basibas dra trakubakuban
a puyuma i padramal dra pauwayan dra nirukaputan i nantu pukasa dra kirkameniyan i sidrumayan, a mainayan driya i kemay kana manguden palru dra maidrang i ulraya tu pinungalangalad paseket malradram kantu katrengadrawan i drekalr. na mainayan i kemirami kana trakubakuban i meladaladam, dra pauwayan i kadruwadruwanan kemay trakuban dra nenema ami aw mibetan dra tuluwa ami. aw padrulun kitubangsar i a mainayan lra kemata. a mainayan dra puyuma i a emalaalaw i drekalr, a pinasurukan dra karatraratrang dra kagalagala. a kaamtregan a katalrimaan i drekalr. a miyabetan a bangsaran kan mutralun a drekalr i amau na puwadalan na emalaalaw, dra maidrangan, na pangara, na puwabias, i taruan dra niyarapayan. a lralrak i puyuma i an muketrep mikadruwa dra druwaya ami i muysatr lra i trakuban, palru dra muketrep mikadruwa dra pituwa ami, nenema ami trakuban. meladaladam dra kauringetran, dra alrepatan dra kiyagelayan dra taranapawan niyarapayan i kadruwadruwanan. an sabusabungan lra i tu waadrukan kana trakubakuban marpaladaladam, na maradawan i pakarukarun melrimaw kantu maranakan. an katrebasan dra butrelan dra amiyan i basibas na trakubakuban, palribak driya i temalrabakay, semimusimuk, na trakubakuban. aw an dadaman dra semaluwan semabalr i, miberas kamisasayan aw muka gemamula, pumaderu dra temuwamuwan, marbeliyas lra i muka lra mangayangayawa, marbeliyas lra i muka lra pangayangayawa masikasik i trakuban, an mupatraran i drekalr i muka trematruwalra driya kana kalraman, aw muka lra trumulaga kantu tinure alra na lutung. trumulag kana lutung i melralrimaw kantu i kawarinetr, amauna kadru pinungadir kana kudraw, namuyaisatr, namuwadare. tu pauwayan i ulraya na muwasabak i trakuban, ulraya na puludus piyabetan lra. melangtri aw tu kudrawau tu lutung, aw muka lra matelra i adraadraran kantu lutung, kantu alian. pauwayan dra kaadru dra trakubakuban i tu kalraayan malradram dra kakuwayanan amun mulremes ta pauwayan, kema tu lrema. amauna ta dawayaw a palaladaman a lralrak garem i sadru tu takasian an adrita kemedrekedreng na drekalr demaway, dra laladaman i kaulid ta temuludr kanta trungutrungulran.