| Мегучкаре | |
|---|---|
| |
| Кральовство | Животинї (Animalia) |
| Оддзельок (часц) | Mollusca |
Опис edit
Мегучкаре то водово, ридше сухожемни животинї, зоз мегким [lat. mollis = мегки] целом и шкарупину котра го защицує. Кажда класа мегучкарох ма окремни план збудови, алє шицки класи маю заєднїцки шлїдуюци прикмети:
- билатерално су симетрични организми;
- цело ше им состої зоз: глави, плащу, талпох и шкарупини;
- нервна система ґанґлионерна;
- кревова система отвореного типу;
- целом слабо розвити и находзи ше лєм коло шерца и полних шлїжнїкох;
- екскресия ше окончує з помоцу метанефридийох, котри конєчни продукти метаболизма зоз целома одводза до плащовей глїбки;
- Дихаю з помоцу жаброх, плюцох лєбо з цалу поверхносцу цела.
Глава им баржей або менєй ясно оддвоєна од цела и на нєй ше находза осети (пар тентакулох – пипалки зоз оцелами – єдноставнима очми) и устови отвор. У устовим отвору ше находзи тарлочко, котре збудоване зоз зубкох котри служа за розмелчованє поживи. За усним отвором гарло, далєй ше предлужує на єдняк, штреднє черево до котрого ше улїваю пар шлїжнїки – печинка. Штреднє черево ше предлужує на заднє черево, котре ше з аналним отвором вилїва до плащовей глїбки. Черево змесцене у жалудковим мещку котри ше находзи на хрибтовей, заднєй часци цела. Плащ то скоряни ранєц котри обмотує жалудкови мещок и завера плащову глїбку. У тей глїбки ше находза жабри, анални отвор и отвори метанефридийох и полних одводох. На бруховей часци цела ше находзи талпа котра служи за рушанє. Плащ вилучує шкарупину котра подполно лєбо часточно прекрива цело. Шицки тоти часци цела можу, при розличних файтох мегучкарох, буц вименєни, а даєдни можу и хибиц.
Кревова система отворена цо значи же ше крев вилїва до пражнїнох и лакунох коло органох, односно нє постої капиларне розменьованє материйох. Крев (гемолимфа) зоз жаброх сцигує до предкоморох шерца, а зоз нїх до комори. Зоз комори руша аорта котра розноши крев до пражнїнох и лакунох коло органох и тканьох, одкаль ше по артерийох доводзи ознова до жаброх. Так през шерцо преходзи лєм оксиґенована крев.
Нервна система ґанґлионерна, творя ю даскельо пари ґанґлийох: главово, талпово, бочни (находза ше на боку при черевох) и жалудково. Шицки ґанґлиї медзи собу повязани и од нїх рушаю нерви за шицки органи.
Респирацию окончую зоз жабрами (ктендиями) котри ше находза у плащовей глїбки. Вода уходзи до плащовей глїбки дзекуюци роботи мохоткох на жабрових филаментох, а после оконченей розменки ґазох виходзи през виходни сифон до вонкашньохо шредку. Копново мегучкаре дихаю прейг нукашнєй поверхносци плащовей глїбки котра составена зоз мрежи кревових судзинох.
Полни шлїжинки змесцени у жалудковим мещку у целому, зоз одводами до плащовей глїбки. При даєдних представительох мегучкарох заступени гермафродитизем.
У рамику типа мегучкарох стретаме ше зоз барз познатима и частима формами як цо то:
- Class Caudofoveata (70 познати файти);
- Class Aplacophora (коло 250 файти)
- Class Polyplacophora (хитони, 600 файти)
- Class Monoplacophora (11 живи файти)
- Class Bivalvia (коритка)
- Class Scaphopoda (350 файти, шицки морски)
- Class Gastropoda (шлїмаки, коло 40.000 - 150.000 файти)
- Class Cephalopoda (главоножкаре)
- Class Rostroconchia (фосили)
Литература edit
- Dogelj, V,A: Zoologija beskičmenjaka, Naučna knjiga, beograd, 1971.
- Krunić, M: Zoologija invertebrata 1, Naučna knjiga, Beograd, 1977.
- Krunić, M: Zoologija invertebrata 2, Naučna knjiga, Beograd
- Mariček, magdalena, Ćurčić, B, Radović, I: Specijalna zoologija, Naučna knjiga, Beograd, 1986.
- Matoničkin, I, Habdija, I, Primc - Habdija, B: Beskralješnjaci - bilogija nižih avertebrata, Školska knjiga, Zagreb, 1998.
- Marcon, E, Mongini, M: Sve životinje sveta, IRO Vuk Karadžić, Beograd, 1986.
- Petrov, I: Sakupljanje, preparovanje i čuvanje insekata u zbirkama, Biološki fakultet, Beograd, 2000.
- Radović, I, Petrov, Brigita: Raznovrsnost života 1 - struktura i funkcija, Biološki fakultet Beograd i Stylos Novi Sad, Beograd, 2001.
Вонкашнї линки edit
- http://www.manandmollusc.net/ Mollusc Mollusk Mollusks 1999
- https://web.archive.org/web/20051101043328/http://www.zivotinjsko-carstvo.com/bioskolos/beskicmenjaci%203.php Bioscolos Арховиоване 2005-11-01 na Wayback Machine-u