Tun Jang atau tun Hejang adeba do kundei dau tun asli neak Provinsi Kulau ngen Sumatra Selatan, Indonesia. Tun Jang umumne tinggea neak Bukit Barisan (Tebo Bederet) gi kundei an ijai pusat temboak kembangne budayo Jang o dewek. Pusat budayo o adeba Kabupaten Lebong gi uyo, bel'o genne Kutai Belek Tebo ngen Reneak Sekelawai. Seluyen o, dau tun Jang gi baliak ngen menea penan tinggea neak pesisia Kabupaten Kulau Utara, ade kulo gi tinggea neak ulau Bioa Awes, Sumatra Selatan. Rombong de pertamo kennal tun kulo sebagai Jang Sisia (Rejang Pesisir). Ade kulo de neak ulau Bioa Awes kennal sebagai Jang Awes (Rejang Rawas).
Neak Provinsi Kulau, tun Jang adeba tun gi paling dau neak lemo kundei 10 kabupaten-kota gi ade. Tun Jang ijai mayoritas neak Kabupaten Lebong, Rejang Lebong, Kepayang, Kulau Utara, ngen Kulau Tengeak. Tun Jang asline coa tmuan budayo alau moi ratau. O ba nggut uyo coa dau tun Jang gi tinggea neak luea "Taneak Jang". Cuman, bi kedau taun belakang, bi muloi dau bujang, smulen Jang gi baliak moi Kota Kulau, bahkan moi luea provinsi ngen moi Jawai. Umumne mesoa kerjo, amen coa o melajut skula moi kampus-kampus luea Kulau.
Asal Gen
editGen atau kato "Jang" nggut uyo ati jelas asalne kundeipe. Ade de madeak amen Jang o taine melitas atau menyeb'ang. Coa de bukti gi nam dmukung pendapat do io. Cuman, Prof. Richard McGinn kmeluea hipotesis amen ninik puyang Jang bel'o nam bae teko moi Taneak Jang uyo kundei Kalimantan. Prof. McGinn kulo madeak kaleu baso Jang o masiak dekeluargo magea baso-baso Dayak Bidayuh gi ade neak Serawak, Malaysia.