ရခိုင်ဘုရင် မင်းဖလောင်းထံမှတောင်ငူဘုရင်(ဘုရင့်နောင်) ကျော်ထင်နော်ရထာထံသို့စာသဝဏ်ပီးပို့ခြင်း edit
တပင်ရွှေထီး မင်းလွန်ပြီးနောက် စစ်သူကြီးကျော်ထင်နော်ရထာရေ တောင်ငူ၊ ဟံသာဝတီထီးနန်းကို(သက္ကရာဇ် ၉၁၃-၉၄၃)ရလီရေ။ မင်းပါကြီးလက်ထက် ရခိုင် သို့ ရောက်စဉ် မင်းဖြစ်မည်ဟောလိုက်ဘူးရေ စကြာဝတေးပုဏ္ဏားကိုဆုပီးလို၍ မှော် ပိစားကို အခေါ်စေလိုက်ရေ။ မင်းဖလောင်းကြီးရေ မှော်ပိစားနန့်အတူ စကြာဝတေး ပုဏ္ဏားကို ထည့်တော်မူလိုက်ရေ။ ထို စကြာဝတေးပုဏ္ဏားနန့်အတူ ဘုရင့်နောင် ကျော်ထင်နော်ရထာထံသို့လည်း စာသဝဏ်ပီး ပို့လိုက်လီရေ။ သဝဏ်စာမှာ-
ရုက္ခသတ သဟဿာနီ၊ ပုပ္ဖရုက္ခောဝရေဘ တိ။
နရသတ သဟဿာနီ၊ ရူပဝန္တောဝရေဘ တိ။
ရူပသတဿသဿာနီ၊ ပညဝန္တောဝရေဘ တိ။
ယင်းသို့ကျမ်းဂန်လာရေနန့်အညီ တစ်ဆင့်ထက်တစ်ဆင့် ချမ်းသာလိုရေ နှလုံးသွင်းလျက် သတ္တဝါရို့အား ထိန်းအပ်ရေတရား မင်းကျင့်မကွာ-
ခန္ဓာနိစ္စ ခယတ္တေန၊ ဘ ယတ္တေန ဒုက္ခာစတေ။
အနတ္တာ အသာရကတ္တေန၊ သမ္ပဇာနောစပဏ္ဍိတောဝေပရေပုနပ္ပုန
ပါဠိတော်အရ ရူပက္ခန္ဓာ၊ ဝေဒနာက္ခန္ဓာ၊ သညာက္ခန္ဓာ၊ သင်္ခါရက္ခန္ဓာ၊ ဝိညာဏက္ခန္ဓာ တို့ရေပထဝီ၊ အာပေါ၊ တေဇော၊ ဝါယော၊ ဓါတ်လေးပါး ပေါင်းစည်းလျက် မပျက် ခိုင်ခန့်ရေသတ္တိကြောင့် သံသရာသတ္တဝါရို့ ဝဋ်တရားကို မြင်လတ်ရေဉာဏ်ဖြင့် မည်၆၉ သူမခြား ရင်တော်သားကဲ့သို့ သင်္ဂဟတရားလည်း ကိုယ်၌မြဲလျက်ရေ သဘောအတိုင်း အခြားပြည်ထောင်မင်းရို့မူလည်း ယင်းသို့တရားမကွာ သာသနာတော်တည်ပါစေရေ မေတ္တာရေဖြင့် ပို့လေ့ရှိရေ မြောက်ဦးမြို့ရွှေနန်းတော်ကြီးရှင် ကြားလိုက်ရေ။ ဟံသာ ဝတီပြည့်သျှင် အကြည်တော်။
သမ္မာသတိ အသိဂုဏ်တော်ကြောင့် သစ္စာလေးပါးတရားကို အလင်းမြင်တော် မူရေမြတ်စွာဘုရားရေ(ကုသလာဓမ္မာ၊ အကုသလာဓမ္မာ) အာဏာပညတ်၊ သတ္တဝါ ကွပ် ဆုံးမတော်မူရေ။ လောကီ၌လည်း တစ်တိုင်းတစ်ပြည် အစိုးရမင်းသာကေ ဆင်း ရဲချမ်းသာ ပြည်သူသတ္တဝါရို့ကို ြုပနိုင်မည်။ တစ်ကြောင်းမူလည်း-
မင်းကောင်းမှ အမတ်ကောင်းရာရေ၊ အမတ်ကောင်းမှလည်း ပြည်သူကောင်း ရာရေ။ မင်း၊ အမတ်၊ပြည်သူညီမှလည်း တိုင်းပြည်သာယာကြောင်း ထုံးဟောင်းရှိရေ။ သို့ရာတွင် အတိသာမိက မင်းသာ မူလအရင်းဖြစ်ချေရေ။ အမတ်နန့်ပြည်သူညီမျှစေ ကာမူ မင်းသွမ်း၊ မင်းဆိုးငြားလတ်ကေ ထို့အတူပြည်သူရို့ဆိုးကြောင်း ကျမ်းဂန်လာ ရေမှာလည်း-
ပုတိမစ ္ဆံကုသဂ္ဂေန၊ ယောနရော ဥပနယှတိ။
ကုသာပိပုတိံဝါယန္တိ၊ ဇဝံဗာလုပသေဝနာ။
ယင်းပိုင်းကျမ်းဂန်လာရေနန့်အညီ မင်းဆိုးမင်းသွမ်းရို့အစိုးရရေ အရပ်ဌာန၌ သူတော်ကောင်းရို့ ရှောင်အပ်ရေကြောင့် မှူးကောင်း၊ မင်းမြတ် ရှိရေတိုင်းပြည်သို့ ထိုသူတော်ကောင်း ကူးပြောင်းသင့်ကြောင်း။ မင်းကောင်း၊ အမတ်ကောင်းရို့ထိန်းရေ
နိုင်ငံ၌ ဘုရားသာသနာတော်တည်ကြောင်းကို- ကျမ်းဂန်လာရေမှာခမာဇာဂရိယုဌာနနံ၊ သံဝိဘ ာဂေါဒယိက္ခနာ။ နာယကဿဂုဏာဧတေ၊ ဣစ္ဆိတဗ္ဗာသတံဂုဏော။
အသိခက်(သိထိုက်)ရေအကြောင်းရှိရေဖြစ်၍ ရှေးပညာရှိရို့ဆို ပြန်ရာ၌ကား- မင်းလည်းမင်းကြမ်း၊ အမတ်သွမ်းနန့်၊ အကျွမ်းမိတ်ဝင်၊ သို့တည်းလျင်မူ ပြည်သူ ရိပွတ် မင်းတည့်မတ်က၊ အမတ်ထို့တူ၊ ပြည်သူမညှိုး၊ စစ်ထိုးမဟိ၊ မရိသတ္တဝါ၊ ရေစာမ ရှား၊ ခိုးသားမပေါ်၊ မြင်မြော်သသူ၊ ကြည်ဖြူမြတ်နိုး၊ ရေခမိုးသို့၊ ပြည့်ြုဖိးစုံလင်၊ တိုင်းခွင် အခြား၊ မင်းတစ်ပါးလည်း၊ သနားမိတ်ဝင်၊ ချစ်ခင်လေးမြတ်၊ လှံ့ပတ်ညာကြေ၊ ြုမို့နေပြည် သူ၊ သျှင်လူရေင်းရေင်း၊ မဂ်လမ်းကြောင်းသို့၊ ထုံးဟောင်းမလပ်၊ ထုံးသစ်ထပ်လျှက်၊ ရှစ်ရပ်ဒိသာ၊ ပွင့်လင်းသာရေ၊ ကမ္ဘာစဉ်ဆက်ဥဒါန်းတည်း။
ဟူ၍ပညာရှိစကားအလာကို ထောက်၍အကြည်တော်လည်း မင်းမည်ကာမဟုတ် မင်းရို့အား ပညာဗလရှိသူဖြစ်ရေ။ သို့ရာတွင်သတိမလစ်စေရာဆိုရေ သူအား ရည်ဘွားတစ်ခု၊ ပြစ်မှုတစ်ရပ်၊ အမတ်ဂုဏ်ရည်ရို့ကို သိစေရေအကြောင်း၌-
ကုဒေနသဉ္စ၊ ကုမတ္တဉ္စ၊ ကုလုကဉ္စ၊ ကုဗန္ဓဝံ။
ကုဒါရဉ္စ ကုဒါသဉ္စ၊ ဒုရုတော ပရိဝဇ္ဇယော။
ကျမ်းလာရေနန့်အညီ မင်းစေမင်းသုံး မူးမတ်အင်္ဂါပြည့်စုံစွာနန့်- လောကီ လောကုတ္တရာ၊ နှစ်ဖြာရေအကျိုးလှစေချင်ကြောင်းကိုရောက်ရင်း မေတ္တာတွင်ထပ်ကာ ပို့ရောက်ကြောင်းကြားလိုက်ပါရေ အကြည်တော်။
မှော်ပိစားလည်းရောက်လီကေ စကြာဝတေးပုဏ္ဏားနန့်အတူ၊ ခစားလီရေ။ ဘုရင့်နောင်ကျော်ထင်နော်ရထာရေ ဆိုခရေ့အတိုင်း ငွေကိုယ်လေးချိန်နန့် ရွှေသပြာ တစ်ရာ၊ စကြာဝတေးပုဏ္ဏားကိုဆုပီးတော်မူရေ။ မြောက်ဦးပြည့်သျှင်နန့်တကွ မြင်းစီး တန်ဆာနန့် လက်ဆောင်ပီးလိုက်ပြီး၊ စကြာဝတေးပုဏ္ဏားကို ပြန်ပို့လီရေ။[1]
ကိုးကား edit
- ↑ ရခိုင်လျှောက်ထုံးများ၊ နန္ဒာထွန်း၊ ရခိုင်သားကြီးစာပေ၊ ရန်ကုန်၊ ဖေဖော်ဝါရီလ၊ ၂၀၀၃
ကျမ်းကိုးစာရင်း edit
- ၁။ ဓညဝတီအရေးတော်ပုံ အသျှင်ကဝီသာရမထေရ်၊ သံတွဲမြို့ နန်းမြင့်စာပေ၊ ၂၂၅-ပန်းဆိုးတန်း၊ရန်ကုန်
- ၂။ မဟာပညာကျော်လျှောက်ထုံး အသျှင်ကတိသာရမထေရ်၊ သံတွဲမြို့။ ဟံသာဝတီပုံနှိပ်တိုက်၊ အမှတ်(၅၃) နတ်မောက်လမ်းသွယ်၊ ရန်ကုန်မြို့။
- ၃။ ရခိုင်ရာဇဝင်သစ်ကျမ်း ဦးစန္ဒာမာလာမင်္ကာရ၊ ရမ်းဗြဲမြို့တောင်(ပထမအုပ်) ကျောင်းဆရာတော်၊ ဟံသာဝတီပုံနှိပ်တိုက် မန္တလေး
- ၄။ ၎င်း-(ဒုတိယအုပ်) -၎င်း-
- ၅။ ဓညဝတီရာဇဝင်သစ်ကျမ်း အထက်ကျောင်းတော်ဆရာတော် ဦးဉာဏ (ပထမတွဲ) ရသေ့တောင်မြို့။
- ၆။ င/မည်ရာဇဝင် ပေမူမှတဆင့်ကူးလျက် ရေးမူ တက္ကသိုလ်များစာကြည့်တိုက်၊ ရန်ကုန်
- ၇။ မင်းရာဇာကြီးအရေးတော်ပုံ -၎င်း-
- ၈။ မဟာရာဇဝင်တော်ကြီး ဦးသာထွန်းအောင် ရခိုင်ပြည်သတင်းစာပုံနှိပ်တိုက်၊ စစ်တွေ
- ၉။ ဝိမလလျှောက်ထုံးများ ပေမူ၊ စာရေးသူထံတွင်ရှိ
- ၁၀။ ဦးဦးသာထွန်း၏ မှတ်စုများ လက်ရေးမူ
- ၁၁။ ဖားပြုတ်ကေရာဇဝင် ပေမူ၊ ဦးပညာစာရ၊
- ၁၂။ င/စည်ရာဇဝင် မဟာမုနိဗုဒ္ဓဝိဟာရကျောင်း၊ စစ်တွေ
- ၁၃။ ရခိုင်ကျမ်းနတ်ဓမ္မသတ် ဦးပညာစာရ၊ မဟာမုနိဗုဒ္ဓဝိဟာရ၊ စစ်တွေ၊ အမျိုးသားစာကြည့်တိုက်၊ ရန်ကုန်
- ၁၄။ သစ္စနိဒါန်းကျမ်း ပေမူ၊ အမျိုးသားစာကြည့်တိုက်၊ ရန်ကုန်
- ၁၅။ ဦးဒိုးဝေရာဇဝင် ပေမူ၊ မြို့မကျောင်းတိုက်၊ တောင်ကုတ်
- ၁၆။ မောင်ပုံရာဇဝင် ပေမူ
- ၁၇။ ကျောက်ရိုးရာဇဝင် လက်ရေးမူ၊ စာရေးသူထံရှိ