| Иван Пап | |
|---|---|
| Народзени | 11. юлия 1946 |
| Умар | 22. марца 2021 (75) |
| Державянство | югославянске, сербске |
| Язик творох | руски |
| Школа | Ґимназия, Сримски Карловци |
| Универзитет | Филозофски факултет,
Нови Сад |
| Период твореня | 1970- 2010. |
| Жанри | просвита, култура |
| Поховани | |
Иван Пап (*11. юлий 1946†22. марец 2021), професор у Основней и штреднєй школи Петро Кузмяк, културни дїяч.
Биоґрафия
Иван Пап народзени 11. юлия 1946. року у Миклошевцох дзе його оцец службовал, у вельочисленей священїческей фамелиї од оца о. Владимира (Миклошевчана) и мацери панїматки Татияни (народзеней Шимко з Руского Керестура), як треце од шесцерих дзецох, Иван мал ище двох братох и три шестри.
Основну школу Иван Пап закончел у Дюрдьове дзе його оцец прешол на душпастирску службу, ґимназию закончел у Сримских Карловцох, а студиї историї дипломовал на Филозофским факултету у Новим Садзе.
Роботне анґажованє започал у Кули у Општини у прекладательней Служби, дзе два роки робел як прекладатель на руски язик. Потим прешол до Основней и штреднєй школи Петро Кузмяк дзе робел аж по свойо пензионованє як наставнїк у основней и як професор у ґимназиї, дзе викладал историю. Запаметани останє же з вельким закладаньом на своїх годзинох о националней историї, при школярох пестовал руску свидомосц и любов ґу свойому народу. У школи велї роки водзел историйну секцию, як и шаховску, а анґажовал ше и у Шаховским клубу Русин од самих початкох його снованя дзе активно бавел до 2016. року. Як младши Иван Пап бавел и столни тенис.
Иван Пап бул и активни член Дому култури, односно його Хлопскей жридловей ґрупи, зоз хтору наступал на смотрох, на наших фестивалох у жеми и иножемстве. Попри тим, од самого снованя бул член и Союзу Руснацох Українцох, а зоз своїма фаховима викладами участвовал на велїх сходох. Иван Пап бул, по своїх опредзелєньох, цалого животa активист українскей ориєнтациї медзи войводянскима Руснацами.
Тиж так бул и член Дружтва за руски язик, литературу и културу од 1975. року, и єден з найвреднєйших його членох Секциї у Керестуре. Останє запаметани по числених рефератох з нагоди значних рочнїцох Дружтва и його членох, и визначних културних, просвитних и других дїячох зоз нашей дальшей и блїзшей прешлосци.
У супружестве зоз Марию (родз. Стричко) пожил 48 роки, у малженстве мали дзивку Лесю хтора чесна шестра у василиянским чину.
Иван Пап ше упокоєл 22. марца 2021. року, у своїм 75. року живота. Поховани є на теметове у Руским Керестуре.
Литература
Тамаш, др Юлиян, „Просвитни роботнїки 1944-1991. рокуˮ, Руски Керестур, лїтопис и история (1745-1991), Месна заєднїца Руски Керестур, 1992, бок 414.
Вонкашнї вязи
https://petrokuzmjak.com/primer-strane/ Школа од 1970. по нєшка, вебсайт Основна и штредня школа зоз домом школярох Петро Кузмяк
http://www.druztvo.org/ruski/vidania/Studia%20Ruthenica%2027%202021.pdf Иван Пап (1946-2021), Studia Ruthenica, Дружтво за руски язик, литературу и културу, ч. 27, 2021, б. 152
https://www.ruskeslovo.com/%d1%83%d0%bc%d0%b0%d1%80-%d0%b8%d0%b2%d0%b0%d0%bd-%d0%bf%d0%b0%d0%bf-1946-2021/ Умар Иван Пап, Мария Афич, Рутенпрес, 23. марец 2021.