Дюра Пап (*17. април 1945. - †15. май 2015.), новинар и редактор у НВУ "Руске слово", фаховец у аґрару и дружтвени активиста
Дюра ПАП edit | |
|---|---|
| Народзени | 17. априла 1945. |
| Умар | 15. мая 2015. року (70) |
| Державянство | югославянске, сербске |
| Язик творох | руски |
| Школа | Штредня польопривредна школа |
| Универзитет | Польопривредни факултет, Беоґрад |
| Период твореня | 1973-2011 |
| Жанри | новинарство, аґрар |
| Поховани | Нови Сад |
| Припознаня | Специялна награда за обявени
тексти у новинох "Руске слово", Награда Новосадского сайма |
Биоґрафия edit
Дюра Пап народзени 17. априла 1945. року у Руским Керестуре. Родичи оцец Йоаким и мац Леона родз. Макаї. Дюра мал младшого брата Янка. Основну школу Дюра Пап закончел у Руским Керестуре. После законченей штреднєй польопривредней школи вон ступел на Польопривредни факултет у Беоґрадзе на котрим дипломовал 1972. року.
Роботни вик у новинарстве Дюра почал у Радио Новим Садзе, програми на руским язику вєшенї 1973. року, а од фебруара идуцого року прешол до "Руского слова", дзе робел по авґуст 2011. року кед пошол до пензиї.
У "Руским слове" робел скоро на шицких рубрикох, алє його найвекше доприношенє було на бокох польопривреди. Тоти боки були нє лєм информативни, алє и поучни, бо давал совити преверених фаховцох у аґраре и искуства польопривредних продуковательох. Дюра бул пейц роки и главни и одвичательни редактор Календара (од 1996. по 2000. рок).
Дюра Пап и єден зоз сновательох Дружтва аґрарних новинарох Войводини (ДАН), и бул длугорочни подпредсидатель того Дружтва. През активносц ДАН Дюра провадзел и преношел читачом нови знаня, тренди и технолоґиї у аґраре, та розвой польопривреди у жемох транзициї, алє тиж так и искуства найрозвитших жемох у тей обласци з Данскей, Голандиї, Австриї… Вельке припознанє за аґрар було кед вон, вєдно з предсидательом ДАН, участвовал на 52. IFAJ (Шветовим конґресу аґрарних новинарох) у Ґрацу, у Австриї, 2008. року. Теди ше новини "Руске слово" и Руски календар нашли на провадзацей вистави того Конґреса дзе представени виданя з цалого швета.
Його упарта и квалитетна робота у информованю у тей обласци корунована з двома наградами. Здруженє културних творительох Сербиї "Завичай" и медзинародни фестивал новинарох котри провадза валал и польопривреду 2010. року додзелєли му специялну награду за обявени тексти у "Руским слове". З нагоди ювилея, 75. Медзинародного польопривредного сайма у Новим Садзе, додзелєна му Награда Новосадского сайма за длугорочне провадзенє тей нашей найвекшей манифестациї у польопривреди.
У рамикох нашей култури Дюра Пап ше опробовал як ґлумец-аматер у театралних фалатох ("Ревизор", "Остац у себе", "Жовта") и у даскелїх радио-драмох на Радио Новим Садзе, а тиж так бул вецей роки ґлумец у емисиї "На габох музики и гумору". На Фестивалу култури Руснацох "Червена ружа" и на других културних манифестацийох водзел конферанси. Дюра сотрудзовал и з другима медиями.
Дюра Пап бул оженєти зоз Марию родз. Няради, у малженстве мали дзивчата Анамарию и Ясмину.
Дюра Пап умар 15. мая 2015. року у Ветернику. Поховани є на Городским теметове у Новим Садзе.
Литература edit
Вонкашнї вязи edit
Гласи и часи - 70 роки Рускей редакциї Радио Нового Саду, Новинарска асоцияция Руснацох, Нови Сад, 2019, бок 139.
Умар Дюра Пап, Михал Симунович, Рутенпрес, 16. май 2015.