Kanada (baso Inggris: Canada) ade-ba nêgrai nêak pêak utara-nê datêa Amerika Utara. Kanada tmuan dêpuluak provinsi ngen tlau teritori. Tanêak io têbêtang kundêi patoi-nê Bioa Lai Pasifik nêak pêak barat sapêi moi Bioa Lai Atlantik nêak pêak timur. Ade-ba kulo nêak pêak utara-nê Kanada io bioa lai gen-nê -Arktik. Kêrno o kulo motto Kanada o A Mari Usuqe Ad Mare (Kundêi do laut moi laut dê luyên). Kanada ade-ba nêgrai paling lai nomor duai sêsudo Rusia. Luas-nê ade-ba 9,98 juta kilometer persêgi. Nêgrai io ca gen batas da'êt magêa nêgrai luyên sêluyên Amerika Serikat. Ibukota-nê ade-ba Ottawa nêak Provinsi Ontario. Tlau kota utamo-nê o-ba Toronto, Montreal, ngen Vancouver. Kanada dê tanêak-nê kêbiak lai io tun dê tinggêa-nê didik. Umum-nê tanêak nêak di têtutup magêa imbo ngen padang tundra.
Kanada ade-ba nêgrai demokrasi, maju kulo. Gajai pêr kapita-nê nomor 15 nêak dênio. Indêks Mbangun Manusio-nê rêngking sêpuluak. Ekonomi-nê kulo nomor sêpuluak paling lai. Nêgrai io dau tmuan tambang. Si kulo kêmbiak sugiak sumbêr dayo alam-nê.
Asal Gen-nê edit
Dau tiori têtang asal gen Kanada e. Cuman dê paling tnimo tun o, gen "Kanada" tênmau tun kundêi baso Iroquoian dê tinggêa rogok Bioa St. Lawrence. Kato "Kanada" têko kundêi kanata dê nêak lêm baso Iroquoian tai-nê ade-ba "sadêi", "talang", atau "pênan tinggêa".