ini na piningaiyan na“mangayangayaw’’ kema nantu vinavalrayan na kinkiyu na sinsi mu, tu valrayaw da “penalisi da ungay” kema di, mau lra harem na “mangayangayaw’’ tu kinakuwayan. tatena’tu pauwayan ini na“mangayangayaw’’ kema mu, a manadanadam da kitatengedan kema, di salaw kina’idang atu palalisiyan inta na Pinuyumayan diya.
atu inuramiyan kanini na mangayangayaw mu, kemay adiyu diya kadu diya i henan kema mu, salaw mutelre’ay atu kinaduwan. na dinkalranan mu, uniyan da venangavang datu ikavavaaw, kadu a saya wari, mukuwa temuhusa da dawa i ’uma na dinkalranan kema mu, kadu elra a ’alra. duwa kicangulu’a kanadu na tematuhus na cau, marvuniyun nadu na cau di pukasa kana mutukuwaceng.
kemay kanidu lra, temupalakuwan lra na dinkalranan kema, di panadam lra kana lralrakan datu kimiyacepayan kimitatenged kana ’alra. maruwaya ’emiyar kana dekalr kema atu pauwayanan na palakuwan. adu mu paveliyaliyas da tu anger na ma’idangan, ’’man kemadu di kemani ta, muranak awa? lramu mau na adi penauwa ta penalisi pakan kana parvuwa’ awa? di na eman mu kirpa’uwa da patavangan awa? nu kemadu mu ta sunanay da tu canguru’ na cau kema’’ , di kemay kanidu lra nu tatuhus pakangaway mu, mukuwa diya kicangulu’a na vangsaran. i eman idu na kicangulu’, mau na sanga na ’uringec kema na kakuwayanan.
aymu ini na kicangulu’an mu, adi ta semasevang elra, salaw kana kapalisilisi di padangar , nu adi ’uringec sayhu kimiyatenged kana ’alra mu, adi kararuwa kicanguru’ da cau, mau ini nu maranger ta paka’uringec da cau, di panadam da pukedang nu kinalralrakan diya, maruwaya cempa kana ’alra kema di , mau lra na kiyaungay tu panadamaw na cakuvakuvan kimiatenged kana ungay. kemawan da kimiatenged kana ’alra kema tu pauwayanan. ini na mangayangayaw mu, nintu karakadan da palisiyan inta na Pinuyumayan kana kinasa’amiyan. nu piya mangayaw mu, na duma na palisiyan di na kiyakarunan i ’uma mu, maruwa lra kimirakad mungsalr kikarun.
a awac diya, adidiya duwa kani i Taiwan nani na payrang mu, i kani maka dekadekalr diya na Yuacumin kema mu, marayas martatenged di, mureha datu kuri’alru’alrup. tu marangeran panadam paka’uringec kana ma’inayan diya awlra. mau na parvuwa’ lra panadam kanani na lralrakan diya, patakesi tu kakuwayanan da ma’inayan, di manadam da kumudakuda macacepa kana ’alra, maruwaya ’emacip milran da dekalr kema tu pauwayanan. semalra nu pacepa pularudus ta lra kana saya ’ami mu, kimirami ta puwaduk kana cakuvakuvan, mukuwa i henan manadanadam da ’emvanga da ungay, di tu adayaw remeca’ kadu kana papana’an, tu karpana’aw nadu na cakuvakuvan pinacay kanidu na ungay, mau na kemani tu inilrangan na“mangayangayaw’’harem lra na “mangayangayaw’’ inta na Kasavakan mu, saya ’asungan nu muhenan. muhenan nu ’emanaman adidiya ’uninan, meredek i henan mu, payas maya’ kanatu tararuan tu ka’alrayan yulray, demadaway diya tu pana’ di tu pecir, piya kara’alri, nani na maradawn di na vangsaran mu, tu pilralrangaw nani na cakuvakuvan menadanadam datu kakudain muvaaw di, datu kararekedan datu dadek, di kadu marpakuwakuwa palali’usan. nu ’aremeng mu, duwa na dawdawanan venavatiya kana kakuwayanan, di panadam kana senay. nu ka’aremengan lra, tu pakalrangay diya da parlrimalrimawan temarkauka’ud kanadu na cakuvakuvan.
nu pukaduwa wari nu semavalr mu, nani na maradawan tu panadamaw da dawayan da tinuwaungay a calunan, di tu vulriyaw i maka henahenan i caluwalun, tu paaya’aw nadu na cakuvakuvan, na acevaeng mu, ulra tu pakasahar kanini na cakuvakuvan, kemadu lra marpakuwakuwa penapana’ kanidu na tinuwaungay.
piya kemay panapana’an mu, lemehis pavukas piyadekalr, meredek lra i dekalr mu, mau na vavayan na kicacevung pu’apuc, mipinadangan di puteha lra muwarak semasahar. ini mu mau kemani lrempus lra ta mangayangayaw.