တည်နီရာ edit
မြောက်ဦးနန်းတော်ကုန်းဧ့ အရှေ့ဘက် (၁) မိုင်ကျော်ခန့်အကွာ နိမ္ဗူဇာစေတီတော်ဧ့အရှေ့ဘက်၊ မင်းခေါင်ရွှေတူစေတီတော်ဧ့ မြောက်ဘက်တွင် တည်ဟိပါရေ။
ကုသိုလ်သျှင် edit
( ကောဇာသက္ကရာဇ် (၉၃၃) ခု၊ အေဒီ (၁၅၇၁) ခုနှစ်တွင် ဘုရင်မင်းဖလောင်းမှ တည်ဆောက်လှူဒါန်းခ ပါရေ။
သမိုင်းအကျဉ်း edit
ဘုရားအုပ်စေတီတော်ကို ကောဇာသက္ကရာဇ် (၉၃၃) ခု၊ အေဒီ (၁၅၇၁) ခုနှစ်တွင် ဘုရင်စကြာဝတေးမင်းနန့် အိမ်ရှေ့စံမင်းဖလောင်းတို့ စတင်တည်ဆောက်လှူဒါန်းခရေဟု သိဟိရပါရေ။ စကြာဝတေးမင်းလက်ထက်က မပြီးမြောက်ခပနာ ဘုရင်မင်းဖလောင်းမှ ဆက်လက်တည်ဆောက်လှူဒါန်းခခြင်းဖြစ်ပါရေ။ နောင်တော်မင်းစောလှ လက်ထက်က တိုင်းပြည်မငြိမ်မသက်ဖြစ်ခပနာ ထုက္ကန်သိမ်ပုထိုးကို တည်သည့်အခါ ဘုရားအုပ်စေတီတော်ကိုလည်း တိုင်းပြည်မပြိုကွဲရအောင် အထိမ်းအအုပ်အဖြစ် တည်ခသည့်အတွက် ဘုရားအုပ်စေတီဟု ခေါ်တွင်ခြင်းဖြစ်ပါရေ။ ဘုရားအုပ်စေတီတော်နန့်အတူ ကျောက်အုပ်စေတီ၊ အုပ်တော်စေတီတို့ကိုလည်း တည်ဆောက်လှူဒါန်းခရေဟု သိဟိရပါရေ။ ဘုရားအုပ်စေတီပတ်ဝန်းကျင်တွင် မြောက်ဦးခေတ်၌ သံဖိုတိထားဟိခပါရေ။ ဘုရားအုပ်စေတီအောက်ခြေနန့်ကပ်လျက် မြောက်ဘက်တွင် စေတီကုန်းငယ်တစ်ခုဟိပါသေးရေ။ ဘုရားအုပ်စေတီတော်ကို ၂၀၀၃ခုနှစ်က အလိုတော်ပြည့် ဆရာတော်မဟာဝါစက သာမဟာသဒ္ဓမ္မဇောတိကဓဇ ဒေါက်တာဘဒ္ဒတအရိယဝံသကို ဦးထိပ်ထားလျက် တပည့်ဒကာ/ဒယိကာမတိက ထပ်မံလှူဒါန်းခပါရေ။
ဗိသုကာလက်ရာ edit
ဘုရားအုပ်စေတီတော်ရေ ပေ(၅၀) ခန့်မြင့်ရေ တောင်ကုန်းပေါ်တွင် ကျောက်အုတ်တိဖြင့် တည်ဆောက် ထားရေ စေတီတော်တစ်ဆူပင်ဖြစ်ပါရေ။ စေတီတော်အောက်ခြေအချင်း (၄၅) ပေခန့်ဟိပြီး အမြင့်လည်း (၄၅) ပေခန့်ဟိပါရေ။ စေတီတော်အောက်ခြေပတ်လည်မှာ အဝိုင်းပုံဖြစ်ပါရေ။ အောက်ခြေအဝန်းတွင် ဂူငယ် (၂၉) ဂူပါဟိရေကို တွေ့ဟိရပါဧ့။ ထိုဂူငယ်တိထဲတွင် (၃) ပေကျော်ခန့်ဟိရေ ဆင်းတုတော်တိကိုလည်း ပူဇော်ထား ပါရေ။ စေတီတော်ဧ့ အလယ်ဂန္ဓကုဋီတိုက်ထဲတွင် ဉာဏ်တော်(၁၂) ပေခန့်မြင့်ရေ ဘူမိဖဿဆင်းတုတော်ကြီးတစ်ဆူ ပူဇော်ထားပါရေ။ ဆင်းတုတော်ကို ပူဇော်ထားရေ ပလ္လင်တော်မှာ အမြင့် (၃)ပေကျော်ခန့် ဟိပါရေ။ ကြာမှောက်ကြာလန်၊ ရွဲတန်းတိ ဖြင့်တန်ဆာဆင်ထားပါရေ။ စေတီတော်အရှေ့ဘက်တွင် မုခ်ပေါက်ဟိပါရေ။ မုခ်ဦးတွင် ရခိုင်ဗျာလ်ရုပ်နန့် ရှေးခေတ်ရခိုင်စိတ္တလင်္ကာရ အနုလက်ရာတိဖြင့် တန်ဆာဆင်ထားပါရေ။ စေတီတော် ကိုအဝန်းပုံသဏ္ဌာန်နန့် ခိုနန်းချိုး (၈) မျက်နှာပုံသဏ္ဌာန်တို့ဖြင့်ဆင့်ပနာ တည်ဆောက်ထားပါရေ။ အောက်ပစ္စယံမှ ငှက်ပျောဖူးအထိ (၈) မျက်နှာပုံစံတွေ့ဟိရပါရေ။ ကြာဆုံကို ကြာဖတ်၊ ရွဲလုံးတိဖြင့် တန်ဆာဆင်ထားပါရေ။ စေတီတော်အောက်ခြေတွင် ကျောက်ထီးတော်အပိုင်းအစတိကို တွေ့ဟိရပါရေ။ မူလက ဤစေတီတော်ကိုကျောက်ထီးတော်တင်လှူခလိမ့်မည်ဟု ယူဆရပါရေ။ စေတီတော်ကြီးမှာ ခန့်ညားထည်ဝါမှုဟိရေ စေတီတော်တစ် ဆူပင်ဖြစ်ပါရေ။
ကိုးကား edit
မြောက်ဦးဒေသ ရှေးဟောင်းအဆောက်အဦးများ (ရှေးဟောင်းသုတေသနနှင့် အမျိုးသားပြတိုက်ဦးစီးဌာန၊ ယဉ်ကျေးမူဝန်ကြီးဌာန) -၂၀၁၅