i Kulilay Amit (A-mit) mau nanta mauwan na Pinuyumayan, ulra i Tamalrakaw tu dekalr, haremanay mu salaw da mingadan i Taiwan lra, i punapunayan lra di i Valrakalraka kana kanatar i iyan diya. alra kana sayhu semenay, nu kinger ta tu senay mu, vulay di purekedan, ames ta kidanin tu isasenay adi ripidan mu, hayay ta kurelrang semenay di malikasaw, maruwaya pakasadeku di paka’inava kanta anger. harm mu kaadu i Taipei.
a temakesi diya i kawcong nadu u martavur mu, salrangan kantu tavur i Haling di Iko demaway kana “micepa semasenay”,nu temaulepan I kungkuwan mu menadanadam tu sasenayan. nu ulra na semasahar di ’amiyan i dekadekalran mu, mena’u ta kadu salrangan tatelu nadu micepa da semenay, na duma na dinkalranan lra, na vangsaran lra di na vulavulayan lra, say na lralrakan mu muduwaduk i palakuwang muwaalaka di malikasawa, tu semangalan mu minganga kinger.
adi ripidan mu, mena’u ta kani Amite mukuwa i Taipei kurelrang kana tilibi( u teng ciyang) ma’ari’ari na semasenay. nu kinger ta tu i sasenay mu, salaw vulay di maruwa pakaames kanta anger i savak, puludus lra muwalak kana pakasasahar na pukaisa. palru adu kana wari mutu hayyo lra, sadu lra na sahar kantu senay, sadu lra tu itanan, maruwa pulihun kantu rima’enan di dinkalranan, semalra maruwa puvalivalis di paka’inava tu wavaawan i ruma’.
nu ulra ta palalisiyan lra, na ’amiyan lra, na kasaharan lra i Taipei lra , i dekalr mu, kaadiadi muruma’ kurelrang kana dinkalranan muwaraka di semenaya. nu mane’u diya na dinkalranan mu, kaadiadi pakasemangal pakasadeku tu anger. ulra nu eman mu, maruwaya parkedang parka’inava tu piangeran.
ulra diya nu madalram nanta cemacepuk mali na samauwan yawa i Valraka di duma na katanar mu, maruwaya pulralrang, parehecrehec tu piangeran na paysu di maruwaya pangecngec cepuk kana mali, di merak kana mar’ari’ari na ’inava pakasemangar.