Wp/rsk/Михаил А. Поливка

Mихаил A. Поливка (*10. марец 1868. - †12. марец 1944.) учитель, управитель основней школи у Руским Керестуре, автор учебнїкох, дзецински писатель, публициста

Михаил А. ПОЛИВКА
Народзени	10. марца 1868. року
Умар	12. марца 1944. (76 р.)
Державянство	австроугорске, югославянске
Язик творох	русински, руски
Школа	Учительска школа у Ужгородзе
Период твореня	1890 - 1931
Поховани	у Руским Керестуре
Припознаня	Meталия заслужного учителя у Kральовини СГС

Биоґрафия

Учительски колектив  у Руским Керестуре 1912. року Стоя: Константин Петриґала, Дюра Баконї, Дюра Манойлов, Иван Шандор и Осиф Фа Шедза: Веруна Гарди, учителька, Ирена Рот родз. Джуня, забавиля, Михаил Поливка, управитель, о. Дюра Биндас, катехета и Наталия Джуня, учителька

Mихаил A. Поливка народзени 10. марца 1868. року у учительскей фамелиї у Maлей Брежнїци (Земплинска жупания, Прешов, Угорска, тераз Словацка). Дзецинство препровадзел у валалє Буковцу. Як и його старши брат Иван, и Михаил ше опредзелєл исц по шлїдох власного оца учителя. Учительску школу закончел у Ужгородзе 1882-1890 року а потим ше Михайло Поливка врацел на родзену Прешовщину же би преподавал у русинских основних школох дзе кратши час робел як учитель у Великим Липнику и Дреници.

Бул замерковани як барз активни медзи народом та є уж 1892. року поставени за пивцоучителя (1892-1900) до єдней грекокатолїцкей парохиї у Скеюшу у Банату у южней Мадярскей (нєшкайши Scăiuş у Румуниї) дзе робел по1901. рок. Дo Руского Keрестура приходзи зоз фамелию 1. септембра 1901. року на длужносц управителя державней и предлужней школи цо совисно окончовал по 1925. рок. Од 1925. по 1931. Михаил Поливка бул управитель тарґовецкей школи.

Михаил А. Поливка и його супруга Єлена (родзена Петриґала) мали седмеро дзеци. Марґита закончела студиї восточних язикох и робела у Будимпешти на универзитету, Ирина пошла як млада до Америки, там ше одала и предлужела живот. Єлена (Илонка) закончела фармацию у Колошваре, тримала апатику у Руским Керестуре и одала ше за Константнина Солонара. Олґа умарла як школярка ґимназиї. Андрей (Ендре) закончел електротехнїку у Праги а жил и робел у Паризу, у Французкей. Владислав (Лаци) бул будовательни инженєр, дипломовал у Праги а жил и робел у Будимпешти. Наймладши Владимир дипломовал право на Беоґрадским универзитету, докторовал на Сорбони у Паризу а робел у Югославиї.

Читанка за трецу класу южно-руских основних школох видата 1920. року

Автор перших руских учебнїкох

Як добри учитель и педаґоґ, Михаил А. Поливка, по потреби школских власцох, oкончовал и длужносц школского надзорнїка.

Михаил Поливка бул активни член Руского народного културного дружтва Просвита (основаного 1919) и потримовал його циль же би ше учебнїки обявйовали по руски. Вон тото витворел у пракси бо зложел перши учебнїки за руски школи: Читанку за III класу южно-руских основних школох (Сримски Карловци, 1920), Читанку за III и IV класу южно руских основних школох (Сримски Карловци, 1924) и зоз о. Михаилом Мудрийом написал и Буквар за южно руски основни школи (Сримски Карловци, 1921). Буквар ознова видати 1925. и 1929. року.

Буквар за южно-руски основни школи з 1928. року

Бул добитнїк Meталиї заслужного учителя у Kральовини СГС, писал и сотрудзовал у Руским народним календаре (oд 1921), у „Руских новинох” (од 1924) и дзецинским часопису „Наша заградка” (од 1937). Поливково тексти писани на народним руским, алє нє з українски ориєнтовану ортоґрафию хтору предложел Ґабор Костельник, алє баржей зоз “традицийну карпаторуску/русинску” ортоґрафию.

Михаил А. Поливка написал Историю народней школи у Руским Керестуре, хтора обявена (у двох часцох) у Руским календаре РНПД (Руски Керестур 1933. и Дяково 1934. рок). Кед ше ма у оглядзе же то бул початок 20. вику, кед було мало фаховей литератури з тей обласци, а Руснаци попри шицким тим нє мали нїяку периодику (часопис, кнїжки) о школстве, вец мож повесц же Поливка бул зачатнїк рускей педаґоґийней думки и перши автор студиї (обсяжнєйшей хронїки) о рускей школи на тих просторох.

Бул почитовани як всестрани културно–просвитни роботнїк и народни предняк.

Михаил А. Поливка умар у Руским Керестуре 12. марца 1944. року, дзе є и поховани.

Литература:

Библиоґрафия: Дюра Папгаргаї, Вредни народни просвититель: сторочнїца народзеня Михайла Поливки, Шветлосц, VI, (Нови Сад, 1968), 289-291;

Дюра Варґа: Перши написал и зложел руски школски кнїжки, Стодвацец рочнїца народзеня Mихаила Поливки (1868-1988), Шветлосц 4, Руске слово, Нови Сад, 1988, б 435–464.

Ирина Папуґа: Михаил А. Поливка: История народней школи у Руским Керестуре, Studia Ruthenicа 7, Нови Сад, 1999-2000, б. 36-51.

О Михаилови А. Поливкови було слова и з нагоди його 130-рочнїци народзеня, кед 1998. року у Новим Садзе отримана Науково-фахова конференция под назву Просвитни живот Руснацох у прешлосци и нєшка. Теди о його просвитней дїялносци бешедовали Леона Гайдук (Буквар Мудри – Поливка зоз 1921. року у його значносц у описменьованю Руснацох) и Ирина Папуґа (Михаил А. Поливка: История народней школи у Руским Керестуре). Роботи обявени у Зборнїку Studia Ruthenicа 7, Нови Сад, 1999-2000, б. 36-51).

Вонкашнї вязи

Михаил А. Поливка: История народней школи у Руским Керестуре, Руски календар РНПД, перша часц, Руски Керестур, 1933, б. 105-114

Михаил А. Поливка: История народней школи у Руским Керестуре, Руски календар РНПД, друга часц, Дяково, 1934, б. 138-150.

Ґалерия

• 
  Учитель Михаил Поливка зоз школярами 1924. року
• 
  Олґа, Єлена, мац Єлена Поливка, Владислав (Лаци), Марґита, Иринка, шедзи Андрей, 1905. рок
• 
  Константин Солонар, дзивка Єлена,  Єлена Солонар, апатикарка,  син Владимир, Михаил и Єлена Поливка, Владимир Поливка, нєпознати, 1940. рок
• 
  Константин Солонар, Михаил Поливка и Владимир Солонар, 10. януар 1941. року
• 
  Михаил Поливка зоз унуку Єлену Солонар, 1939. рок