¡KAYCHAWPIS MAYCHAWPIS SHUNTANAKUSHUNMI QICHWA RUNAKUNA!
UNAY 5 WARANQA WATANA KAYCHAW KAWANCHIK
Colectivo Quechua Central nishqanqa huk shumaq mushuq ayllumi. Kay aylluqa shuntan llapan Qichwa parlaq runakunata kay markakunachaw kaykaayaqta: Junín markachaw, Pasco markachaw, Huanuco markachaw, Ancash markachaw, Lima markachaw, La Libertad markachaw kaykaayaqtapis. Kay aylluqa manami Chawpi Qichwa parlaq runakunallapaqchu, ichaqa llapan chay markakuna nishqanchikchaw yuriyashqankunapaqpis, chaypita, Chawpi Qichwa yachakuyashqankunapaqpis, niykur, tukuy Chawpi Qichwa kuyaq runakunapaqpis.
Kay Colectivo Quechua Centralqa kay ruraykunatami ashin: Chawpi Qichwata maychawpis parlayaananta, kuyayaananta, yachakuyaananta, washayaanantapis munan. Kaypaqqa, parlaqkuna llullu wamrakunata allita yachachinanchik, yachakuyta munayaqkunatapis shumaq yachachinanchik. Niykur, llapan unay yachayninchikkuna, llapan unay rurayninchikkunapis mana wañuyaananta munan. Kaypaqqa llapanchik Chawpi Qichwa runakuna kaq llapan tushuyninchikkunata tushunanchik ayllunakurkur, llapan takinchikkunata takinanchik shumaq qurinakurkur, imayka unay yachayninchikkunata qipa kaqkunata yachachinanchik, mayqan munayaqkunatapis. Chaypita, Chawpi Qichwapaq huk qillqaylla kanantapis munan. Kaypaqqa mana yachaqkunata yachachinanchik imanaw huknawlla Chawpi Qichwata qillqakashqanta.
Kay Colectivo Quechua Central nishqanchaw imaykatapis willanakushun, riqichinanakushunpis Chawpi Qichwanchikpita. Qichwa kuyaq wawqikuna, panikuna kay hatun ayllukayman aywakayaamuy.
¡Alli shamushqa kachun llapaykikunapaq!
Colectivo Quechua Central pushaqkuna