ঢং কৰিয়ায় ক একদিন
ঢং কৰিয়ায় ক
ভাল লাগে, ভাল পাং তোক
তোৰ কবিতায় মিটায় মোৰ হৃদয়েৰ ভোক
ঢং কৰিয়ায় ক না নাহইলে
চিগাৰেট নাখাইস, খুউব কবিতা লেখিস
তোৰ সউগ ঢঙে ঢং
মোৰ কবিতাৰ ৰং
ঢং কৰিয়ায় ক
তোক মুই কুনোদিনো ছাৰি যাবাৰ নং
একদিন মুইও ধৰিম ঢং
জীবনেৰ ঢং
মিটি দিম শোষণেৰ চং বং
কাৰো কথায় শুনিৰ নং
কাৰো কথায় ধৰিৰ নং
ঢং কৰিয়ায় নাহইলে একদিন
তুইও আসিস মোৰ বগলত
তোৰ ওঠেৰ গোলাপী প্ৰেৰণা ঢালি দিস মোৰ কলমত
নৌতন কবিতা লেখিম মুই বিপ্লবে
তাৰ পাছত নাহইলে বুউক চাপৰেয়া কয়া উঠিম,
বিপ্লব স্পন্দিত বুউকত মনে হয় মুইয়ে লেনিন
ঢং কৰিয়ায় আয়
সময় চলিয়া আয়
আতাৰ দিনত আতায় ধৰছিল কিছু না দেখাৰ ঢং
বাবাৰ দিনত বাবায় ধৰছিল কিছু নাশুনাৰ ঢং
আৰ মোৰ দিনত সময় যে খুউব অসহায়
ঢং কৰিয়ায় ক একদিন
ভাল নালাগে প্ৰতাৰণাৰ সুৰ
জয় কামতাপুৰ
ঢং কৰিয়ায় একদিন খুলাইম বিপ্লবেৰ সন্দুক
হাতত তুলি নিম বেয়নেট বন্দুক
ঢং কৰিয়ায় একদিন শহৰেৰ দেওআলত লেখিম
Power comes from the Barral of a Gun
ঢং কৰিয়ায় একদিন নাম নিম বাৰী ছাৰাৰ
হয় ইসপাৰ নেহী তো উসপাৰ
নাহইলে কি লাভ আছে সপোনবিহীন কবিতা লেখাৰ ?
ঢং কৰিয়ায় একদিন তাৰা হয়া ভৈলা হ
ভাটি আকাশত
ঢং কৰিয়ায় একদিন সাহস দে মোক সপোনত
ঢং কৰিয়ায় একদিন ৰাস্তা দেখাও মোক অনাগত দিনেৰ
নাহইলে মুইও ধৰিম ঢং
তোৰ বগলত চলি যাওয়াৰ ঢং
শ্মশানেৰ চিতাৰ জুইত ঢালি দিয়া
মোৰ জীবনেৰ ৰং।