বাবা, মুঁই তোৰ মতোন হোবাৰ নাপালুং কুনোদিনে
বাবা, মুঁই তোৰ মতোন হোবাৰ নাপালুং কুনোদিনে
বাবা, মুঁই তোৰ মতোন হোবাৰ নাপাইম কুনোদিনে
তোৰ একমাত্ৰ ভাঙা স্বপ্নটায় যে মুঁই
ছটোবেলাৰ থাকিয়ায় মুঁই
সাধাৰণ মানুষেৰ থাকিয়া কিছু আলদা
বেখামা - বেপোৰোৱা
স্বপ্ন দেখা আৰ্ স্বপ্ন হত্যাকৰাৰ ফতুৱা নিশাত উন্মাদ
মানুষে কায়ো কয় আধাপাগল
কায়ো কয় হাফ ব্ৰেইন
আৰ্ কায়ো কয় আসপাগ্লা
কায়ো কয় মাথাৰ কয়েকটা তাঁৰ ছিৰা
ফুল মেণ্টাল্
যায় যি কয় কউক ৰে বাবা
মুঁই মানুষেৰ মতো হোবাৰ নাচাং
মুঁইতো খালি মোৰ মতো কৰিয়ায়
বাচিবাৰ চাং
তুইতো জানিস বাবা
মুঁই অন্যৰ মতো হোবাৰ নাচাং
এমন কি তোৰ মতোনো হোবাৰ নাপালুং কুনোদিনে
মুঁইযে খাৰাব পাং আপোস্ বোলা শব্দটা
মুঁইযে বেয়া পাং হৃদয়ক বন্দোকত থোৱা
মোৰ জৈন্যে তুই অনেক দুখ্যো বুকত নিয়া
মৰুপথত হাটিস
মোৰ জৈন্যে তুই অনেক অপমান মাথাত নিয়া
এই বেইমান দুনীয়াত বেৰাইস
তাৰ পৰেও মোক নিয়া সপোন দেখিস
এতো আপোস্
এৰ পৰেও কেনে মোক ঢেলেয়া নাদিস
তোৰ স্বপ্নেৰ বাগানেৰ থাকিয়া
কেনে ছিড়িয়া নাদিস তোৰ ডায়েৰীৰ পাতাৰ থাকিয়া
কেনে বাবা
কেনে
মুঁইতো আজীবন তোৰ ঋণ পৰিসোধ কৰিবাৰ নাপাইম
তাৰ পৰেও কেনে বাবা
তোৰ বুকেৰ গোপন ডায়েৰীত
মোৰ বেইমান চেহাৰাটা নাকিস্
আৰ্ বেশি আবেকগুলা নাঢালুং
এতো আবেক ৰাখিম কুঠৈ
ৰাখিম কুঠৈ
আৰ্ বেশি নাকং
কোবাৰ জৈন্যে বা বাকী আছেয় কি
মুঁই খালি এইটায় জানুং যে
বাবা, মুঁই তোৰ মতোন হোবাৰ নাপালুং কুনোদিনে
বাবা, মুঁই তোৰ মতোন হোবাৰ নাপাইম কুনোদিনে
✍ কন্দৰ্পজিৎ কল্লোল