Микола Сеґеди (*3. юлий 1927. - †8. фебруар 1988.), учитель, новинар, писатель-гумористи
| Микола Сеґеди | |
|---|---|
| Народзени | 3. юлия 1927. |
| Умар | 8. фебруара 1988. (61) |
| Державянство | югославянске |
| Язик творох | руски |
| Школа | Учительска школа у
Сримских Карловцох |
| Период твореня | 1950. - 1986. |
| Жанри | просвита, новинарство,
гумористична проза |
| Поховани | на руским теметове
у Дюрдьове |
Биоґрафия edit
Микола Сеґеди народзени 3. юлия 1927. року у Дюрдьове. Оцец Янко и мац Паулина (Пава) родз. Корпаш. Микола Сеґеди закончел основну школу у Дюрдьове, потим ше уписал до нїзшей ґимназиї у Бечею, а познєйше прешол до Нового Саду, дзе ю и закончел. Дальша животна драга одведла го до Ужгороду, дзе ше уписал до пивцоучительскей школи. Кед почала Друга шветова война, врацел ше дому и предлужел школованє у учительскей школи у Сримских Карловцох. Микола Сеґеди знова претаргнул школованє вєшенї 1944. року, кед пошол, як 17-рочни леґиньчок, до народноошлєбодительней войни. Нєодлуга Микола бул ранєти у босутских лєсох у Славониї. По законченю войни предлужел школованє у учительскей школи и постал учитель.
Микола Сеґеди ше оженєл зоз Марию родз. Пушкаш и у малженстве мали сина Звонимира и дзивку Зденку.
Як го живот под час школованя водзел по рижних местох, так ше то предлужело и у його службованьох. Перше роботне место Миколи Сеґедия було у Руским Керестуре, дзе єден кратки час бул директор основней школи, вец прешол до Коцура и робел як учитель. Потим Микола бул учитель у Дюрдьове и Новим Орахове, а вец прешол до Мошорину, дзе знова бул директор школи. Ту Микола Сеґеди и закончел зоз просвитарску роботу, бо ше 1969. року врацел жиц до свойого родного места Дюрдьова, а службованє предлужел у Новим Садзе у НВП „Руске слово”, точнєйше як новинар у тедишнєй „Пионирскей заградки”, дзе и закончел свой роботни вик. Без огляду же вецей нє робел як учитель, Микола Сеґеди нє престал робиц зоз дзецми, лєм ше им пошвецел на иншаки способ. По конєц його живота волали го „учитель”.
Як новинар Микола Сеґеди у дзецинским часопису вельо писал за дзеци, алє ище вецей о дзецох. Власни виданя нє мал, окрем статьох друкованих у „Пионирскей заградки”. Микола Сеґеди писал и драмски слички од хторих єдна з найпознатших „Мижо путує на Мешац”, а бавела ю дзецинска драмска ґрупа у рамикох Културно-уметнїцкого дружтва „Тарас Шевченко” зоз Дюрдьова. У „Пионирскей заградки” му пар роки обявйовани и приповедки за дзеци о нашей прешлосци под назву „Моя улїца дакеди”. Микола Сеґеди прекладал и драмски тексти на руски язик.
Творец кооперанта Федора edit
Окрем роботи з дзецми, друга преокупация Миколи Сеґедия були людзе. Тоти нашо, звичайни. З оглядом же на школованю, а ище вецей у роботи Микола Сеґеди контактовал по рижних местох з рижнима людзми, мал нагоду упознац їх живот, бриґи и радосци, та вон шицко тото преточел на свой способ до гуморескох под назву „Кооперанта Федора”. Свойо гуморески о кооперантови Федорови Микола Сеґеди пласовал каждей другей нєдзелї прейґ габох Радио Нового Саду. И так полни 14 роки. Кооперанта Федора вироятно знали скоро шицки Руснаци, алє хто вон насправди бул, велї нє знали. Як сам Микола споминал, при явних наступох, кед го видзели, даєдни людзе були розчаровани бо обчековали параста хтори при руским пецу франтує зоз свою Юлу.
Микола Сеґеди бул член Управного або Вивершного одбору Фестивала култури "Червена ружа" як и Комисиї за "Червене пупче" и Комисиї за манифестацию "Одгуки з ровнїни".
Микола Сеґеди бул член Дружтва за руски язик, литературу и културу од 1974. року.
Микола Сеґеди бул познати гумориста медзи Руснацами, бул новинар, бул писатель, алє мож повесц же найменєй од шицкого бул поета. А, спрам шицкого, Миколу Сеґедия його Дюрдьовчанє буду найвецей паметац по єдней писнї хтору пошвецел свойому милому валалу и шицким цо у нїм жию. Писня ше вола Дюрдьове мой и роками є найслуханша шпиванка о тим валалє.
Микола Сеґеди умар 8. фебруара 1988. року у Дюрдьове.
Поховани є на тамтейшим руским теметове.
Литература edit
1. Александра Лендєрː Литературно-историйни дискурс драмского додатку часописа "Шветлосц" у периодзе од 1952. року по 2010. рок, Завод за културу войводянских Руснацох, Нови Сад, 2017. б. 15. ISBN 978-86-89945-15-7.
2. Зденка Сеґедиː Микола Сеґеди - 80 роки од народзеня, Studia ruthenica 12 (25). Нови Сад, Дружтво за руски язик, литературу и културу, 2007. боки 134–135.
Вонкашнї вязи edit
Микола Сегеди, пририхтал Igor Kercsa. Вiкiпедiя, 28. юнiя 2022.
Афич, Марияː Вичне дзецинске сцеканє од школи: КУД "Тарас Шевченко" з Дюрдьова, Микола Сеґеди "Мижо путує на мешац", режия Яким Чапко
Vera Salonski: Djurdjove moj - (live) - NNK - EM 03 - 01.10.2022 - Канал "Никад није касно", YouTube, октобер 19, 2022, автор тексту за композицию Микола Сеґеди.