 (Нови Сад, 1994), 96-112.

Жридла и вязи edit

о. Михайло МУДРИ, биоґрафия на НАР

Вонкашнї вязи edit

Петро Кузмяк, перши школовани учитель у Руским Керестуре, биоґрафия на НАР

Др Гавриїл Костельник, биоґрафия на НАР

Ґалерия edit

Гавриїл Костельник и о. Михайло Мудри у Руским Керестуре
Нащива львовского митрополита Андрия Шептицкого Рускому Керестуру. О. Михайло Мудри шедзи други з права.
Парох о. Михайло Мудри и керестурски учителє на початку 1930-тих
О. Михайло Фирак, о. Михайло Мудри и о. М. Костюк
Надпис

Надпис