|
Artikɕl nɕak bɕak i'o tnulis ngen gmuno baso Jang di'alek Lɕbong. Tɕtɕp sɕmangɕt tɕ smido (calon) Wikipedi'a-tɕ.
. |
Skedei o gén bungai lem baso Jang. Bungai skedei i'o dau temboak neak lem imbo. Si temboak coa kulo basing, coa kulo nam te tmanem-ne. Skedei o dau tun namén kundei gén Sir Thomas Stamfor Rafflés. Si tun Inggris gi perneak alau moi Kulau waktau Kulau masiak ijai wilayah gi knu'aso Inggris. Waktau Beli'au o neak kulo, tobo-ne alau moi imbo, ules-ne adé awei ékspédisi awei o. Nah, neak imbo Kulau Utara -ba tobo o tmau magea bungai gi kembiak lai. Lai-ne nam si 1,1 méter. Bungai o nggut uyo masiak ijai bungai paling lai neak deni'o libea i'é.
Gén rafflési'a o kadeak-ne utuk tminget jaso Sir Thomas Stanford Rafflés ngén asistén-ne Arnold gi tmaum, lajau mengenal-kan bungai o moi deni'o, singgo-ne amen te madeak rafflési'a paset dau tun namen. Cuman, walau si awei o, bungai rafflési'a o sebenea-ne bi an temboak neak Kulau. Ke-an o-ba tun Jang bi kenal magea skedei. Mujua kembiak mujua, uyo KBBI (baso Indonési'a: Kamus Besar Bahasa Indonesia, baso Jang: Kamus Lai Baso Indonesi'a) idong adé upayo lok kmayo baso Indonési'a kundei mengemok kato dedau-ne kundei baso-baso da'érah neak Indonési'a, termasuk-ba baso Jang. Nah, nam te melei usul supayo gén rafflési'a o adé sinonim-ne. Tai-ne, kato skedei i'o bé nam te mesoa artai-ne neak KBBI.
Bungai skedei i'o dau tun gi galok saleak, kmiro bungai i'o serai-ne ba'é magea bungai kibut. Padahal skedei ngén kibut o mémang si luyen. Amen kibut o adé akar-ne, iso si parasit, skedei o si parasit, begatung coa ték kiro magea inang penan si temboak. Kibut nam tnanem, nam te menea bibit-ne. Amen skedei, te manusi'o i'o ati temau ca-o awei ipe lok tmanem bungai skedei.
Skedei tmu'an mahkota. Singgo amen te kemliak skedei pepa-ok, skedei o awei bungai ni'en cuman si keboa ngén lai. Umum-ne kelopak mahkota skedei o adé lemo. Cuman adé kulo gi tmu'an num kelopak. Warno bungai skedei i'o orén agok mileak-mileak didik. Mbon-ne coa si angit amek awei mbon bungai kibut.
Propinsi Kulau gi letak-ne rogok selatan Pulau Sumatera i'o dau tun medeu-ne sebagai Bumai Rafflési'a (Bumai Skedei). Bumai Rafflési'a o ijai brand wisata Propinsi Kulau, sekaligus nakei neak organisasi mahasiswa asal Kulau gi alau uak, meratau moi Plimbang, Jawai (Jakarta, Jog'ja, ddl.), Padang, ngén penan luyen. Himamira (Himpunan Mahasiswa Bumi Rafflési'a) Unipersitas Indonési'a, Ikmabira (Ikatan Mahasiswa Bumi Rafflési'a) Unipersits Sriwijaya, ngén Hiragama (Himpunan Mahasiswa Bumi Rafflési'a Unipersitas Gajah Mada) o ba conto organisasi makei istilah rafflési'a utuk ijai brand-ne.