kanta kani Pinuyumayan mu, na Mulivelivek di na Kasavakan mu, mikakuwayanan diya da tikelruwan haram. nu kapitu vulan mu, a kare’aniyan da dawa, adiyu diya, murairaip ta mare’ani. adaman mu kadu ta kanmu, harem kana wari mu, kadu ta kaniyam, nu ’emanan mu awa ta kantaw, marpulralrang ta. na sararaypan mu salaw mavangavang, nu tu adayaw tu lralrak mu, uniyan da wari milran, maya’ da areked na ’uway di tu dawayaw da tikelruwan. tu payudaw na lralrak. miiniyudan lra na lralrak mu, adi lra pakavangavang da ma’idangan. na ma’idangan mu, maruwa lra patelre’ay kikarun. parkipiya ta lra da ta vangavangan i ’uma, ta dinkalranan i dekalr. mipinadangan di mi’apuc, muwaduk ta i karuma’an semungal kianun kana temuwamuwan. semangalan kemaya datu iyaveray da vulay di sadu a dawa. semenay ta di muarak ta. adiyu diya, na vavayan kani dekalr mu, kadu i ruma’ pailran da lralrak, maciyanapan, demuru, temusasiyaw, remames, maidap, cema’i da kavang, pakavulay da ruma’ di kemirungec da ma’idangan. yawa diya i ’uma kikaruna, salaw mavangavang di maulep. na ma’inayan mena’u kana lralrak da timikakelru da tikelruwan mu, kemiyanger da dadawayan da ma’idang na tikelruwan. ta patikelruwaw na vavayan kema. mukuwa i henan maya’a da tatelraw di kecevi na vasikaw. patikediraw na vasikaw demaway da ma’idang di acas da tikelruwan. tu patikelruwaw na vavayan. tu tikakelru da vavayan i dekalr kema. semiya lra nu mukuwa ta i Mulivelivek muwadangiya mu, mau na vavayan na timikakelru. adi ta menana’u da ma’inayan da timikakelru. na ma’inayan mu, micepa kemedekedeng datu tatilu’ na tikelruwan. na vavayan mu, mipinadangan kemayan kana ca’apan, tu dikesay tu tatilu’ na tikelruwan, tu kedengaw na ma’inayan, acas di padawilr tu tinikelruwan. nu manadam lra na vavayan mu, salaw vulay nu temikelru. maresan da ’ayam da muwavii. tu pauwayan da tikelruwan kani Kasavakan mu, maresan kana Mulivelivek. mau na puwaliki da lralrak nu temararamaw kema. nu kapavirungan demadira’ na ma’idangan mu, uniyan da papailran kana lralrak mu, salaw maulep kemiyaanger na temararamaw kana lralrak. nu kadu na lralrak mu, tu dawayanay i ngidiran da tikelruwan tu kivangavangan. munu pena’ing kapalisili kema. piya kikarun kana palisiyan mu, karsenasenay di malikasaw, nu muarak na ma’idangan mena’u kana lralrak da temikakelru da tikelruwan, salaw kana semangal na lralrak di, ’inava nu demaway ta da ma’idang na tikelruwan di, mukasakasaya ta timikilru i palakuwan semasahar kema lra di, mau na timikelru ta lra harem nu ka’amiyanan i Kasaavakan.