Wp/quc/Rapinel Winaq

< Wp‎ | qucWp > quc > Rapinel Winaq

https://incubator.wikimedia.org/w/index.php?search=k%27wa%27&title=Special:Search&incprefix=Wp%2Fquc&fulltext=1Jun q’ijol are taq in ko pa jun nimaq’ij, jela’ chi uxe’ uloq le rulew le watz a Tun, jela’ pa ajsaqk’aja’. Xane xinpaqi’ aq’anoq pa taq le che’, xwaj xinewa’kat pa taq le k’iche’laj. Are taq xinel aq’an chi uchi’ le k’ichelaj, e k’o taq winaq kijachom taq kib’ che taq kitzijonem, xuquje’ e k’o taq ja, xinpaqi’ chi aq’an jub’iq’ k’ate’ xwilo e k’o aq, e saq taq aq, e q’oyolik, are taq xkito chi xinpaqi’k, xkichap qurinik, xepe wuk’.

Xinchomaj wene kepaq’anik xintzalij loq aninaq, k’ate’ kwilo k’o q’ateb’al kojom are le k’ix taq ch’ich’. Xane xinsutij rij, xinpaqi’k chi jub’i’q, k’ate’ xwil ri k’iche’laj sib’alaj mayijib’al ri ub’antajik, e nima’q ri che’, sib’alaj q’equ’m, q’equ’m ri upam, k’o uxaq che’ pa ri ulew, e k’o kepatzalajik xinto.

K’ate’ xwil e keb’ kuk koqatalo’m kib’ xeb’ek, xinqet chi apan jub’iq’, no’jimal xinmaj sayayik xane man chikaj taj xinel wi, xinok chi jub’iq’ chik pa ri k’iche’laj xinriq jun alaj k’wa’ sib’alaj je’l, je’l, je’l ri kb’antaj loq chikaj xane xar, xar kapetik, xinqet pwi’ ri uchi’, xane xinxi’j wib’ xinb’e k’a pa unik’ajil, xinchomaj wene’ kinuji’k uloq xincha’, rumal che ri k’a chi uxe’ jun tanatik k’o wi, le in pwi’ le tanatik in k’o wi loq, xane xaq pa keqiq’ in k’o wi.

Le in man tajin ta kinb’in pwi’ ri ulew, xane xa’ xinrapinik, xinel chi la’ xinsayayik xinb’ek k’ate’ xinto e keb’ alaj taq ak’alab’ e teren chwij.

Jas kilib’ana’ ix ak’alab’ xincha’ chi kech. Ri e’are’ man xinkich’ab’ej taj. Xaq k’ate’ e maj chik. Xinok chi b’ik jub’i’q, k’ate’ xwilo e k’o kachoch kan taq ri aq, jewa’ xinchomaj, are b’a ri e raq juyub’ wa’ xincha’.

Chi k’ate’ xinto e k’o nik’aj awaj kexik’anik xepetik kewitz’inik, je ri e k’o aq ri xinta’ in, chi k’ate’ xwilo e nima’ taq awaj, are le kb’ix iguana chi kech, xane kk’ixix ri kij, kmajitaj chirij kiwi’ kk’is ruk’ kmajitaj wi le kije’.

Xinxi’j wib’ ke’ink’ayej uloq pwi’ jun nutum ab’aj, xane xpe ri jun xpaqi’ pwi ri ab’aj jaw ri in k’o wi.

Aninaq xinb’ij chech man katpaqi’ ta uloq xincha’ chech, are ku ri jun ri k’o kan pa ulew xub’ij chech chat qaj uloq maj kinb’an chawech xcha’ chech. Are k’u ri jun xub’ij, che qastzij, xcha’. Je’ qas tzij xcha’. Xqaj uloq no’jimal xpaqi’ chi che jun che’. E k’o kan chila’ xinpe in.