Инж. Юлиян Малацко (*4. юлий 1908. - †21. юлий 1997.), професор на Електротехнїчним факултету и на Факултету машинства и вибудови ладьох Всеучилїща у Заґребе. Снователь ФК Русин у Руским Керестуре 1923. року. Фаховец хтори 1936. року демонтировал и пренєсол друкарню, хтору теди купело РНПД, зоз Дякова до Руского Керестура, ознова ю зложел и пущел до роботи.
инж. Юлиян Малацко edit | |
|---|---|
 | |
| Народзени | 4. юлия 1908. року |
| Умар | 21. юлия 1997. (89) |
| Державянство | мадярске, югославянске,
горватске |
| Школа | Подполна реална ґимназия |
| Универзитет | Technische Hochshule Прага,
Всеучилїще у Заґребе, Факултет електромашинства |
| Период твореня | 1936-1978 |
| Обласц науки | електротехнїка и машинство |
| Наукови ступень | позарядови професор |
| Поховани | у Заґребе |
Биоґрафия edit
Юлиян Малацко народзени у Руским Керестуре 4. юлия 1908. року як наймладше дзецко у Малацковей фамелиї. Його родичи, оцец Янко Малацко и мац Ана (народзена Папрадванї), мали ище дзивку Меланку (хтора була найстарша), як и двох синох - Дюру и Еуґена (Йовґена).
Малацкова фамелия вжала 1906. року под кирию салаш хтори ше находзел медзи Керестуром и Кулу, алє бул блїжей ґу Кули. И кед пришол час же би Юлиян почал ходзиц до школи родичи го уписали до школи у Кули. Понеже Бачка була часц Австроугорского царства официйни язик теди бул мадярски. Мадярски язик бул, прето, и язик настави у школи у Кули до хторей Юлиян Малацко почал ходзиц у чаше найгоршей войновей бурї I шветовей войни. Два роки вон ходзел до Кули до мадярскей школи, а вец ше фамелия врацела до Керестура и Юлиян ше преписал до керестурскей школи, тиж так на мадярским язику. У старших класох основней школи родичи послали Юлияна же би приватно учел и нємецки язик, так же у хвилькох кед закончел основну школу, вон уж бешедовал три язики.
Року 1918, ище шветова война тирвала, Юлиян пошол до Сеґедину до ґимназиї а бивал у официрским конвикту. Року 1921. зоз Сеґедину Юлиян преходзи до школи у Илоку и бива у франєвацким манастире. Року 1923. Юлиян Малацко преходзи на школованє до Заґребу до Першей заґребскей реалней ґимназиї. Юлиян Малацко лєгко учел язики, вше бул у класи найлєпши зоз французкого язика. Дзекуюци познаваню французкого язика вон познєйше зоз французкого преложел на руски язик театрални фалат Ж. Б. Молиєра “Скупенда”. На тот текст була порихтана и театрална представа а од приходу з єй приказованя 1923. року ше купело опрему и дреси за Фодбалски клуб “Русин” у Руским Керестуре хторому Юлиян бул снователь и перши предсидатель, а секретар и касир бул Кароль Арт.
Кед закончел пияти класу ґимназиї, Юлиян Малацко одходзи зоз Заґребу до Крижевцох, та потим назад до Илоку, та до Вуковару, зоз Вуковару назад до Илоку та ознова до Крижевцох, дзе матуровал 1927. року.
После матури у ґимназиї Юлиян Малацко ше опредзелєл за студиї електротехнїки, а понеже достал и препоруку владики др. Дионизия Нярадия, бул прияти на Ecole de Politechnique у Паризу у Французкей. Медзитим, його оцец Янко Малацко мал иншаке думанє, жадал же би його син студирал ґеодезию та нє пущел сина на студиї до Паризу. Юлиян Малацко ше, понеже под’єднак добре бешедовал и нємецки и французки, уписал на студиї електротехнїки на Technische Hochshule у Праги.
Два роки студийох закончел у Праги, а вец дознал же исти таки студиї єст и у Заґребе та ше преселєл до Горватскей. Року 1935. Юлиян Малацко дипломовал под порядковим числом 23 и достал званє инженєра електромашинства понеже у Заґребе студиї електротехнїки и машинства були обєдинєни.
Роботна кариєра edit
Єден час Юлиян бул без роботи та добродзечнє пренєсол друкарню хтору теди купело РНПД зоз Дякова до Керестура. Друкарня була у погону та ю требало демотировац, преселїц до Керестура до нароком за тоту наменку вибудованих просторийох и знова поставиц и пущиц до погону. Таки одвичательни роботи звичайно робя окремни фаховци яких у нашим народзе теди нє було. Тей барз одвичательней роботи ше поднял млади керестурски електромашински инженєр Юлиян Малацко. Було то у децембре 1936. року. Вон шицки спомнути машини у Дякове демонтировал и у Керестуре знова зложел.
Юлиян Малацко 1936. року достал роботу у Сименсу д. д. Заґреб, дзе бул задлужени за електромедицински апарати: за рентґенски апарати, кварцни лампи, опрему за зубарски ординациї и подобне. Тото подрозумйовало же мушел пойсц до Нємецкей на специялизацию. Одпутовал там и обишол шицки Сименсово погони и одслухал вецей преподаваня. Под час специялизациї пребувал у Франкфурту, Берлину и Нирнберґу. У Сименсу д.д. Заґреб робел до Крачуна 1946. року кед бул денунцирани же ходзи до церкви та му партизанска управа у Сименсу уручела одказ.
Юлиян Малацко ше винчал зоз Наталию родз. Джуня 24. октобра 1946. року. У малженстве мали тройо дзеци Татияну, Павла и Мирослава (Даниєла).
Юлиян Малацко предлужел робиц у Руским Керестуре як професор у нїзших класох ґимназиї дзе преподавал математику, физику, нємецки и технїчне образованє.
Зоз Руского Керестура фамелия Юлияна Малацки ше 1951. року преселєла до Сиску у Горватскей дзе вон достал роботу у поґону Капиталней вибудови Желєзарнї Сисак. Циль бул звекшанє продукциї, асортиману продукциї и преширенє фабрики.
Штредком 1950. Юлиян Малацко прешол на роботу до Технїчней школи у Заґребе, а оталь пошол за асистента на Електротехнїчним факултету. Там робел по 1964. рок и потим прешол за асистента на Факултет машинства и вибудови ладьох. Кед у Сплиту бул отворени Факултет вибудови ладьох Юлиян Малацко путовал до Сплиту и тримал преподаваня як позарядови професор. Теди преподавал и на Високей технїчней школи у Славонским Броду. Його бувши студенти правели гайзибани, танки, и конструовали и направели перши подполно югославянски трамвай. Познєйше тоту продукцию успишно розвили и правя модерни нїзкопатосови трамваї.
На Факултету машинства и вибудови ладьох Юлиян Малацко робел по 1978. рок кед пошол до пензиї. Теди мал полни 71 рок.
У пензиї бул активни член КУД Руснацох и Українцох Заґреба як член хору и управи. Приходзел каждого року до Руского Керестура на Фестивал култури Червена ружа.
Юлиян Малацко умар 21. юлия 1997. року у Заґребу, Република Горватска.
Литература edit
Дюра Латяк: Руске слово 1945-1985, Нови Сад, 1985, 59. бок: Детально описане селєнє друкарских машинох зоз Дякова до Руского Керестура.
Вонкашнї вязи edit
Поволанка за добродзечни прилоги за купованє друкарнї “Просвити”, Руски новини ч. 7, 1936. рок, 1. бок.
Кратка статя о инж. Малацкови, Руски новини ч. 15, 1937. рок, бок 3.