aawac diya mu, naniyam dekalran kana rumaruma’ diya i nganguwayan di ngidilan i daladalan mu, sinaleman da puran da satulitulikm i paliyuliyus. nu venusisi diya na puran mu salaw kana vulay tu ’apuc di ngulringulr. tu vuwa’ na puran mu, mawu lra tu aapuran na ma’a’idangan di nashar diya mapur na cau diya. nu duwa na wadadiyan i ruma’ mu, padang ta da puran. nu penalalisi na rahan di na temararamaw mu, tu pu’inasiyaw na puran kianun kana temuwamuwan. idu na pituraruma’an na adain na dimilraw mu, ta pakavulayaw puwalak tu ngisengis na sapungulran di vinutu’ lra pakavulay.
na cava’i mu, maruwa ta demaway da akanan. ta cekipaw i capingiran na cava’i di, ta tusukay da vasikaw, nu mena’u ta lra mu kamawan da sudang. ta avakaw na siyaw mu, adi mu’a’atelr. nu mukuwa ta i ’uma kikaruna mu, ta avakay da akanen ta picavuaw mukuwa i ’uma tinuputavuwan.
nu piya ta lra mekan mu, ta ’atelranay i ’uma’uma na cava’i. nu matupa’ lra, mutudadaruk lra. adiyalra sahar ta da cava’i inta na Yuancumin. melri nu mawmau tinuputavuwan na cava’i, maruwaya ta demaway da ’aves di tinupaliding kemedeng kivangangavangan na lralrak. palru harem ini na cava’i na tinupaliding kemedeng kivangavangan munayung diya i dekalran adi kaaunaniyan. mau na adi pakararimek di, maruwa ta pakakerevat datu dadek na lralrakan kema. semalra kaniyam i dekalr nu semasaharan mu, marayas mi kivangavang kanini na cava’i, salaw kana mipauwayan.
ulra nu eman nu pararahan ta da ruma’ mu, maruwa ta miturak da ruma’. mukuwa ta diya maya’a da uli’ic di patedelr na puran na ma’idangan. alra nu ta varatanay kana ruma’ mu, salaw areked di adi ames nu macaceme, maruwa ta diya tinuliveng data ruma’. nu kaderunan mu, adi vavi’as dadu. nu veceliyan mu, salaw sadeku. ulra nu ’ema’arat ta kanta salikidan mu, nu mi’arad ta kantu kawi na puran, tu itulikan mu salaw patedelr di vulay.
semalra nu semalem ta kana puran mu, kaadiadi kaunaniyan di mipauwayan kanta wavaawan na Yuancumin.