Wp/rsk/Дюра Пап

Др Дюра Пап (*18. фебруар 1913. - †29. марец 1961.), почитовани дохтор, просвититель жительства у обласци здравства и дружтвено анґажовани роботнїк

Др Дюра ПАП
Народзени	18. фебруара 1913. року
Умар	29. марца 1961. року (48)
Державянство	югославянске
Язик творох	руски, сербски
Школа	Ґимназия у Новим Вербаше
Универзитет	Медицински факултет Универзитета у Заґребе
Период твореня	1939. по 1961.
Обласц роботи	медицина, здравствене просвищованє, дружтвена активносц
Поховани	На теметове у Руским Керестуре
Припознаня	Припознанє од УНИЦЕФ-а за посцигнути резултати у рапидним зменшаню смертельносци новонародзених дзецох

Биоґрафия

Др Дюра Пап (дохтор Пабянка, як го Керестурци волали) народзени у Руским Керестуре 18. фебруара 1913. року. Родичи Дионизий Пап (1883-1936) и Юла народзена Малацко (1893-1962). Дюра мал младших шестру Любицу (Ибольку) и брата Владислава. Дюра Пап основну школу закончел у родним валалє, державну реалну ґимназию у Новим Вербаше (1932.) а студиї медицини у Заґребе 1939. року. Обовязни лїкарски стаж окончел у Вельким Бечкереку (Зренянин), а 1941. року приходзи до Руского Керестура, алє є нєодлуга мобилизовани до войска як резервни официр и лїкар. Єден рок робел на Косове.

Дюра Пап и Ксения Пап родзена Гирйовати ше винчали у Миклошевцох 29. авґуста 1940. року. У малженстве мали тройо дзеци Дюру, Златка и Иринку.

др Дюра Пап у породилишту у Руским Керестуре

По ошлєбодзеню Дюра Пап ше врацел до родного Керестура и у рамикох Здравственей станїци основал Совитовалїще за ваготни жени и положнїци. З нєвистату и практично дзень-а-ноц роботу у Совитовалїщу посцигнул скоро нєвироятни резултати у наступних рокох, як у своїм валалє, так и у сушедних местох: смертельносц народзених дзецох зведзена на нулу. То спричинєло вельку увагу у медицинских кругох того часу за резултати роботи єдного валалского лїкара, та му аж и УНИЦЕФ додзелєл припознанє и даровал амбуланти у Керестуре найсучаснєйшу комплетну опрему за Совитовалїще.

Др Дюра Пап активно участвовал у здравственим просвищованю жительох у Руским Керестуре и у околних местох, бул активни и у дружтвено-политичних орґанизацийох, а бул и одборнїк Скупштини општини.

Др Пап ше нє застановел на тих резултатох, та уж 1950. року обезпечел рентґен апарат, хтори му у дальшей роботи зоз жительством помагал у каждодньовей дияґностики охореньох. Року 1960. пошол до Заґребу на специялизацию з рентґенолоґиї и источашнє робел у Доме здравя “Максимир”, алє ше, нажаль, барз вчас похорел, найскорей од пошлїдкох виложеносци рентґен зарйох з апарату.

Др Дюра Пап грає на труби

Умар у 48. року живота, 29. марца 1961. року. Жителє Руского Керестура, Крушчичу, Бачкого Грачацу и Косанчичу го у барз вельким чишлє випровадзели до вичного дому.

Вонкашнї вязи

Автор нєпознати Руски Керестур (вистка о дипломованю др Дюру Папа), Руски новини за Русинох Югославиї, рок XVI , чис. 24, 16. VI 1939., бок 3.

Автор нєпознати Нови професор (у тексту пише же дипломовал др Дюра Пап), Руски новини за Русинох Югославиї, рок XVI , чис. 30, 28. VII 1939., бок 3.