Wp/rsk/Митро Надь

Митро Надь (*4. новембер 1886 - †8. фебруар 1962), ремеселнїк, културни дїяч у Петровцох и руски поет

Митро Надь
Народзени	4. новембра 1886.
Умар	8. фебруара 1962.
Державянство	австроугорске, югославянске
Язик творох	руски
Школа	основна и скравецко ремеселска
Период твореня	1922 - 1962.
Жанри	ремесло, култура, литература
Поховани	Петровци (Горватска)

Биоґрафия

Митро Надь ше народзел 4. новембра 1886. року у Миклошевцох (Горватска), у худобней наднїчарскей фамилиї. Оцец Янко и мац Маря (дзивоцке презвиско Семан) хлєб зарабяли на вуковарским маєтку ґрофа Елца. Митро остал без оца кед му було три роки. Основну школу започал у Миклошевцох, а закончел у Петровцох. Скравецке ремесло виучел у Шваба Антеса, у Вуковаре. Як калфа ходзел по швеце и робел у Заґребе, Ґрацу, Бечу и Стразбурґу. У австрийских городох добре научел бешедовац по нємецки, котри започал учиц ище у майстра док шеґертовал. Бул и учаснїк у Першей шветовей войни, перше на галицким, а вец на италиянским фронту. Од 1922. року робел як приватни скравец у Петровцох. Ту постал и єден з найзначнєйших активистох Руского народного просвитного дружтва (РНПД).

После Другей шветовей войни бул єден з найвреднєйших активистох Рускей матки, а у свой час и длугорочни предсидатель КУД „Яким Гарди“ у Петровцох. 

Литературна творчосц

Першу писню („Загучали гори“) обявел у Руским календаре за 1937. рок, а предлужел у нїм обявйовац по 1940. рок. После войни Митро Надь свойо писнї обявйовал у Народним календаре  од 1957. по 1963. рок, а у часопису „Шветлосц“ од 1952. року, и у „Руским слове“. Заступени є и у даскелїх антолоґийних виданьох нашей поезиї.

Социялна поезия Митра Надя у найвекшей мири индивидуализує того поету у рускей литератури медзи двома войнами. Медзитим, тоти писнї обявени аж после войни, у лєпших условийох за социялну литературу. Слики социялних обставинох у тей лирики Митра Надя  вязани за час медзи двома войнами. Як наднїчар на маєткох и пустарох ґрофох Елца и Кениздера Митро Надь почувствовал, як и його родичи, цо значи буц класно експлоатовани. У векшини його социялних писньох Надь остава на становиску християнского социялного гуманизма, на становиску по хторе найдалєй могол сцигнуц чловек у рамикох идейних рушаньох яки були теди у РНПД "Просвита".

Социялна поезия Митра Надя у рускей литератури у Югославиї нє мала предходнїкох, алє мала шлїдбенїкох.

Поета Митро Надь остава у паметаню по своїх двох двох писньох то писнї Паразити и  Завичай свой любим, а ширше по своєй социялней лирики. Надь утемелєл  єден цек у рускей поезиї ткв. "литературу поетох и роботнїкох" (литературу на марґинох фолклора), без свидомосци о творчих конвенцийох зоз хторима ше служел.

Умар у Петровцох 8. фебруара 1962. року, дзе є и поховани.

Литература

1. Др Юлиян Тамаш: История рускей литератури, Завод за уџбенике и наставна средства – Београд, 1997, б. 107-109 и 583-584.

2. Штефан Гудак: ПЕТРОВЦИ, жридло и розсаднїк рускей и українскей култури, просвити и уметносци у Републики Горватскей, Видаватель КУД „Яким Гарди„ Петровци, 2004, особлїво бок 296.

3. Митро Надь: Бакарни дзвон за Дунайом, уводна статя Дюри Папгаргая под насловом; „Бакарни одгук дзвона з гевтого боку Дуная“, „Руске слово“, Руски Керестур, 1967, боки 7-15.

4. Антолоґия поезиї бачванско-сримских руских писательох, „Руске слово, Руски Керестур, 1963, боки 54-66.

5. Дюра Папгаргаї: Антолоґия рускей поезиї, „Руске слово“, Нови Сад, 1984, боки 28-33.

6. Моцни оддзвон социялних акцентох, „Шветлосц“ ч. 1/1968, боки 50-51.

7. Любка Фалц: Поезия и проза Русинох и Українцох у Горватскей, Вуковар, 2000, боки 10-19.