Ri mek'ek'em are wa' ri jun nimalaj nimanik ri k'oji'k che ri winaq are taq nim ke'ril wi ri unan utat, ri e rachalal, ri e ralk'wa'l xuquje' ri uk'ul ja pa ri komon. Ri mek'ek'em are wa' uk'amom uloq jun nimalaj utzil pa uk'aslemal ri winaq mayab', xa' rumal che ri e winaq nab'e nim ri moch'och'ik, xkikoj ri kipixab' ri e kinan kitat, maj la' xaq wa'katem xuquje' ri elaq' ri jas taq kb'an kamik, xa' rumal che ri are wa' le xkik'am uloq le kaxlan taq winaq ri xepe ch'aqaja'. Le kamik sib'alaj k'ax chik le tajin kk'ulmataj pa le qatinimit, xa' rumal chi le alk'wa'lixelab' man kkikoj ta chi le kipixab' le nan tat, maj chi upatan le qakojb'al, maj chi upatan le qano'jib'al, le qach'ab'al man kkikoj ta chik, maj chi kik'ixib'al che ub'anik ri k'axk'olil, xane xaq k'axk'olil chik ri k'o pa ri kichomanik. Man nim ta chi kkil ri qanan uwach ulew, xane man nim ta chi kkil wi le k'iche'laj, le awajib', xuquje' le ja', xaq kkib'an chi k'ax chech. Rumal taq wa' we k'axk'olil ri' maj chi qajab', maj chi utzil pa taq le tinimit, xa' ch'o'jinik chik kkib'an pa uwi' taq le jastaq, le loq'alaj uwach ulew man qech ta uj, xane konojel kkaj kkib'an kech chech. Le kwaj in kinb'ij chi kech konojel ri e qawinaq, rajawxik qak'asuj chi na jumul ri kino'j ri e qati't qamam, rech utz kujkowin na kqab'an chi na ri jun k'amow ib' ruk' ri qanan uwach ulew. Le uj le uj winaq xa' uj jun che taq ronojel uwach k'aslemal le k'o cho uwach ulew, xa' uj we kqachajij wa' we k'aslemal ri' chi qech uj tajin kqab'an wi. Xa' nim qila' wi ri kipixab' ri eqat'it qamam rech utz kujel pa ri qak'aslemal. Le utzil xuquje' le k'axk'olil pa qaqab'uj k'o wi.
