Wp/rsk/Ирина Давосир-Матанович

Ирина ДАВОСИР - МАТАНОВИЧ

Ирина ДАВОСИР - МАТАНОВИЧ (Дюрдьов 4. януар 1933. - Нови Сад, 4. марец 2007.) оперска шпивачка, сопран, примадона Сербского народноги театра

Ирина ДАВОСИР МАТАНОВИЧ
Народзена	4. януар 1933.
Умарла	4. марец 2007. (74)
Державянство	Югославия, Сербия
Школа	Штредня музична школа, Нови Сад
Универзитет	Ґлазбени завод, Заґреб
Период твореня	1953 - 1982
Жанри	Оперска шпивачка, примадона
Похована	у Новим Садзe

Биоґрафия

Ирина Давосир Матанович

Народзела ше 4. януара 1933. року у Дюрдьове у учительскей фамелиї. Уж як школярки другей класи ґимназиї пришол до вираженя єй музични талант. Прето ше уписала до Штреднєй музичней школи Исидор Баїч у Новим Садзе у класи Божени Дубскей, а школованє предлужела у Заґребе при Ґлазбеним заводзе (Академия) дзе єй 1952. и 1953. року професор шпиваня бул Мариян Майцен.

По законченю музичней школи поволана є до опери у Сараєве а у медзичаше ше явела на авдицию и до новосадскей Опери и такой у септембре 1953. року була прията до Сербского народного театра у Новим Садзе. Ту остала аж по пензионованє у януаре 1982. року. Була одата за Светислава Матановича (бас-баритон) вельорочного члена Опери СНТ.

Наступи

Як солистка новосадскей опери госцовала у Беоґрадзе, Заґребе и Любляни, алє и у Болгарскей, Єгипту, Мадярскей и Италиї. Окреме у италиянскей преси достала вельо ласкави оцени за свойо шпиванє. Ирина Давосир - Матанович шпивала зоз оперскима гвиздами як цо то були Радмила Бакочевич и Милка Стоянович.

Мала красну сценску появу, приємно офарбени лирски сопран и витворела вецей як 30 улоги на матичней сцени дзе єй партнере були велї углядни домашнї и иножемни оперски уметнїки. Єй ґлумецки талант и сценски шарм окреме приходзели до вираженя у оперетох. Була замеркована шпивачка руских народних шпиванкох, о чим шведоча числени аудио знїмки хтори ма зняти у архиви Радио Нового Саду.

Попри оперских улогох, Ирина Давосир Матанович наступала з успихом и на концертох, з ариями и шпиванками Моцарта, Шуберта, Шумана, Брамса. Рахманїнова, Чайковского, Дворжака, Коньовича, Барановича и других, як домашнїх так и иножемних композиторох.

Ирина Давосир Матанович у Руским Керестуре

Улоги

Найволєла улогу Мими у „Боемох”, алє ю публика найбаржей запаметала по улоги Лиї у „Турандоту”. Шпивала як Дюла у Ґотовцовей опери „Еро з гевтого швета”, Чо Чо Сан у опери „Мадам Бетерфлай”, Дездемона (Отело), Марґарета (Фауст), Елизабета (Дон Карлос), Адалдїза (Норма), Неда (Паяци) Лиза (Пикова дама), Керубин (Фиґарова женїдба), потим у оперох „Кавалерия Рустикана”, „Паяци”, Татяна у„Евґений Онєґин”, Флорами (Мала Флорами), „Вертер” и велїх других.

Награди

Освоєла трецу награду 1960. року на змаганю младих шпивачох у Будимпешти. Достала на дарунок годзинку од предсидателя Йосипа Броза Тита кед у Карадьордєве на даскельо заводи шпивала по руски. Даруюци єй годзинку, вон гварел: То је она мала што пјева русински.

Добитнїк є Златней медалї Йован Дьордєвич (1993), найвисшого припознаня Сербского народного театру, як и других наградох.

Ирина Давосир - Матанович єдна з найуспишнєйших повойнових руских уметнїкох у обласци музичней култури котра досягла найвисши професийни уровень примадони и єдна од познатих интерпретаторох рускей, українскей и сербскей шпиванки як на отвореней сцени, так и у студию Радио Нового Саду.

Умарла 4. марца 2007. року.

Жридла и вязи

Кратка биоґрафияИрини Д. Матанович на Википедиї по сербски

Ирина Давосир МАТАНОВИЧ, портрет єдней диви

Вонкашнї вязи

ДАВОСИР-МАТАНОВИЋ Ирена, Енциклопедија Српског народног позоришта, Нови Сад

Ирина Давосир МАТАНОВИЧ, биоґрафия на НАР

Ирина Давoсир Матанович, Доприношенє Руснацох розвою Нового Саду, аудио сериял , Новинарска асоцияция Руснацох, продукция 2016

Ирина Давосир Матанович и Дюзепе Кампоро у опери Боеми

Ирина Давосир Матанович шпива Еро зоз гевтого швета

ПАНОНИЯ шпива Ирина Давосир Матанович

БЛЇЩАЦИ ГВИЗДОЧКИ шпива Ирина Давосир Матанович

Литература

1. Дюра Латяк. Календар 2008, боки 390-391.

2. Дюра Латяк: „Глас Союзу“ ч. 10/2007, б 45.