mugamut
mugamut i tu trepa dra babayan a kasanglan.
asuwa driya, tu kinabangabangan kana wawariwari dra babayan na melralratudr i, karuwa adalrep saya bulan, an musekadr tu kiyakarunan i mareaanger, sareedr dratu pinarnarnangan kikarun, driyama, nantu marangeran semime dratu niyarepayanan i, mugamut a babayan. dratu wagamutan pakanguwayan dra druwaya wari, idru na kemedrekedreng i mukuwa kantu ruma kana yawan pakalradram dratu kaburiawan aw madrayadrayar dra kakudayan, pakangawayan dra saya wari i, kadru a muketrep tu pinitrauwan a maidrangan dra bayabayan mukuwa dratu ruma kana markiyanatrayan kandri kana samaya bulan, tu pakusenayanay muraparapas tu sipelengan, tu kara pukedrangay nadruna may talaulu tu babayan kana miyanatrayan kana ruma mu simeaw mu dradrek tu kayaw, tu pakalradramay nadru na markyanatrayan tu babayan dra kaadri druwa kuranaga kana mugamut. idrini na mukuwa kantu ruma kana kalraman i, a muraparapas tu pauwayan, kemay kandri aw kemedreng dra kalraman benanban, aw maruwaya inabalra tu wanger marepuibat lra dra traw . na saya i, an pakangwayan dra drwayawari i, tu tudruaw a miyasama a mainayan kana yawan, pawka i dawilr dra drenan yulray kiyatraker. kandru kana pakanganguwayan kana wagamutan kana wari, tu retraanay na traker kantu kinuretan na dare kanantu kemakedreng kana bayabayan, na mainayan mukuwa mertraa kadru i, kadru a miyasama a babayan kinakasu dra akanan dra tratrekelan kiyatrebung, tu dardaranay kadri dadare idru na akanan na tratrekelan, aw markirenang kimadrayar kanadru kana maytingting, aw tu puarebay puamuday, piyalra tremekel i salrangan muruma, na traker tu lipedraw mertra kadru kana raretraan kana dare. dadaman kaburiawan kanawari semabalr, druwa na maainayan tu kelayatraw tu pukasayaw tu kinalayatr, maruwaya an druwa na bayabayan i, maruwa mudadunun martigir kadri rawiri rawalran kana traker, mukasa karadikedikes. kaburiawan kana wari, na pakasatredriya kana muktrep miasma dra nanema tu ami na bayabayan i. may pinapadangan, miyaaputr kadri tranguru, mukuwa maradruka i palakuwan, na bangangesaran kadru makadalan miyalaws kana bayabayan, kurkadrukadru lra peniya i, kemay kana maramaidrangan trumungulr na lralrakan mudadunun muturik dra druwaya turik, aw gemilrgilr trempuk dra tawlriyulr masikasik mukuwa kana nirtraan kana traker. an munguwayangayan i kamawan kana muwauma driya, amaw driya na paturus madaada kemedrekedreng semeratr muyuy, meredek kadru i, murikaputan maariari bulenu, salepunan salepunan kabekas trempa i drekalr. piyalra kabekas i mutaturik dra druwaya turik marbeliyas kana niretraan kana traker, masalr driya murikapukaputan mutaturik, aw karadikedikes kana traker, an gemilregilr muruma makadalan i markirnang muyuy. musabak kadri drekalr i, melribak muka muliyusa pariyasalr kadri waebengan, aw muka muliyusa pariyasalr dratu ruma kana yawan. aw marbeliyas kadri waebengan muliyus driya dra partelun, aw tu retraanay saninin na traker, aw semenay muwarak a babayan, an adru i druwa a maainayan melubisa salrangan muwarak. palribak i, tu parbulabulasaw na kalrama tu trau puwarak kadri likupakupan, idru i temara benanban. piyalra mabulabulas na kalraman i, temalaulep driya marealri. piya marealri i, nantu kasasadruwan lra kana bayabayan miyanger, mulisaw peniya matengadraw, idru na maramaidrang na babayan i temega salaw bulay tu lrengaw awtu pinungaladan kamawan dra ayam dra maruniruni mayaayam: piya semenay i, mararaganan aw semenay driya dratu senay kadri umauma kana melralratudr, aw tu palruwanay kadriny tu kaburiawan temedrer . aw tu kasuwau kana yawan meretra na traker, awna drunu na imiimian, kan piya kantu kaburiawan i mukuwa semungla kana druwa pardeka dra pinakulriyamus kantu nirumaenan kuwarabakan, idru na imi i mukuwa muenaya dra druwaya paetang muka semalretraga i ruma dratu kuwarabakan temar semungal, aw a sarekes a sinarsar a basikaw nantu puwailay. dadaman semabalr na karmisasayan na babayan i, muka i uma kemawi dra karatulutulu tu puwakawi kana yawan kiyabatramg, piya marpanini kana traker i tu ananaw driya kana yawan, kananamanan, aw semenasenay aw tu palruwanay lra.