ترجیع بند شعر صنعتینده بیر سیاقدیر کی بیت لرین آخری بیر قافیه ده اولار. ترجیع‌بند سیاقینه یاخین
ضـيـا پاشادن مثال اولاراق بر ترجیع بند edit
- بر زمانلر بن دخى دوشدم بلاى غيرته
- طوغريلقله اغرادم بيك درلو درد و زحمته
- كه وطندن آيريلوب كيتدم ديار غربته
- عاقبت اولدم كرفتار اشبو مهلك علته .
- وه يازق صرف ايتديكم عمره زمانه خدمته
- فكر ايچون كورمك بنى كافيدر اهل عبرته
- خيلى دملر بيلمدم باعث ندر بو حالته
- شمدى اولدم دوستلر واقف بو سر حكمته .
- درده اوغرار كيم صداقت ايتسه البت دولته
- استقامت محض جِنتدر بو ملك و ملته .
- كندمى بذل ايليوب اصلاح دولت اوغرينه
- بن نلر چكدم نلر بو استقامت اوغرينه
- خانمانم تارومار اولدي حميت اوغرينه
- برك و بارم هپ پريشان اولدى غيرت اوغرينه
- نفسمه ظلم ايلدم خلقه عدالت اوغرينه
- جسم و جان ايتدم فدا بو ملك و ملت اوغرينه
- بن هله اولدم تلف كيتدم بو فكرت اوغرينه
- هى نه حمق و جهل ايمش يانمق صداقت اوغرينه
- درده اوغرار كيم صداقت ايتسه البت دولته
- استقامت محض جِنتدر بو ملك و ملته .
- سن مى قالدك اى افندى دهره ويرمكجون نظام
- اويله مرهملر ايله بولماز بو ياره التيام
- غازهء عطار ايله كلمز عجوزه انتظام
- عصريمزده صدق و غيرت اهلى بولماز احترام
- وار ايسه همت آني صرف ايتمش اسلاف كرام
- جان ويروب ايتمشلر اخلافك رفاهن التزام
- سن بو مجنونانه فكره ويرمه اصلا اهتمام
- اُوىْ مزاج عصره كر راحت ايسه قصد و مرام
- درده اوغرار كيم صداقت ايتسه البت دولته
- استقامت محض جِنتدر بو ملك و ملته .
- سن دوشرسك كيمسه لر كلمز امداديكه
- دستكير اولدقلركْ حتى يتشمز داديكه
- خنده ايلرلر اُوزاقدن جمله سى فرياديكه
- دقت ايتمز كيمسه استحقاق و استعداديكه
- كندك ايتمه سعى و همت كنديكك برباديكه
- يوقسه رحمك كنديكه بارى آجى اولاديكه
- وار ايسه عقلك اكر مجنون ديديرمه آديكه
- درده اوغرار كيم صداقت ايتسه البت دولته
- استقامت محض جِنتدر بو ملك و ملته .
- قنده سين قنده چيق اى مهدىء صاحب ظهور
- ملت اسلامى پامال ايلدى جيش فتور
- قالمادى اسلام ايچون بر يرده آرام و حضور
- قاپلادى ملكى سراپا لشكر ظلم و شرور
- كچدى نا اهل اللره حيفا زمام هر امور
- بر کيشى يابسه بيكى ييقماق ايچون ايتمكده زور
- اهل صدق و استقامت عصرده كورمز سرور
- اول سببدن سويلمش بو بيتى بر صاحب شعور
- درده اوغرار كيم صداقت ايتسه البت دولته
- استقامت محض جِنّتدر بو ملك و ملته .
تــرجــيـع بــنــد ‘دن ۲ edit
- بو كارگاه صنع عجب درسخانه در
- هر نقش بر كتاب لدندن نشانه در
- گردون بر آسياب فلاكت مداردر
- گويا ايچنده آدم آواره دانه در
- مانند ديو بچه لرين التقام ايدر
- كهنه رباط دهر عجب آشيانه در
- تحقيق اولنسه نقش تماثيل كائنات
- يا خواب ويا خيال وياخود بر فسانه در
- منجر اولور امورِ جهان بر نِهايته
- صيفك شتايه ميلى بهارك خزانه در
- كسب يقينه آدم ايچون يوقدر احتمال
- هر اعتقاد عقله گوره غائبانه در
- يا رب نه در بو كشمكش درد احتياج
- انسانك احتياجى كه بر لقمه نانه در
- يوقدر سپر بو قبهء فيروزه فامده
- ذرات جمله تير قضايه نشانه در
- اصل مراد حكم ازل بولمدى وجود
- ظاهرده كه صواب و خطا هپ بهانه در
- بر فاعلك مـأثريدر جمله حادثات
- نه اقتضاى چرخ و نه حكم زمانه در
- سُبْحَانَ مَنْ تَحَيَّرَ في صُنْعِهِ العُقولُ
- سُبْحَانَ مَنْ بِقُدْرَتِهِ يَعْجِزُ الفُحُولُ
منبع edit
( كليات ضيا پاشا ، استانبول ، 1924 ، ص 151-157 )