ကဗျာဆရာမ နွယ် (စစ်တွေ) ဧ့ ကဗျာတိကို မြန်မာစာပေ ချစ်မြတ်နိုးသူတိုင်း နှစ်သက် မြတ်နိုးကတ် ရေ။ နွယ် (စစ်တွေ)ကား အမိမြေကို ချစ်မြတ်နိုးသူ၊ ကလောင်လက်နက်စွဲကိုင်လျက် စစ်ထွက်ခဲ့သူ ကဗျာ ဆရာမတစ်ဦးပင် ဖြစ်ပါရေ။
နွယ်(စစ်တွေ)ကို (၂၄)ရက်နိန့်၊ မေလ၊ (၁၉၃၂)ခုနှစ်တွင် စစ်တွေမြို့မာ ဦးအောင်ထွန်းဦး၊ ဒေါ်စိန်ပုရို့က ဖွားမြင်ခဲ့ရေ။ အမည်ရင်းက မအုန်းခင် ဖြစ်ရေ။ မအုန်းရေ အသက် (၄)နှစ်အရွယ်ကပင် အစိုးရ ဝန်ထမ်း မိဘတိပြောင်းရွှေ့ရာ မြို့ကြီးတိသို့ ပြောင်းရွှေ့လိုက်ပါ နီထိုင်ခဲ့ရရေ။ သို့ဖြင့် ပုသိမ်၊ မော် လမြိုင်၊ ပဲခူးမြို့ကြီးတိ၌ ပညာဆည်းပူးခဲ့ရရေ။
မအုန်းခင်ရေ ပဲခူးမှ အင်းစိန်မြို့သို့ မိဘတိနန့်အတူ ပြောင်းရွှေ့နီထိုင်စဉ်အတွင်း ဒုတိယကမ္ဘာ စစ်ကြီးနန့် ကြုံတွေ့ခဲ့ရရေ။ ထိုစဉ် မအုန်းခင်ရို့မိသားစု မိတ္ထိလာမြို့အနီး နတ်ကြီးကုန်းကျေးရွာ သို့ ပြောင်းရွှေ့ကာ စစ်ဘေး စစ်ဒဏ်မှ ရှောင်တိမ်းခဲ့ရရေ။ စစ်ကြီးပြီးဆုံးသွားရေအခါမှ ရန်ကုန်မြို့မှ တစ်ဆင့် စစ်တွေမြို့သို့ ပြန်လည်ပြောင်းရွှေ့လာဖြစ်ခဲ့ကတ်ရေ။
မအုန်းခင်ရေ (၁၉၄၈-၅၀)ခုနှစ်တိအတွင်း (၈)တန်း၊ (၉)တန်း၊ (၁၀)တန်းရို့ကို စစ်တွေမြို့၌ တက်ရောက်ခဲ့ရေ။ (၁၉၅၀)ပြည့်နှစ်တွင် ဖခင်ကွယ်လွန်သွားပြီးနောက် ရန်ကုန်သို့ ပြောင်းရွှေ့နီထိုင် အခြေချခဲ့ရေ။ (၁၉၅၅)ခုနှစ်တွင် ရန်ကုန်တက္ကသိုလ်မှ ဘီအေဘွဲ့ ရဟိခဲ့ပြီးနောက် (၁၉၆၃)ခုနှစ်တွင် ဘီအီးဒီဘွဲ့ကို ဂုဏ်ထူးတစ်ဘာသာဖြင့် အောင်မြင်ခဲ့ရေ။ ထို့ပြင် ပညာရေးဒီပလိုမာဘွဲ့ကိုလည်း အင်္ဂ လန်နိုင်ငံ ဘာမင်တန်တက္ကသိုလ်မှ ရယူခဲ့ဧ့။
(၁၉၅၆)ခုနှစ်တွင် ဦးရွှေဇံအောင်နန့် လက်ဆက်ခဲ့ရေ။ ဒေါ်အုန်းခင်ရေ ပညာရေးဌာနတွင် ကျောင်း ဆရာမ၊ ကျောင်းအုပ်၊ ကျောင်းသင်ခန်းစာ အသံလွှင့်အစီအစဉ်မှူး၊ အခြေခံပညာဦးစီးဌာန မြန်မာစာ အဖွဲ့ ကျောင်းသုံးစာအုပ်ကော်မတီ အတွင်းရေးမှူး စရေ့တာဝန်တိ ထမ်းဆောင်ခဲ့ပြီး (၁၉၇၉)ခုနှစ် တွင် ဆေးပင်စင်ဖြင့် အငြိမ်းစားယူခဲ့ရေ။
မအုန်းခင်က အသက် (၁၆)နှစ်အရွယ် (၁၉၄၈)ခုနှစ်ကပင် ကဗျာတိ ရေးဖွဲ့ခဲ့ရေ။ တိုင်းရင်းမေ မဂ္ဂဇင်း တွင် လစဉ်ပုံမှန် စာရေးခဲ့ပြီး 'မာလောနွယ်'ကလောင် အမည်ဖြင့် ကဗျာတိ ရေးသားခဲ့ရေ။ ရန်ကုန်တက္က သိုလ် ရောက်ဟိချိန်တွင်မူ နွယ်(စစ်တွေ) ကလောင်အမည်ဖြင့် ကဗျာတိ ဆက်လက်ရေးဖွဲ့ခဲ့ရေ။
စစ်ဧ့ အနိဌာရုံတိကို ကိုယ်တိုင်ကြုံတွေ့ခံစားခဲ့ရသူ နွယ်(စစ်တွေ)ရေ တက္ကသိုလ်ကျောင်းသူဘဝတွင် ကြုံတွေ့ခဲ့ရရေ့ ကူမင်တန် ကျူးကျော်စစ်အကြောင်းကို အိုးဝေမဂ္ဂဇင်း၌ 'ချစ်မြေလွှာ' ဂေါင်းစဉ်ဖြင့် ကဗျာ တစ်ပုဒ် ရေးဖွဲ့ခဲ့ရေ။ ယင်းကဗျာကိုပင် (၁၉၅၃)ခုနှစ်၌ ရှုမဝမဂ္ဂဇင်းတွင် ထပ်မံထည့်သွင်း ဖော်ပြခဲ့ပါ ရေ။
(၁၉၅၃)ခုနှစ်၌ပင် 'စစ်မဲ့ကမ္ဘာ' ကဗျာဖြင့် သခင်ကိုယ်တော်မှိုင်းဆု (ဒုတိယဆု)ကို ရဟိခဲ့ရေ။ ယင်းကဗျာ မှာ နွယ်(စစ်တွေ)ပြိုင်ပွဲဝင်ခဲ့ရေ့ ကဗျာတစ်ပုဒ် မဟုတ်သော်လည်း (၁၉၅၃)ခုနှစ် ငြိမ်းချမ်းရေးပြပွဲ ပြိုင်ပွဲ တွင် ဆရာဒေါင်းနွယ်ဆွေက ကြိုက်လွန်းသဖြင့် နွယ်(စစ်တွေ)အား အသိမပီးဘဲ ပြိုင်ပွဲဝင်ခဲ့ရေ့ ကဗျာဖြစ်ပါရေ။ မူရင်းကဗျာမှာ ဂန္ထဝင်ဂျာနယ်တွင် ဖော်ပြပါဟိခဲ့ရေ။
"လူ့သမိုင်းမှုန်မှိုင်းအတိတ်၊ နှောင်းအရိပ်တွင်၊ မျိုးစိတ်ထန်လျက်၊ စစ်မြေထွက်၍၊ လက်နစုံခ၊ တဒင်္ဂဝယ်၊ အားရခုတ်ပစ်၊ ဓါးချင်းထစ်သံ၊ အော်ဟစ်တည်ကြွေး၊ မြင်းခွာပြေးသံ၊ လေးဆေးမြည်လျက်၊ စစ်စည်နှက်သံ၊ လျှပ်လက်ရေ့လား၊ လံှစွပ်ဖျားလည်း၊ အသွားချင်းခ၊ တွေ့ဆုံကတ်သံ၊ သောသောညံ၍၊ ပြင်းထန်ကြောက် မက်၊ စစ်သူခက်ဧ့၊ မက်မောခဲ့ရစ်၊ လူ့သွေးစစ်ကို၊ သောက်ပစ်လိုဟန်၊ ဆန္ဒသန်တည့်" စရေဖြင့် 'စစ်မဲ့ကမ္ဘာ" ကဗျာကို အစပြုထားပါရေ။
ယင်းနောက်ပိုင်းတွင်လည်း နွယ်(စစ်တွေ)ရေ ကဗျာအတိအပြားကို ရေးဖွဲ့သီကုံးခဲ့ပါရေ။ ထို့နောက် အသက်(၈၀)နှစ်အရွယ် (၆)ရက်၊ မေလ၊ (၂၀၁၁)ခုနှစ်တွင် ကွယ်လွန်ခဲ့ရေ။ နွယ်(စစ်တွေ)ဧ့ နာရေးကြော်ငြာကို (၇-၅-၂၀၁၁)ရက်စွဲပါ ကြေးမုံသတင်းစာတွင် အောက်ပါအတိုင်း တွေ့ဟိရပါရေ။
ဒေါ်အုံးခင် [ နွယ် - စစ်တွေ ]
B.A Bed. Ed
Ed. Dip in (U.K)
အသက် (၈၀)
(ဦးအောင်ထွန်းဦး-ဒေါ်စိန်ပု)ရို့ဧ့ သမီး၊ [ ဦးရွှေဇံအောင် (ညွှန်ကြားရေးမှူး - ငြိမ်း)၊ မြန်မာ့ ဂုန်လျှော်လုပ်ငန်းဌာန ] ဧ့ဇနီး၊ (ဒေါ်စောမြ-ဦးကျော်ဇံ)၊ (ဦးမောင်မောင်ကြီး)-ဒေါ်မြသွင်၊ (ဒေါ်ခိုင်ခိုင်-ဦးသာထွန်းအေး)ရို့ဧ့ ညီမ၊ ဦးကျော်ကျော်-ဒေါ်သာနှင်းအေး၊ (ဒေါ်မြင့်မြင့်)-ဦးမောင်မောင်တို့ဧ့ အစ်မ၊ ဦးထွန်းထွန်းဧ့ မိခင်၊ အမှတ်(၄၂)-စီ(၂)၊ ဗဟိုလမ်း၊ စစ်ချောင်းမြို့နယ်၊ ရန်ကုန်မြို့နီ ဒေါ်အုန်းခင်ရေ ၆-၅-၂၀၁၁ (သောကြာနိ့) နံနက် ၁၀း၃၀ နာရီတွင် SAKURA အထူးကုဆေးရုံ၌ ကွယ်လွန်သွားပါသဖြင့် ကွယ်လွန်သူဧ့ ဆန္ဒအရ ဂနိ့ညနီ (၄)နာရီတွင် ထိန်ပင်သုဿန်၌ သင်္ဂြိုဟ်ပြီးစီးပါကြောင်း။ [ ကွယ်လွန် သူအား ရည်စူး၍ ၁၂-၅-၂၀၁၁ (ကြသပတေးနိ့) နံနက်(၉)နာရီမှ (၁၂)နာရီအထိ အောင်ပန်းကျောင်း တိုက်၊ ဗဟန်း(၃)လမ်း၊ အနောက်ဘက်ထိပ်၊ ဗဟန်းမြို့နယ်၊ ရန်ကုန်မြို့သို့ ရက်လည်ဆွမ်းကျွေး တရားတော်နာ ကြွရောက်ပါရန် ဖိတ်ကြားအပ်ပါရေ။ ] ကျန်ရစ်သူမိသားစု
ဟူ၍ဖြစ်ပါရေ။
ကိုးကား edit
တင်နိုင်တိုးရေးသားရေ့ ပါလီမန်ခေတ် ထင်ပေါ်ကျော်ကြား မြန်မာအမျိုးသမီးများ စာအုပ်မှ -